លោក ស៊ាន ម៉ាសាវ៉ាង ប្រធានគណៈកម្មការនយោបាយនិងផ្សព្វផ្សាយចលនាខ្មែរម្ចាស់ស្រុក មានប្រសាសន៍ប្រាប់វិទ្យុអាស៊ីសេរី ឲ្យដឹងបន្ថែមអំពីប្រធានបទសំខាន់ដែលមហាសន្និបាត នឹងលើកឡើង យ៉ាងដូច្នេះថា ៖ «ប្រធានបទសំខាន់ដែលយើងចង់បង្ហាញបងប្អូនយើង គឺដំណើរកម្ពុជាឆ្ពោះទៅរកជ្រោះមរណៈសហព័ន្ធឥណ្ឌូចិន។ ហើយនៅក្នុងប្រធានបទនេះ យើងនឹងនិយាយអំពីដើមកំណើតរបស់សហព័ន្ធឥណ្ឌូចិន បង្ហាញអំពីសកម្មភាពរបស់វៀតមិញ ដែលជ្រាបចូលទៅក្នុងចលនាទាមទារឯករាជ្យពីបារាំង មុនយើងបានឯករាជ្យ។ យើងក៏បង្ហាញដែរអំពីសកម្មភាពរបស់វៀតមិញ នៅក្រោយឯករាជ្យ មានគណបក្សប្រជាជនកម្ពុជា ដែលជាគណបក្សចេញមុខ ហើយនិងមានចលនាប្រជាជនបដិវត្តន៍ ជាចលនានៅក្នុងព្រៃ ហើយក៏យើងចង់បង្ហាញអំពីសកម្មភាពរបស់ខ្មែរវៀតមិញ នៅចន្លោះឆ្នាំ៧០ ដល់ ៧៩ យើងបង្ហាញអំពីការកសាងសហព័ន្ធឥណ្ឌូចិន នៅចន្លោះឆ្នាំ ១៩៧៩, ១៩៩១ ដោយគណបក្សប្រជាជន ដែលបន្តុបដោយកងទ័ពយួន ជាពិសេសយើងចង់បង្ហាញអំពីការកសាងសហព័ន្ធឥណ្ឌូចិន ដោយគណបក្សប្រជាជន ដែលខ្លួនជាប់ឆ្នោតតាំងពីឆ្នាំ៩៣ មកដល់ឆ្នាំ២០០៨»។
លោក ស៊ាន ម៉ាសាវ៉ាង មានប្រសាសន៍ថា អង្គមហាសន្និបាតនឹងមានសមាជិកសមាជិកាមកពីរដ្ឋនានាក្នុងសហរដ្ឋអាមេរិកនិងមកពីប្រទេសដទៃខ្លះទៀត សរុបអាចចាប់ពីចំនួន ២០០ ទៅ ៣០០នាក់ គ្រោងនឹងចូលរួម។
ចលនាខ្មែរម្ចាស់ស្រុក នឹងធ្វើការបូកសរុបលទ្ធផលនៃកិច្ចប្រជុំរៀបចំជាអង្គការចាត់តាំងដើម្បីការពារប្រយោជន៍ជាតិខ្មែរតាមផ្លូវច្បាប់។
លោក ស៊ាន ម៉ាសាវ៉ាង ថ្លែងបន្ថែមដូច្នេះទៀតថា ៖ «លទ្ធផលមហាសន្និបាតនេះ ទីមួយ យើងធ្វើថាម៉េច ឲ្យបងប្អូនខ្មែរយើងមានជំហររឹងមាំ ក្នុងការការពារជនជាតិរបស់យើង ហើយទីពីរ នៅក្នុងមហាសន្និបាតទីពីរហ្នឹងដែរ យើងចង់ធ្វើយ៉ាងម៉េចឲ្យខ្មែរម្ចាស់ស្រុក ឲ្យទៅជាអង្គការមួយ ដែលមានការទទួលស្គាល់ដោយអន្តរជាតិ ពេលហ្នុងយើងអាចរៀបចំសំណុំរឿងនានា ដើម្បីទៅទាមទារ ការពារអធិបតេយ្យ ឯករាជភាព និងបូរណភាពទឹកដីខ្មែរ តាមច្បាប់អន្តរជាតិ»។
ចលនាខ្មែរម្ចាស់ស្រុកត្រូវបានបង្កើតឡើងតាំងពីថ្ងៃទី២២ ខែតុលា ឆ្នាំ២០០៦។
លោក ស៊ាន ម៉ាសាវ៉ាង បញ្ជាក់ថា មកដល់ពេលនេះ ចលនាខ្មែរម្ចាស់ស្រុកបង្កើតបានជាង ១០សាខាហើយ នៅតាមរដ្ឋមួយចំនួននៅទូទាំងសហរដ្ឋអាមេរិក នៅប្រទេសបារាំង អូស្រ្ដាលី និងនៅប្រទេសមួយចំនួនទៀត ក្នុងទ្វីបអឺរ៉ុប ដោយមានសមាជិកសរុបជាង ១ម៉ឺននាក់៕