អ្នកជំនាញ៖ យុវជនខ្មែរបច្ចុប្បន្នខ្សោយមុខវិជ្ជាអក្សរសាស្ត្រខ្មែរ

អ្នកជំនាញធ្វើការងារជាមួយយុវជនឲ្យដឹងថា មានចំណុចអវិជ្ជមានជាច្រើនដែលបណ្ដាលឲ្យយុវជនខ្មែរមានកម្រិតសិក្សាផ្នែកអក្សរសាស្ត្រជាតិកាន់តែខ្សោយទៅៗ។

ដោយ វណ្ណ វិចារ
2012-06-16

sv.mp3

១០-តុលា-២០១២៖ កុមារនៅក្នុងសាលារៀនមួយ ក្នុងខេត្តកំពង់ស្ពឺ។

RFA/Mom Sophon

អ្នកជំនាញរិះគន់ថា ចំណុចដែលសំខាន់បំផុតបណ្ដាលឲ្យយុវជនរៀនខ្សោយផ្នែកអក្សរសាស្ត្រជាតិ គឺគោលនយោបាយរបស់ក្រសួងអប់រំ និងវិធីសាស្ត្របង្រៀនរបស់គ្រូនៅតាមសាលារៀន។

ប្រធានសមាគមយុវជនខ្មែរ លោក ម៉ាក ចំរើន មានប្រសាសន៍ថា បច្ចុប្បន្នយុវជនខ្មែរជាច្រើនរៀនខ្សោយផ្នែកអក្សរសាស្ត្រជាតិ។ លោកបន្តថា ការរៀនខ្សោយជំនាញនេះមកពីក្រសួងអប់រំមិនមានយុទ្ធសាស្ត្រខ្លាំងក្លា ដើម្បីជំរុញការអាន ការសិក្សាស្រាវជ្រាវភាសាខ្មែរ និងមិនបានបង្ហាញច្បាស់ពីអត្ថប្រយោជន៍នៃការរៀនភាសាខ្មែរ។

លោក ម៉ាក ចំរើន បញ្ជាក់ថា មានវិធីសាស្ត្រជាច្រើនសម្រាប់លើកស្ទួយការសិក្សាផ្នែកអក្សរសាស្ត្រជាតិដែលក្រសួងអប់រំមើលរំលង៖ «យើងអាចនៅតាមសាលាមួយៗពង្រឹងគុណភាពបណ្ណាល័យ ទី២ គឺយន្តការជំរុញទឹកចិត្តឲ្យសិស្សចូលចិត្តអាន ប្រកួតប្រជែងផ្នែកភាសាខ្មែរ។ ការប្រកួតប្រជែងទាំងនេះមានកម្រិតទាប»។

ទន្ទឹមនឹងនេះ និស្សិតសកលវិទ្យាល័យមួយនៅរាជធានីភ្នំពេញ លោក សេង សុធី ប្រាប់ថា សព្វថ្ងៃលោកពឹងផ្អែកទាំងស្រុងលើភាសាបរទេស ទាំងការងារទាំងការសិក្សា។ លោកបន្តថា ចំពោះអក្សរសាស្ត្រខ្មែរវិញលោកមិនសូវសរសេរត្រូវប៉ុន្មានទេលើពាក្យពិបាកៗ។

ចំណែកឯនិស្សិតសកលវិទ្យាល័យមួយក្នុងខេត្តបាត់ដំបង យុវជន ជើត រស្មី មានប្រសាសន៍ថា ខ្លួនមានសមត្ថភាពគ្រប់គ្រាន់ក្នុងការប្រើប្រាស់អក្សរសាស្ត្រជាតិ។

រស្មី បន្តថា នៅសហគមន៍លោករស់នៅមានយុវជនជាច្រើនដែលមិនអាចចេះសរសេរ និងអានអក្សរខ្មែរ៖ «មានគគោក គាត់ចូលថ្នាក់ទី៨ហើយ អានអក្សរអត់ទាន់ដាច់។ ជីដូនមួយខ្ញុំមួយអានអក្សរអត់ដាច់ រួចហើយឈប់រៀន។ បើសិនគាត់រៀននៅតែជាប់ដោយសារគាត់ប្រើប្រាស់ថវិកាអ៊ីចឹង...»។

យុវជន រស្មី បន្តថា ការមិនចេះអាន និងសរសេរអក្សរសាស្ត្រជាតិ នាំឲ្យយុវជនជាច្រើនមិនមានសមត្ថភាពទទួលបានព័ត៌មាន នាំឲ្យចាញ់បោកគេធ្វើចំណាកស្រុកដោយប្រថុយប្រថានជាដើម។

វិទ្យុអាស៊ីសេរី មិនអាចទាក់ទងសុំការបំភ្លឺពីមន្ត្រីក្រសួងអប់រំយុវជន និងកីឡាបានទេ នៅថ្ងៃទី១៥ មិថុនា ឆ្នាំ២០១២។

ទោះជាយ៉ាងនេះក្តី នាយកវិទ្យាស្ថានភាសាជាតិកម្ពុជា និងសមាជិករាជបណ្ឌិតសភាកម្ពុជា លោកបណ្ឌិត អ៊ីវ ច័ន្ទ មានប្រសាសន៍ថា យុវជនបច្ចុប្បន្នប្រើប្រាស់អក្សរសាស្ត្រជាតិមិនសូវល្អ ដោយសារតែគុណភាពគ្រូបង្រៀន។

លោកបន្តថា គ្រូបង្រៀនកាលពីសម័យមុនយកចិត្តទុកដាក់ខ្លាំងក្នុងការតាមដានការសិក្សារបស់សិស្ស ដែលនាំឲ្យសិស្សមានសមត្ថភាពខ្ពស់ក្នុងការប្រើប្រាស់អក្សរសាស្ត្រជាតិខ្មែរ៖ «គ្រូខ្លះខ្វះឧត្ដមគតិ គ្រូខ្លះទៀតឆ្លៀតទៅរកស៊ីក្រៅ ហើយមិនបានតាមដានការសិក្សារបស់សិស្ស»។

លោកបន្តថា ក្រសួងអប់រំបានធ្វើការងារពង្រឹងគុណភាពអប់រំច្រើនដែរហើយក្នុងការជំរុញការសិក្សាអក្សរសាស្ត្រជាតិ។

កាលពីសម័យអាណានិគមនិយមបារាំង បារាំងបង្ខំឱ្យខ្មែររៀនភាសាបារាំង ជាភាសាយានផ្លូវការ ដែលជាបុព្វហេតុនាំឱ្យខូចប្រយោជន៍ដល់ភាសាជាតិ។ ប៉ុន្តែការសិក្សាភាសាខ្មែរនៅតែមានជីវិតក្នុងទីវត្តអារាមនានា ដែលជាសាលារៀនលេខ រៀនអក្សរ វិជ្ជាជីវៈ សីលធម៌ ហើយជាពិសេសសិក្ខាកាមនៅតាមសាលាវត្តនេះហើយដែលជាអ្នកផលិតអក្សរសាស្ត្របន្សល់ទុកសម្រាប់កូនចៅសិក្សារៀនសូត្ររហូតមកដល់បច្ចុប្បន្ន។

គ្រូបង្រៀនមួយចំនួនឲ្យដឹងថា សព្វថ្ងៃសិស្សរៀននៅអនុវិទ្យាល័យមួយចំនួនមានសមត្ថភាពទាបក្នុងការអាន និងសរសេរអក្សរសាស្ត្រជាតិ បើប្រៀបធៀបទៅនឹងសិស្សដែលរៀននៅចន្លោះទសវត្សទី៨០ និងដើមទសវត្សទី៩០។ ក្រុមគ្រូបង្រៀនទាំងនោះអះអាងថា មូលហេតុនេះមកពីការផ្លាស់ប្ដូរកម្មវិធីសិក្សារបស់ក្រសួងអប់រំ។

គ្រូបង្រៀនទាំងនោះពន្យល់ថា កាលពីសម័យនោះ សិស្សថ្នាក់ទី១ រៀនអក្សរខ្មែរពីព្យញ្ជនៈ ទៅស្រៈនិស្ស័យ ស្រៈពេញតួ ហើយបានផ្សំព្យញ្ជនៈជាមួយស្រៈ បង្កើតជាពាក្យ ជាប្រយោគ នាំឲ្យសិស្សងាយអាន និងសរសេរ។ ប៉ុន្តែវិធីសាស្ត្របច្ចុប្បន្ន គេបង្រៀនសិស្សថ្នាក់ទី១ ជាប្រយោគ បន្ទាប់មកបំបែកជាពាក្យ ជាព្យាង្គ និង ស្រៈ នាំឲ្យសិស្សពិបាករៀន ហើយរៀនក៏មិនងាយចេះដែរ។

ទន្ទឹមនឹងនេះ អ្នកវិភាគឯករាជ្យ លោកបណ្ឌិត សុខ ទូច មានប្រសាសន៍ថា កត្តាបីយ៉ាងដែលនាំឲ្យយុវជនសម័យទំនើបប្រើប្រាស់ភាសាខ្មែរមិនស្ទាត់ជំនាញ មានដូចជា បច្ចេកវិទ្យាសម័យនេះគេប្រើភាសាបរទេស កត្តាទីផ្សារការងារ និងកម្មវិធីសិក្សារបស់ក្រសួងអប់រំ។

លោកបន្តថា កម្មវិធីសិក្សារបស់ក្រសួងអប់រំបច្ចុប្បន្ន ច្រើនតែធ្វើសំណួរងាយៗ (QCM) បាត់អស់ការសរសេរតាមអាន និងតែងសេចក្ដី ដែលប្រការនេះយុវជនមិនសូវយកចិត្តទុកដាក់រៀនអក្សរសាស្ត្រជាតិ។

លោក សុខ ទូច បន្ថែម៖ «មានលក្ខណៈសំខាន់ពីរ។ ទី១ យើងត្រូវធ្វើយ៉ាងណាឲ្យតាមសាលាបំផុសកម្មវិធីសិក្សាភាសា ទី២ ការបំពេញបែបបទនៅគ្រប់ក្រុមហ៊ុន ត្រូវតែធ្វើឡើងជាពីរភាសា មានភាសាខ្មែរ និងបរទេស ដូចហ្នឹងយើងត្រូវរៀបចំប្រព័ន្ធច្បាប់ ការអនុវត្តច្បាប់ហ្នឹងហើយធ្វើឲ្យគេចូលចិត្តភាសាខ្មែរ»។

លោកបន្តថា រដ្ឋាភិបាលត្រូវតែយកចិត្តទុកដាក់បញ្ហានេះ នឹងត្រូវឲ្យមានការសរសេរតាមអាន និងតែងសេចក្ដីខ្មែរឲ្យបានច្រើនឡើងវិញ ដើម្បីជំរុញការសិក្សាអក្សរសាស្ត្រខ្មែរ។

កន្លងមកក្រសួងអប់រំបានរៀបចំការប្រលងជ្រើសរើសសិស្សពូកែភាសាខ្មែរនៅថ្នាក់មធ្យមសិក្សាទូទាំងប្រទេស ដែលជាការជំរុញឲ្យមានការចូលចិត្តសិក្សាអក្សរសាស្ត្រជាតិដែរ ប៉ុន្តែការយល់ដឹងអក្សរសាស្ត្រខ្មែរនៅតែខ្សោយ។

របាយការណ៍របស់ក្រសួងអប់រំឆ្នាំ២០១០-២០១១ បង្ហាញថា ចំនួនសិស្សបោះបង់ការសិក្សានៅថ្នាក់អនុវិទ្យាល័យមានចំនួនជាង ២១ភាគរយ ដែលជាការដើរផ្ទុយពីគោលដៅរបស់ក្រសួងអប់រំ។

ក្រុមអ្នកវិភាគយល់ឃើញថា ការមិនចេះអាន និងសរសេរអក្សរសាស្ត្រជាតិជាមូលហេតុមួយដែលនាំឲ្យសិស្សថ្នាក់អនុវិទ្យាល័យបោះបង់ការសិក្សា។ ម៉្យាងទៀត គ្រូបង្រៀនភាគច្រើននៅថ្នាក់បឋមសិក្សា និងមធ្យមសិក្សាមិនដែលបានបង្ហាញសិស្សថា អ្នកពូកែអក្សរសាស្ត្រជាតិ នឹងអាចចាប់យកឱកាសការងារណាមួយបាននោះឡើយ។

ក្រុមអ្នកជំនាញឲ្យដឹងថា អ្នកពូកែអក្សរសាស្ត្រជាតិ អាចក្លាយជាអ្នកនិពន្ធអ្នកសារព័ត៌មានអ្នកនយោបាយអ្នកគ្រប់គ្រងសាស្ត្រាចារ្យជាដើម៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។

អត្ថបទដែលទាក់ទង

មតិ (5)

ចុចត្រង់នេះដើម្បីបន្ថែមយោបល់របស់អ្នក

Senarak

ពី Phnom Penh

Ministry of Education is having the poor and uneducated leaders in the Education Ministry. There is no Research and Development Department, how can they improve the education system. The Children now is studying very hard from Monday to Saturday, this is plenty of time. អ្នកវិភាគបែបម៉ារៀលៗឯងកុំបន្ទោសក្មេង។ មានកែលោកឯងទេ ដែលមិនយល់ដឹងថាប្រព័ន្ធអប់រំវាយ៉ាងណា និងថ្នាក់ដឹកនាំវាខ្សោយ។

Jun 22, 2012 04:33 AM

Lee

ពី Stockton, CA USA

It essentailly important for Khmer children to be master and prioritize
Khmer literature, foreign language should be second. To reform this structure should start from the Cambodian Department of education.

Jun 19, 2012 11:45 AM

អ្នកអានអនាមិក

សម័យលោកអាចារ្យហែម ចៀវ លោកបានយកជីវិតទៅប្តូរដើម្បីរក្សាអក្សរសាស្រ្តខ្មែរ។ បច្ចុប្បន្ននេះ គ្រប់គ្នាខិតខំធ្វើការដើម្បីរកលុយបង់ថ្លៃសាលាឲកូនដើម្បីបានសិក្សាភាសាបរទេស។ មានប្រទេសជាច្រើនលើពិភពលោកនេះ ដែលបានបាត់បង់ភាសាកំណើតខ្លួន តើកម្ពុជាអាចនឹងដើរតាមគន្លងប្រទេសទាំងនេះដែរឬទេក្នុងរយៈពេលខាងមុខ? កត្តាការងារ កត្តាបច្ចេកវិទ្យាទំនើប ឆន្ទៈនយោបាយរបស់រាជរដ្ឋាភិបាលដែលផ្តោតទៅលើបញ្ហអក្សរសាស្រ្តខ្មែរ។

Jun 18, 2012 10:06 PM

អ្នកអានអនាមិក

ពី Phnom Penh

កាលណាសិស្សណាខ្សោយមុខវិជ្ជាភាសាខ្មែរហើយនោះ គេនឹងខ្សោយស្ទើរតែគ្រប់មុខវិជ្ជា។ ឯមូលហេតុសំខាន់បំផុត ដែលនាំឲ្យសិស្សានុសិស្សខ្សោយនោះគឺបណ្តាមកពីគ្រូ បង្រៀនមានប្រាក់ខែតិចតួចមិនអាចមិនអាចផ្គត់ផ្គង់ជីវភាពគ្រួសារបាន ដូច្នេះគាត់ត្រូវចំណាយពេលរករបរផ្សេងមួយទៀតបន្ថែមដើម្បីទប់ទល់ជីវភាព ដែលជាហេតុបណ្តាលឲ្យការបង្រៀនរបស់គាត់ខ្វះគុណភាព។ សិស្សជំនាន់មុន សង្គ្រាមច្រើនពូកែ តើគ្រូបង្រៀនមានប្រាក់ខែប៉ុន្មាន?
នេះហើយជាលទ្ធផលដែលយើងទទួលបាននៅពេលប្រាក់ខែគ្រូតិចនោះ!!!!!!!!!!!!!
គេមិនសូវយករឿងប្រាក់ខែតិចមកនិយាយទេ ព្រោះអ្វី??????

Jun 16, 2012 10:12 PM