ក្រសួងការបរទេសកម្ពុជា នៅថ្ងៃទី២១ ខែកុម្ភៈ បានសំដែងការស្វាគមន៍ចំពោះជំហររបស់ភាគីថៃ ដែលទទួលយកអ្នកសង្កេតការណ៍របស់អាស៊ាន ដើម្បីត្រួតពិនិត្យមើលបទឈប់បាញ់គ្នា នៅតាមបណ្ដោយព្រំដែន រវាងកម្ពុជា និងថៃ ក្រោយពីក្រុមប្រឹក្សាសន្តិសុខរបស់អង្គការសហប្រជាជាតិ ដែលបានសម្រេចកាលពីថ្ងៃទី១៤ ខែកុម្ភៈ កន្លងទៅនេះ នៅក្នុងទីក្រុងញីវយ៉ក សហរដ្ឋអាមេរិក។
ការស្វាគមន៍នេះ គឺនៅមុនពេលកិច្ចប្រជុំថ្នាក់រដ្ឋមន្ត្រីការបរទេសអាស៊ាន ដែលមានប្រទេសចំនួន១០ ជាសមាជិក ជួបប្រជុំនៅក្នុងទីក្រុងហ្សាកាតា (Jakarta) ប្រទេសឥណ្ឌូណេស៊ី នៅថ្ងៃទី២២ ខែកុម្ភៈ ក្នុងវេនប្រទេសឥណ្ឌូណេស៊ីជាប្រធានអាស៊ាន។
រដ្ឋមន្ត្រីក្រសួងការបរទេសកម្ពុជា លោក ហោ ណាំហុង និងជាឧបនាយករដ្ឋមន្ត្រី បានមានប្រសាសន៍នៅក្នុងសន្និសីទកាសែត នៅថ្ងៃទី២១ ខែកុម្ភៈ នៅឯអាកាសយានដ្ឋានអន្តរជាតិភ្នំពេញ នៅមុនកិច្ចប្រជុំនោះចាប់ផ្ដើមថាជំហររបស់ភាគីថៃ គឺជាអ្វីដែលកម្ពុជាចង់បាន ៖ "ខ្ញុំអាចនិយាយថា នេះជាលទ្ធផលនៃការប្ដឹងរបស់យើងទៅក្រុមប្រឹក្សាសន្តិសុខដែរ។ ពីព្រោះនៅក្នុងសន្ទរកថារបស់ខ្ញុំ នៅក្នុងក្រុមប្រឹក្សាសន្តិសុខ ខ្ញុំបានស្នើឲ្យមានអ្នកសង្កេតការណ៍នៅព្រំដែន ដើម្បីមើលការឈប់បាញ់។ មើលអ្នកណាឈ្លានពានអ្នកណា ដោយសារតែភាគីទាំងពីរចេះតែចោទគ្នាទៅវិញទៅមក។ ថៃថាកម្ពុជាឈ្លានពានថៃ ថៃថាកម្ពុជាឈ្លានពាន ដូច្នេះចាំបាច់ត្រូវតែមានអ្នកសង្កេតការណ៍។ ខ្ញុំបានស្នើទៅអង្គការសហប្រជាជាតិ ឥឡូវថៃយល់ព្រមលើបញ្ហានេះ គឺជាការសំខាន់មួយ សម្រាប់ការប្រជុំនៅហ្សាកាតា"។
កាសែតថៃឈ្មោះបាងកកប៉ុស្តិ៍ ចេញផ្សាយនៅថ្ងៃទី២១ ខែកុម្ភៈ បានដកស្រង់សំដីរបស់រដ្ឋមន្ត្រីក្រសួងការបរទេសថៃ លោក កាស៊ីត ភិរម្យ (Kasit Piromya) មានប្រសាសន៍ថា ប្រទេសថៃត្រៀមខ្លួនដើម្បីអនុញ្ញាតឲ្យអាស៊ានដើរតួជាអ្នកសម្របសម្រួលក្នុងការចរចារវាងកម្ពុជា និងថៃ។
លោក កាស៊ីត ភិរម្យ បានបន្តថា អ្នកសង្កេតការណ៍គប្បីស្ថិតនៅជាមួយកងទ័ពថៃ នៅលើទឹកដីថៃ ដើម្បីមើលថា ប្រទេសថៃមិនមែនជាអ្នកបង្កហិង្សាទេ។
អ្នកវិភាគនយោបាយនៅក្នុងប្រទេសកម្ពុជា លោកបណ្ឌិត សុខ ទូច បានមានប្រសាសន៍ថា ជំហររបស់ថៃ គឺជាអ្វីដែលអន្តរជាតិចង់បាន ដូចកម្ពុជាផងដែរ ៖ "យើងដឹងហើយថា ថៃអត់ជម្រើសទេ ពីព្រោះថ្មីៗនេះ សហគមន៍អឺរ៉ុប សភាអឺរ៉ុប គេបានរុញឲ្យថៃមកអង្គុយជិត ដោយយកគោលការណ៍តុលាការក្រុងឡាអេ ឆ្នាំ១៩៦២។ យើងឃើញហើយ ទោះបីជាត្រួតពិនិត្យនៅក្នុងតំបន់ណាក៏ដោយ សំខាន់ឲ្យឈប់បាញ់គ្នា។ កាលណាឈប់បាញ់គ្នា ទើបយើងមានដំណោះស្រាយ"។
នៅមុនការចាកចេញទៅចូលរួមក្នុងកិច្ចប្រជុំនៅក្នុងប្រទេសឥណ្ឌូណេស៊ី លោក ហោ ណាំហុង បានបញ្ជាក់ថា កម្ពុជាមិនមានការប្រែប្រួលទេក្នុងការចង់ឲ្យភាគីថៃចុះហត្ថលេខាលើកិច្ចព្រមព្រៀងឈប់បាញ់ជាស្ថាពរ និងជាអចិន្ត្រៃយ៍ ដែលមាន ៤ចំណុចនោះ ដែលបានប្រកាសដោយលោកនាយករដ្ឋមន្ត្រី ហ៊ុន សែន កាលពីថ្ងៃទី១៧ ខែកុម្ភៈ កន្លងទៅនេះ។
ប៉ុន្តែកាសែតថៃឈ្មោះបាងកកប៉ុស្តិ៍ បានដកស្រង់សំដីរបស់នាយករដ្ឋមន្ត្រីថៃ លោក អាភីស៊ិត វេតឆាឈីវ៉ាក់ (Abhisit Vejjajiva) បានមានប្រសាសន៍ថា កិច្ចព្រមព្រៀងឈប់បាញ់ជាអចិន្ត្រៃយ៍នោះ មិនចាំបាច់ទេ៕