លោក Sowat Kaew Sook (សូវ៉ាត់ កែវស៊ុក) ទីប្រឹក្សាអមស្ថានទូតថៃប្រចាំកម្ពុជា បានមានប្រសាសន៍កាលពីព្រឹកថ្ងៃពុធ ទី២៣ ខែកញ្ញាថា ខេត្តសុរិន្ទរបស់ថៃមានទំនាក់ទំនងល្អជាមួយខេត្តឧត្តរមានជ័យរបស់ខ្មែរ ហើយក៏ចង់អញ្ជើញមន្ត្រីកសិកម្មនិងតំណាងកសិករខ្មែរ មកពីស្រុកមួយចំនួនមានស្រុកអន្លង់វែង ស្រុកត្រពាំងប្រាសាទនិងស្រុកបន្ទាយអំពិល ជាដើម ទៅធ្វើទស្សនកិច្ចសិក្សាផ្នែកកសិកម្មនៅខេត្តសុរិន្ទចំនួន៤ថ្ងៃ ដោយនាំទៅមើលកសិដ្ឋានកសិកម្មផ្សេងៗ គោលបំណងដើម្បីផ្លាស់ប្តូរបទពិសោធន៍គ្នានិងអភិវឌ្ឍន៍វិស័យកសិកម្មនៅតាមតំបន់ព្រំដែនទាំងពីរជាមួយនឹងការសម្ដែងឲ្យឃើញនិងបង្ហាញនូវវប្បធម៌ពីគ្នាទៅវិញទៅមកផង។
លោក Sowat Kaew Sook ថ្លែងយ៉ាងដូច្នេះ ៖ «ឲ្យគាត់បានជួបចរចាគ្នាជាមួយប្រជាកសិករថៃ ហើយក៏បានប្ដូរបទពិសោធន៍ ទៅមើលកន្លែងដាំដុះស្រូវ ដាំបន្លែ ចិញ្ចឹមជ្រូក គោ»។
លោក ឈឹម ស៊ីវុធ ជំនួយការរបស់អភិបាលខេត្តឧត្តរមានជ័យ បានមានប្រសាសន៍ថា តបតាមការអញ្ជើញនេះ បន្ទាប់ពីមានការយល់ព្រមពីក្រសួងមហាផ្ទៃនៃប្រទេសកម្ពុជា សាលាខេត្តឧត្តរមានជ័យ បានចាត់ឲ្យអភិបាលក្រុងសំរោងជាអ្នកដឹកនាំគណៈប្រតិភូនិងតំណាងប្រជាកសិករខ្មែរទៅទស្សនកិច្ចនៅខេត្តសុរិន្ទ។
លោក ថុន ណុល អភិបាលក្រុងសំរោង បានមានប្រសាសន៍ថា មន្ត្រីខេត្តសុរិន្ទបានរៀបចំឲ្យប្រតិភូខ្មែរទៅមើលកន្លែងត្បាញក្រណាត់និងត្បាញសូត្រនៅខេត្តសុរិន្ទបន្តទៅទៀត។
គេមានគម្រោងនាំទៅមើលការចិញ្ចឹមដំរីរបស់ជនជាតិកួយ ទៅទស្សនារូបភាពក្នុងសារមន្ទីរ ទៅមើលការដុតធ្យូងដោយមានប្រសិទ្ធភាពខ្ពស់និងទៅទស្សនាសាកលវិទ្យាល័យបច្ចេកទេសជាន់ខ្ពស់មួយ។
មន្ត្រីដដែលបានមានប្រសាសន៍ថា ដំណើរទស្សនកិច្ចសិក្សាស្តីពីកសិកម្មទៅកាន់ខេត្តសុរិន្ទនេះនឹងចាប់ផ្តើមចេញដំណើរនៅថ្ងៃទី២៥ខែកញ្ញា ៖ «ម្យ៉ាងដែរ ព្រោះពេលដែលយើងពិភាក្សាគ្នាអំពីការប្រើប្រាស់ជី ឃើញថាតំណាងខាងយើងនេះមានកម្លាំងកសិករ ក៏មានតំណាងលោកប្រធានមន្ទីរកសិកម្មខេត្តគាត់អញ្ជើញចូលរួមដែរ អ៊ីចឹងគាត់នឹងធ្វើការប្ដូរយោបល់ពីរូបភាពជាក់ស្ដែងនៃកសិកររបស់យើង»។
មន្ត្រីស្ថានទូតថៃប្រចាំកម្ពុជា បានមានប្រសាសន៍ឲ្យដឹងថា នេះជាលើកទី២ហើយ ដែលមន្ត្រីខេត្តសុរិន្ទរបស់ថៃបានអញ្ជើញមន្ត្រីខេត្តឧត្តរមានជ័យនិងកសិករខ្មែរឲ្យទៅធ្វើទស្សនកិច្ចសិក្សាស្តីពីកសិកម្មនៅខេត្តសុរិន្ទនោះ។
កាលពីឆ្នាំមុន ខេត្តសុរិន្ទរបស់ថៃបានអញ្ជើញកសិករខ្មែរចំនួន៣០នាក់ទៅធ្វើទស្សនកិច្ចស្តីពីកសិកម្មម្តងមកហើយ ដែលមន្ត្រីថៃនិយាយថា ទស្សនកិច្ចកាលពីឆ្នាំមុនបានធ្វើឲ្យគេទទួលបានបទពិសោធន៍និងជោគជ័យយ៉ាងច្រើន៕