យោងតាមបណ្ដាញព័ត៌មានវៀតណាម Saigon តំណាងពីប្រទេសកម្ពុជា លាវ និងវៀតណាមបានជួបជុំគ្នានៅក្នុងទីក្រុងហាណូយ ប្រទេសវៀតណាម កាលពីថ្ងៃសៅរ៍ ទី៥ មីនា ដើម្បីពិភាក្សាគ្នាលើកិច្ចព្រមព្រៀងមួយ ដើម្បីរៀបចំបង្កើតគេហទំព័រ វេបសាយ រួមមួយនេះឡើង។
កិច្ចពិភាក្សាគ្នានោះ បានផ្ដោតលើការចាត់ចែងការគ្រប់គ្រង ការត្រួតពិនិត្យព័ត៌មាន និងនីតិវិធីកែសម្រួលព័ត៌មាន និងការបញ្ចូលទិន្នន័យទៅក្នុងគេហទំព័រ វេបសាយ រួមគ្នានោះ។
គេហទំព័ររួមគ្នានេះនៃប្រទេសទាំងបីនៃជ្រោយឥណ្ឌូចិននេះ ផ្ដួចផ្ដើមឡើងដោយក្រសួងផែនការ និងវិនិយោគទុននៃប្រទេសវៀតណាម។
យោងតាមប្រភពដដែលខាងលើ ចុះថ្ងៃទី៦ មីនា ម្សិលមិញនេះ បានបន្តទៀតថា ក្នុងកិច្ចព្រមព្រៀងបានបញ្ជាក់ថា ព័ត៌មានដែលចុះផ្សាយក្នុងគេហទំព័ររួមគ្នានេះ ត្រូវស្របតាមវិធានរបស់គេហទំព័រ និងច្បាប់របស់ប្រទេសនីមួយៗ។ ហើយព័ត៌មានដែលចុះផ្សាយនឹងមិនប៉ះពាល់ដល់ឯករាជ្យភាព អធិបតេយ្យភាព និងបូរណភាពទឹកដីនៃប្រទេសនីមួយៗ នៃប្រទេសទាំងបី គឺវៀតណាម កម្ពុជា និងលាវឡើយ។
តំបន់អភិវឌ្ឍត្រីកោណនៃប្រទេសកម្ពុជា វៀតណាម និងលាវ មានខេត្តទាំងអស់ចំនួន១៣។ ខេត្តមកពីប្រទេសកម្ពុជាមានចំនួនបួន គឺខេត្តស្ទឹងត្រែង រតនគិរី មណ្ឌលគិរី និងក្រចេះ។ ចំណែកខេត្តពីប្រទេសវៀតណាមមានចំនួន៥ គឺខេត្តកន់ទុម ចាឡាយ ដាក់ឡាក់ ដាក់ណុង និងបីញផឿក។ ចំណែកឯខេត្តពីប្រទេសលាវវិញមានចំនួន៤ គឺមានខេត្តសេកុង អាតាពូ សារ៉ាវ៉ាន៉ និងចំប៉ាសាក់។
គេហទំព័រវេបសាយដែលកំពុងបង្ហោះសាកល្បងរបស់តំបន់ត្រីកោណនោះ មានជាភាសាអង់គ្លេស វៀតណាម ខ្មែរ និងលាវ ដែលមានអាសយដ្ឋាន clv-triangle.vn៕