ឆ្លៀតពេលនេះដែរ លោក សូខាមផាន សុវណ្ណាថាត ក៏បានជួបពិភាក្សាទ្វេភាគីជាមួយរដ្ឋមន្ត្រីក្រសួងការពារជាតិកម្ពុជា លោកនាយឧត្ដមសេនីយ៍ ទៀ បាញ់ នៅថ្ងៃទី២៨ ខែឧសភា ឆ្នាំ២០១២ នៅឯក្រសួងការពារជាតិ។
រដ្ឋមន្ត្រីក្រសួងការពារជាតិកម្ពុជា លោកនាយឧត្ដមសេនីយ៍ ទៀ បាញ់ និងជាឧបនាយករដ្ឋមន្ត្រី និងរដ្ឋមន្ត្រីក្រសួងការពារជាតិថៃ លោក សូខាមផាន សុវណ្ណាថាត នៅថ្ងៃទី២៨ ខែឧសភា ឆ្នាំ២០១២ បានឯកភាពគ្នាថា នឹងបើកកិច្ចប្រជុំក្រុមការងាររួមលើកទី២ របស់គណៈកម្មាធិការព្រំដែនទូទៅរវាងកម្ពុជា និងថៃ នៅទីក្រុងភ្នំពេញ នៅដើមខែមិថុនា ឆ្នាំ២០១២ ខាងមុខនេះ។
កិច្ចប្រជុំនោះ គឺផ្ដោតលើការដកកងទ័ពនៃប្រទេសទាំងពីរតាមដីកាបង្គាប់របស់តុលាការយុត្តិធម៌អន្តរជាតិ (ICJ) នៅថ្ងៃទី១៨ ខែកក្កដា ឆ្នាំ២០១១ កន្លងទៅនេះ ដែលបានបង្គាប់ឲ្យកម្ពុជា និងថៃ ដកកងទ័ពចេញពីតំបន់គ្មានកងទ័ពបណ្ដោះអាសន្ន ទំហំជាង ១៧គីឡូម៉ែត្រក្រឡានៅក្បែរប្រាសាទព្រះវិហារ។
រដ្ឋមន្ត្រីក្រសួងការពារជាតិកម្ពុជា លោកនាយឧត្ដមសេនីយ៍ ទៀ បាញ់ បានមានប្រសាសន៍ថា យើងបន្តការចរចាលើការដកកងទ័ពនោះទៀត នៅគ្រាដែលកម្ពុជារៀបចំកិច្ចប្រជុំនៃក្រុមការងាររួមគ្នានៅទីក្រុងភ្នំពេញ នៅដើមខែក្រោយនេះ៖ «ក្រុមការងារហ្នឹង ដើម្បីលំអិតបញ្ហាហ្នឹងឲ្យបានលំអិតថែមទៀត ក្នុងការដែលអនុវត្តនូវដីការបស់តុលាការយុត្តិធម៌អន្តរជាតិនោះ។ ខិតខំរកការដោះស្រាយឲ្យវាបានលឿន»។
ទាក់ទងនឹងការដកទ័ពនោះដែរ រដ្ឋមន្ត្រីក្រសួងការពារជាតិថៃ លោក សូខាមផាន សុវណ្ណាថាត បានមានប្រសាសន៍ដែរថា យើងបន្តការចរចាតាមរយៈក្រុមការងាររួមរវាងកម្ពុជា និងថៃ ដែលបានបង្កើតហើយនោះ។
លោកបានមានប្រសាសន៍ជាភាសាថៃ ហើយត្រូវបានប្រែសម្រួលជាភាសាខ្មែរថា ការចរចានោះផ្ដោតលើប្រធានបទសំខាន់ៗ៖ «ប្រទេសថៃ បានកត់សំគាល់ឃើញយ៉ាងច្បាស់លាស់ហើយថា ដំណើរការកាន់តែយឺតយ៉ាវនោះ វាអត់បង្កនូវផលល្អដល់ប្រទេសថៃណោះទេ។ ប្រទេសថៃ មានភាពស្មោះត្រង់ក្នុងការអនុវត្តចំពោះបញ្ហានោះ។ ទី១នោះ ដោយសារតែតំបន់នោះមានមីនកប់នៅក្រោមដីច្រើនណាស់ …នោះជាបញ្ហាមួយដែរ»។
ក្រុមការងាររួមរបស់គណៈកម្មាធិការព្រំដែនទូទៅ (GBC) បានជួបប្រជុំគ្នាលើកដំបូងរួចម្ដងហើយ នៅថ្ងៃទី៣ ដល់ថ្ងៃទី៥ ខែមេសា ឆ្នាំ២០១២ កន្លងទៅនេះនៅទីក្រុងបាងកក ប្រទេសថៃ (Bangkok /Thailand)។
ក្រុមការងាររួមនោះ បានចេញសេចក្ដីថ្លែងការណ៍រួមចំនួន ៨ចំណុច ក្នុងនោះមានដូចតទៅ៖ ភាគីទាំងពីរកម្ពុជា និងថៃ បានឯកភាពលើគោលការណ៍កែសម្រួលកងទ័ព ឬដកកងទ័ពចេញពីតំបន់គ្មានកងទ័ពបណ្ដោះអាសន្ន និងអញ្ជើញអ្នកសង្កេតការណ៍រួមពីប្រទេសកម្ពុជា ថៃ និងឥណ្ឌូនេស៊ី ដើម្បីបន្តពិភាក្សាក្នុងកិច្ចប្រជុំក្រោយទៀត។ ការឯកភាពលើ ៨ចំណុចនោះ មិនទាន់បានបញ្ជាក់ថា តើថ្ងៃខែណាត្រូវកងទ័ពនោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។