អាជ្ញាធរខេត្តកោះកុងបាននាំយករបាំជូនពរទៅសម្ដែងក្នុងស្រុកក្លងយ៉ៃ ខេត្តត្រាត ប្រទេសថៃ នៅថ្ងៃសុក្រ ទី១៣ មេសា ជាថ្ងៃចូលឆ្នាំដំបូង។
ស្រុកក្លងយ៉ៃថៃ មានព្រំប្រទល់ជាប់នឹងស្រុកមណ្ឌលសីមា ខេត្តកោះកុង ប្រទេសកម្ពុជា។
ប្រធានមន្ទីរវប្បធម៌ និងវិចិត្រសិល្បៈខេត្តកោះកុង លោក អ៊ុក នឿន បានឲ្យដឹងនៅថ្ងៃទី១៣ មេសា ថា ការបញ្ចូនរបាំជូនពររបស់ខ្មែរទៅសម្ដែងនៅប្រទេសថៃនេះ គឺធ្វើឡើងតាមសំណើរបស់ថៃ ៖ «ស្រុកក្លងយ៉ៃ និងស្រុកមណ្ឌលសីមាគេសហការគ្នាគេធ្វើបុណ្យ គេអញ្ជើញយើងឲ្យចូលរួម ខេត្តគេឲ្យក្រុមយើងជាអ្នករករបាំស្រុកអត់មានរបាំចុះគេឲ្យយើងជួយយកសិស្សៗ មួយរបាំជួយរាំគេ»។
លោកបន្តថា ក្រុមសិល្បករថៃក៏បានមកសម្ដែងជាមួយក្រុមសិល្បករខ្មែរក្នុងស្រុកមណ្ឌលសីមា ប្រទេសកម្ពុជាដែរ នៅក្នុងពិធីចូលឆ្នាំថ្មីចំនួនបីថ្ងៃនេះ។ ប៉ុន្តែកម្មវិធីនេះរៀបចំឡើងដោយក្រុមហ៊ុនឯកជន ក្នុងបរិវេណការស៊ីណូខេត្តកោះកុង ជាប់នឹងច្រកចាំយាម និងច្រកហាកលេកប្រទេសថៃ។
អភិបាលខេត្តកោះកុង លោក ប៊ុន ល៉ើត មានប្រសាសន៍ថា ការផ្លាស់ប្ដូរក្រុមសិល្បៈគ្នានេះ គឺដើម្បីរឹតចំណងសាមគ្គីភាពរវាងប្រទេសជិតខាងគ្នា និងដើម្បីអបអរសាទរពិធីបុណ្យចូលឆ្នាំថ្មី ដែលប្រទេសទាំងពីរបានប្រារព្ធឡើងស្របពេលគ្នាតែមួយ ៖ «ចូលឆ្នាំប្រពៃណីខ្មែរក៏ដោយ ថៃក៏ដោយ ជួនកាលគេអញ្ជើញយើង ជួនយើងអញ្ជើញគេផ្លាស់ប្ដូរគ្នា»។
អនុប្រធានការិយាល័យសិល្បៈនៃមន្ទីរវប្បធម៌ និងវិចិត្រសិល្បៈខេត្តកោះកុង អ្នកស្រី ធូរ វលក្ខណ៍។ អ្នកស្រីបានឲ្យដឹងនៅថ្ងៃសុក្រ ទី១៣ មេសា ថា នៅក្នុងការសម្ដែងសិល្បៈចម្រុះក្នុងបរិវេណការស៊ីណូ ឬមជ្ឈមណ្ឌលកម្សាន្តដ៏ធំជាងគេនៅខេត្តកោះកុងនោះ។ ក្រុមសិល្បៈនៅខេត្តកោះកុងបានលើកយករបាំប្រពៃណី និងបុរាណជាច្រើន ជាពិសេសរបាំដែលតំណាងឲ្យអត្តសញ្ញាណនៃខេត្តនេះមកសម្ដែងឲ្យភ្ញៀវទេសចរណ៍ទស្សនា ៖ «ច្រើនណាស់ វាមាន ១៥របាំ វាមានជូនពរ ត្រឡោក នេសាទ គែន របាំខ្វារក្ដាមដែលខេត្តខ្ញុំផលិតខ្លួនឯង ព័ទ្ធរុង និងដេញក្រពើចាប់ត្រីនៅខេត្តកោះកុងបីរបាំហ្នឹង»។
ក្រៅពីក្រុមសិល្បៈនៅខេត្តកោះកុង ក៏មានក្រុមសិល្បៈមកពីភ្នំពេញ និងប្រទេសថៃចូលរួមសម្តែងជាលក្ខណៈមិត្តភាពក្នុងពិធីអបអរឆ្នាំថ្មី ឆ្នាំរោង ឆ្នាំ២០១២ នេះដែរ។
នៅម្តុំផ្សារដងទង់ ជាទីប្រជុំជននៃក្រុងខេមរភូមិន្ទ ខេត្តកោះកុង នាថ្ងៃចូលឆ្នាំទីមួយ មានសភាពស្ងាត់ជាងថ្ងៃធម្មតា និងពុំមានអ្នកភូមិនាំគ្នាលេងល្បែងប្រជាប្រិយខ្មែរដូចជាបោះអង្កុញ ចោលឈូង ឬលេងលាក់កន្សែងនោះឡើយ។ ផ្ទុយទៅវិញ នៅតាមផ្លូវទៅទីអារាមខ្លះ ឃើញមានក្រុមយុវជនមួយចំនួនលេងកុបទឹក និងប៉ាតម្សៅ។ អ្នកចាស់ទុំនៅខេត្តនេះអះអាងថា ក្មេងៗលេងបែបនេះគឺចម្លងយកមកពីទំនៀមទម្លាប់របស់ថៃ។
នៅក្នុងរយៈពេល ៤ថ្ងៃ ក្នុងឱកាសបុណ្យចូលឆ្នាំខ្មែរ គឺពីថ្ងៃទី១២ ដល់ថ្ងៃទី១៥ មេសា អាជ្ញាធរខេត្ត និងមន្ត្រីច្រកទ្វារចាំយាមព្រំដែនកម្ពុជា-ថៃ បានបន្ថែមម៉ោងឆ្លងកាត់តំបន់នេះ ដោយចាប់បើកឲ្យប្រជាពលរដ្ឋនៃប្រទេសទាំងពីរ និងភ្ញៀវទេសចរណ៍ដទៃទៀតចេញចូលចាប់ពីម៉ោង ៧ព្រឹក រហូតដល់ម៉ោង ១២យប់ ដើម្បីបង្កលក្ខណៈឲ្យប្រជាពលរដ្ឋសប្បាយរីករាយនៅថ្ងៃចូលឆ្នាំថ្មីនេះ៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។