ជនចំណាកស្រុកខ្មែរ ទៅស្រុកថៃ បានថ្លែងនៅថ្ងៃទី១២ ខែតុលា ថា មានប្រជាពលរដ្ឋខ្មែរជាច្រើនរយនាក់ បានធ្វើដំណើរឆ្លងកាត់ច្រកព្រំដែនផ្សារព្រំ ពីខេត្តប៉ៃលិន ចូលក្នុងទឹកដីខេត្តចាន់បូរី ប្រទេសថៃ បន្ទាប់មក អ្នកខ្លះបានបន្តដំណើរទៅកាន់ខេត្តក្រុងនានាផ្សេងគ្នា ទៅតាមគោលដៅដែលពួកគេត្រូវទៅ និងអ្នកខ្លះទៀតតាមរយៈមេខ្យល់ជាអ្នកដឹកនាំផ្លូវ៖ «ច្រើនបង ភាគច្រើនចេញតាមច្រកប៉ៃលិន។ ថ្ងៃ ខ្ញុំចេញចូលប្រហែលជា១០០នាក់ ព្រោះអីច្រកប៉ៃលិន អត់មានអ្នកណាត្រួតអីទេ។ ចូលផ្សារផុតទៅ ចេញពីផ្សារវិញ លួចមកយកឥវ៉ាន់តាមក្រោយ។ យើងវាអត់ ហើយធ្វើម៉េចរកព្រឹកខ្វះល្ងាច រកល្ងាចខ្វះព្រឹក នៅខាងទឹកដីខ្មែរ»។
ក្នុងរយៈពេលកន្លងទៅ នៅខាងមុខច្រកផ្សារព្រំ ក្នុងខេត្តប៉ៃលិន មានការកកស្ទះ ដោយសារមានចំនួនប្រជាពលរដ្ឋខ្មែរច្រើន នាំគ្នារង់ចាំឆ្លងកាត់ចូលទៅធ្វើការងារក្នុងប្រទេសថៃ។ អាជ្ញាធរខេត្តប៉ៃលិន បានឲ្យដឹងថា ពិតជាមានប្រជាពលរដ្ឋខ្មែរច្រើនរយនាក់ នាំគ្នាឆ្លងកាត់ខេត្តប៉ៃលិន ដូច្នេះមែន ប៉ុន្តែសមាសភាពនៃប្រជាពលករខ្មែរទាំងនោះ ភាគច្រើនបានធ្វើដំណើរឆ្លងកាត់តាមរយៈក្រុមហ៊ុន ខ្លះទៀតត្រូវគេសង្ស័យថាតាមរយៈមេខ្យល់ និងមួយចំនួនទៀត ចូលទៅដោយខ្លួនឯង។
អភិបាលខេត្តប៉ៃលិន លោក អ៊ី ឈាន បានមានប្រសាសន៍ថា ក្នុងរយៈពេលកន្លងទៅនេះ មានរឿងពីរទាក់ទិនទៅនឹងលំហូរប្រជាពលករខ្មែរឆ្លងកាត់ខេត្តប៉ៃលិន ចូលទៅក្នុងប្រទេសថៃ តាមច្រកផ្សារព្រំ។ រឿងទី១ មានប្រជាពលរដ្ឋចំណាកស្រុកមកពីខេត្តផ្សេងគ្នា ទៅស៊ីឈ្នួលគេ។ ប៉ុន្តែ រឿងទី២ អាជ្ញាធរមានការលំបាក ព្រោះកន្លងទៅជិតរដូវបោះឆ្នោត ប្រជាជនចេះតែធ្វើចំណាកស្រុក៖ «ប៉ុន្តែយើងខ្ញុំឃាត់បីទៅបួន ហើយមកបីបួនរយនាក់ ប៉ុន្តែ យើងទៅឃើញក្រដាសក្រុមហ៊ុន មានលិខិតអនុញ្ញាតពីក្រសួង អាជ្ញាធរដែនដី មានការលំបាក ដែលជួនកាលបើធ្វើមិនស្រួលទេ ប៉ះពាល់ដល់ការអនុវត្តរបស់ក្រសួង របស់រាជរដ្ឋាភិបាលទៀត»។
ទោះយ៉ាងណា អាជ្ញាធរខេត្តមិនបានបញ្ជាក់ពីឈ្មោះរបស់ក្រុមហ៊ុន ដែលបាននាំពលករខ្មែរឆ្លងកាត់ច្រកផ្សាព្រំ ក្នុងទឹកដីខេត្តប៉ៃលិន នោះទេ។ លោក អ៊ី ឈាន បានបញ្ជាក់ថា លោកបានណែនាំគ្រប់ស្ថាប័នជំនាញពាក់ព័ន្ធទាំងអស់ ឲ្យរួមគ្នាទប់ស្កាត់លំហូរចំណាកស្រុករបស់ប្រជាពលរដ្ឋ ចូលទៅក្នុងប្រទេសថៃ ដោយខុសច្បាប់ ប៉ុន្តែប្រជាពលករទៅតាមរយៈក្រុមហ៊ុននោះ អាជ្ញាធរមិនអាចទប់ស្កាត់បានទេ៖ «ខ្ញុំយល់ថា បើយើងឯកភាពគ្នានិយាយអំពីគោលការណ៍ទប់ស្កាត់អី យើងធ្វើបាន ធ្វើម៉េច ទូទាំងប្រទេស យើងឯកភាពគ្នាឲ្យទប់ស្កាត់ ជាពិសេសក្រុមហ៊ុនដែលមានការអនុញ្ញាតពីក្រសួងមហាផ្ទៃ ពីក្រសួងផ្សេងៗ រួមគ្នាទប់ស្កាត់ ខ្ញុំឃើញថា ទប់ស្កាត់បាន ប៉ុន្តែបើឲ្យអាជ្ញាធរដែនដីទទួល ពិបាកណាស់»។
លោកទទួលស្គាល់ថា ប្រជាពលរដ្ឋខ្មែរក្រៅពីទៅតាមរយៈក្រុមហ៊ុន ក៏មានការលួចឆ្លងចូលដោយខុសច្បាប់ដូចគ្នាដែរ ប៉ុន្តែពួកគេមកពីបណ្ដាខេត្តផ្សេងៗ មិនមែនពលរដ្ឋរស់នៅក្នុងខេត្តប៉ៃលិន ទេ។
បច្ចុប្បន្ន មានប្រជាពលរដ្ឋខ្មែរចំនួន ៧ពាន់នាក់ កំពុងស៊ីឈ្នួលឲ្យថៃ នៅក្នុងខេត្តចាន់បូរី និងខេត្តរ៉ាក់យ៉ង។ លោកបញ្ជាក់ថា មានក្រុមហ៊ុនថៃ ខ្លះ បានបោកប្រាស់កម្លាំងពលរដ្ឋខ្មែរ ដែលឆ្លងដែនខុសច្បាប់។ មានករណីផ្សេងមួយទៀត គឺកម្មករខ្មែរចំនួន ២៩៦នាក់ បានធ្វើការនៅទីលានវាយកូនហ្គោលមួយ នៅក្រុងប៉ាតយ៉ា ប្រទេសថៃ ដោយសន្យាថាផ្ដល់ប្រាក់ខែក្នុងមួយខែ ៥ពាន់បាត ស្មើជាង ៧០ម៉ឺនប្រាក់រៀល ប៉ុន្តែធ្វើបានរយៈពេលជិតមួយឆ្នាំ ថៅកែក្រុមហ៊ុនអត់បើកលុយឲ្យ ហើយថែមទាំងប្ដឹងប៉ូលិសថៃ អោយចាប់ខ្លួនទាំងអស់ ដោយចោទថា ជាជនអន្តោប្រវេសន៍ខុសច្បាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។