បណ្តាប្រជាពលរដ្ឋនិងថ្នាក់ដឹកនាំអ៊ិស្លាមសាសនិកទាំងនោះ បានឲ្យដឹងថា នេះជាសញ្ញាមួយដើម្បីបង្ហាញថា ពិភពលោកឆ្ពោះទៅរកសន្តិភាពដោយមិនរើសអើងពូជសាសន៍ សង្គម ឋានៈ និងសាសនារបស់ជនជាតិនីមួយៗនៅក្នុងបណ្តាប្រទេសលើពិភពលោក។
លោក ហាជ្ជី អ៊ីព្រហ៊ីម នៅភូមិអង្គរបាន ស្រុកកងមាស ខេត្តកំពង់ចាម មានប្រសាសន៍ថា លោកគាំទ្រចំពោះនយោបាយអាមេរិក គឺលោក បារ៉ាក់ អូបាម៉ា ដែលមានជំហរក្នុងការចងសម្ព័ន្ធមិត្តនឹងបណ្តាប្រទេសអ្នកកាន់សាសនាអ៊ិស្លាមលើពិភពលោក។ លោកបន្ថែមថា មិនថាសាសនាអ្វីនោះទេ គឺធ្វើយ៉ាងណាឲ្យសាសនិកនីមួយៗមានការគោរពសិទ្ធិគ្នាទៅវិញទៅមកជាការប្រសើរបំផុត។
លោក ហាជ្ជី អ៊ីព្រហ៊ីម ថ្លែងដូច្នេះថា ៖ «ខ្ញុំយល់ឃើញថា នយោបាយអាមេរិកាំងលោកប្រធានាធិបតី ប៊ូស គាត់មានលម្អៀងម្ខាងៗអ៊ីចឹង ហើយសាសនាអ៊ិស្លាមគ្រប់ប្រទេសគេមិនសូវចូលចិត្តគាត់ ម្ល៉ោះហើយនយោបាយវាចេះតែបែកបាក់។ ឥឡូវហ្នឹង ប្រធានាធិបតីឡើងថ្មីមក គាត់បង្រួមវិញ គាត់ថា ទាក់ទងប្រភពមូស្លីមទាំងអស់គ្នាឲ្យបានស្រួល យើងត្រេកអរ អ៊ិស្លាមនៅស្រុកខ្មែរអីកុំឲ្យមានរឿងតទៅទៀត»។
ថ្នាក់ដឹកនាំភូមិឬហៅថា ហាកឹម ឈ្មោះ មោសា សឡេះ នៅភូមិឃ្លាំងស្បែក ឃុំកំពង់លួង ស្រុកពញាឮ ខេត្តកណ្តាល មានប្រសាសន៍ថា ក្នុងនាមលោកជាសាសនិកអ៊ិស្លាមមួយរូប ក៏ដូចជាជនមូស្លីមទូទៅ អ្វីដែលចង់បាននោះគឺសន្តិភាពនិងការគោរពគ្នាទៅវិញទៅមក។ ហើយថា មនុស្សគ្រប់រូបមានឆន្ទៈដូចគ្នា គឺមិនចង់ឃើញពិភពលោកមានភាពរង្គោះរង្គើនោះឡើយ។
ហាកឹម មោសា សឡេះ ថ្លែងដូច្នេះថា ៖ «ប្រសិនបើពិភពលោកមានការសម្របសម្រួលគ្នាដូចជាគំនិត បារ៉ាក់ អូបាម៉ា ពិតប្រាកដមែននោះ ជាមោទនភាពមួយសម្រាប់មូស្លីម ព្រោះមូស្លីមយើងពុំមានឆន្ទៈ ឬក៏គោលគំនិតណាមួយ ដែលចង់ឲ្យពិភពលោកមានការរង្គោះរង្គើដោយសារសង្រ្គាម ឬក៏ថាដោយសារទំនាស់ទាស់ទែងគ្នាពីបញ្ហាផ្សេងៗទេ»។
និស្សិតមួយរូបក្នុងទីក្រុងភ្នំពេញឈ្មោះ អារីហ្វ៊ីន មានប្រសាសន៍ថា ជាការពិតណាស់នាពេលកន្លងមកគឺមានការរើសអើងពីបណ្តាសាធារណជនមួយចំនួន ដែលមិនមែនជាអ្នកកាន់សាសនាអ៊ិស្លាមនៅពេលដែលពួកគេជួបអ្នកមូស្លីម ឲ្យតែឮឈ្មោះជាលក្ខណៈអ៊ិស្លាមគឺគេមិនសូវចូលចិត្ត ឬមានការលំបាកក្នុងស្វែងរកការងារធ្វើដោយសារគេខ្លាចអ្នកកាន់សាសនាអ៊ិស្លាមជាភេរវករជាដើម។
លោកបញ្ជាក់ថា នេះជាការយល់ច្រឡំមួយ ៖ «ផលប្រយោជន៍របស់មូស្លីម គឺពួកគេនឹងរួចផុតពីការយល់ច្រឡំផ្សេងៗ ដែលសព្វថ្ងៃនេះ ភាគច្រើនប្រទេសលោកខាងលិចតែងតែចាត់ទុកពួកមូស្លីមថាជាពួកអរិភាព មានន័យថា ពួកដែលមិនគួរសេពគប់ជាមិត្ត។ ដូច្នេះប្រសិនជាសម្ព័ន្ធមិត្តរបស់យើងល្អជាមួយសហរដ្ឋអាមេរិក ខ្ញុំចង់និយាយថា ភាពដែលចោទទៅវិញទៅមកនោះនឹងបញ្ចប់»។
ហាកឹមឈ្មោះ លី មហាំម៉ាត់ នោ នៅភូមិជ្រោយចង្វា សង្កាត់ឫស្សីកែវរាជធានីភ្នំពេញ មានប្រសាសន៍ថា លោកសង្ឃឹមថា អ្វីដែលប្រធានាធិបតីអាមេរិកបានលើកឡើងនោះ នឹងអាចធ្វើពិភពលោកទទួលបាននូវសន្តិភាពដ៏ពិតប្រាកដជៀសវាងនៃការមិនទុកចិត្តគ្នាទៅវិញទៅមក។
ហាកឹម លី មហាំម៉ាត់ នោ ថ្លែងដូច្នេះថា ៖ «ដូច្នេះគាត់ចង់ឲ្យអ៊ិស្លាមពិភពលោកមានការត្រូវរ៉ូវអ៊ីចឹង យើងដែលជាប្រជាពលរដ្ឋមានការត្រេកអរណាស់ ដើម្បីចង់ឲ្យមានការត្រូវរ៉ូវ ជៀសវាងអំពីការមានសង្រ្គាម ឬក៏សម្លាប់គ្នាទៅវិញទៅមក»។
អ្នកតំណាងរាស្រ្តនៃគណបក្សប្រជាជនកម្ពុជា លោក ស្មាន ទៀត មានប្រសាសន៍ដែរថា ជនជាតិចាមនៅកម្ពុជាអ្វីដែលចង់បានគឺសន្តិភាព ទន្ទឹមនឹងនេះប្រជាពលរដ្ឋទាំងនេះក៏ចង់ឃើញពិភពលោកទាំងមូលទទួលបានសន្តិភាពដូចគ្នា ជៀសវាងនៃការលាបពណ៌ទៅលើជនជាតិណាមួយ ឬសាសនាណាមួយថាអាក្រក់ ឬមិនល្អនោះ។
លោក ស្មាន ទៀត មានប្រសាសន៍ដូច្នេះថា ៖ «មូស្លីមនៅកម្ពុជាមិនមានជាបញ្ហាអីជាមួយនឹងសាសនាដទៃ ជនជាតិដទៃ ហើយរស់នៅជាមួយនឹងជនកម្ពុជា ជាមួយនឹងពុទ្ធបរិស័ទរាប់រយឆ្នាំ មិនមានបញ្ហាទេ ហើយជាមួយនឹងគ្រិស្ត ជេស៊ូ ឬក៏សាវៈថ្មីរបស់ខាងហ្នុងក៏មិនមានបញ្ហាអីដែរ។ ខ្ញុំយល់ថា ការប្រើប្រាស់ភាសាមូស្លីម យើងគួរច្បិចយកជនទាំងឡាយណាដែលមិនសមស្រប ភាគច្រើនគេល្អ ចង់បានសន្តិភាព កាលណាយើងប្រើពាក្យមិនត្រូវ បានន័យថា លាបពណ៌ឲ្យគេ អាហ្នឹងធ្វើឲ្យបញ្ហាហ្នឹងមិនអាចដោះស្រាយបាន»។
លោកបានឲ្យដឹងទៀតថា ការលើកឡើងរបស់លោក បារ៉ាក់ អូបាម៉ា នោះ មិនមែនមានន័យថា អាចធ្វើឲ្យពិភពលោកទាំងមូលទទួលបាននូវផលវិជ្ជមានទាំងស្រុងនោះទេ សំខាន់គឺការអនុវត្តរបស់លោក អូបាម៉ា ក្នុងការដឹកនាំនិងការចូលរួមពីបណ្តាប្រទេសផ្សេងៗទៀតក្នុងការរួមចំណែកដើម្បីឲ្យពិភពលោកមានសេចក្តីសុខនិងការរីកចម្រើននោះ។
លោក ស្មាន ទៀត មានប្រសាសន៍ដូច្នេះថា ៖ «សង្កថារបស់លោក បារ៉ាក់ អូបាម៉ា ថ្លែងនៅទីក្រុង ហ្កែ នៃប្រទេសអេហ្ស៊ីប ជាការត្រឹមត្រូវ ប៉ុន្តែអ្វីដែលត្រឹមត្រូវជាងនេះ គឺការធ្វើឲ្យជាក់ស្ដែង ឲ្យត្រឹមត្រូវ ហើយឲ្យមានភាពលេចធ្លោនូវសមភាពរវាងសាសនា ជនជាតិនីមួយៗនៅក្នុងទឹកដីរបស់យើងនេះ»។
លោកប្រធានាធិបតីសហរដ្ឋអាមេរិកគឺលោក Barack Hussein Obama បានមានប្រសាសន៍ក្នុងសុន្ទរកថានៅពេលសម្ពោធឡើងកាន់តំណែងរបស់លោក កាលពីខែមករាកន្លងទៅថា បញ្ហាសង្រា្គមនៅប្រទេសអ៊ីរ៉ាក់ លោកបានប្រឆំាងទៅនឹងសង្រ្គាមនោះតាំងពីដើមទីមក ហើយចំពោះប្រទេសនៅមជ្ឈិមបូព៌ាវិញ សហរដ្ឋអាមេរិកនឹងស្វែងរកមធ្យោបាយថ្មីមួយដើម្បីដោះស្រាយ ដែលឈរលើការគោរពផលប្រយោជន៍គ្នាទៅវិញទៅមក ៖ «ខ្ញុំបានជំទាស់នឹងសង្រ្គាមនោះរហូត ពីឆ្នាំ២០០២, ២០០៣, ២០០៤, ២០០៥, ២០០៦, ២០០៧, ២០០៨ ហើយខ្ញុំនឹងបញ្ចប់សង្រ្គាមនោះក្នុងឆ្នាំ២០០៩»។
នៅក្នុងសុន្ទរកថារបស់លោក Barack Obama កាលពីពេលថ្មីៗនេះទៀត នៅទីក្រុងគែរ នៃប្រទេសអេហ្ស៊ីបគឺលោកបានថ្លែងថា សហរដ្ឋអាមេរិកមិនព្យាយាមចង់បានមូលដ្ឋានអចិន្រ្តៃយ៍នៅប្រទេសអ៊ីរ៉ាក់និងអាហ្វហ្កានីស្ថាននោះឡើយ។ លោកបានសន្យាថា នឹងដកទាហានអាមេរិកទាំងអស់ពីអ៊ីរ៉ាក់នៅក្នុងឆ្នាំ២០១២។
អ្នកស្រាវជា្រវឯករាជ្យលើជនជាតិចាម លោក អ៊ីសា អូស្មាន មានប្រសាសន៍ថា ការមិនរើសអើងជាកត្តាសំខាន់សម្រាប់មនុស្សគ្រប់រូប ពិសេសទៅទៀតនោះ សហរដ្ឋអាមេរិកជាប្រទេសប្រកាន់នូវលទ្ធិប្រជាធិបតេយ្យដែលធ្វើឲ្យប្រទេសដទៃ អនុវត្តនូវចំណុចដែលល្អៗរបស់អាមេរិក។
លោក អ៊ីសា អូស្មាន ថ្លែងដូច្នេះថា ៖ «ហើយខ្ញុំក៏មើលឃើញថា សហរដ្ឋអាមេរិកមិនមានចេតនាណាមួយដែលថា អ៊ិស្លាមជាសត្រូវ ហើយអ៊ិស្លាមក៏ដូច្នេះដែរ អ៊ិស្លាមមិនដែលមានចេតនាណាមួយចាត់ទុកសហរដ្ឋជាសត្រូវរបស់ខ្លួនទេ ដូច្នេះការយល់ច្រឡំកន្លងមក គ្រាន់តែជាក្រុមតូចមួយ»។
លោក អ៊ីសា អូស្មាន បានលើកឡើងទៀតថា ប្រជាពលរដ្ឋទាំងអស់ត្រូវបំភ្លេចចោលនូវអ្វីដែលមិនល្អ ដែលបង្កឡើងពីបុគ្គលមួយចំនួនតូច ដែលជាអ្នកកាន់សាសនាអ៊ិស្លាមបានបង្កឡើង ប៉ុន្តែទង្វើទាំងនោះ សាសនិកអ៊ិស្លាមលើពិភពលោកក៏ថ្កោលទោសដែរចំពោះទង្វើទាំងនោះ ដែលមនុស្សគ្រប់រូបទាមទារនូវសេចក្តីសុខមិនថាជនជាតិអ្វីឬអ្នកកាន់សាសនាអ្វីនោះឡើយ៕