ប្រធានសង្ឃសហព័ន្ធខ្មែរកម្ពុជាក្រោម ព្រះអង្គ លី ពៅ បានមានថេរដីកាពីប្រទេសអូស្ត្រាលីមកថា ការជួបជុំគ្នានៅថ្ងៃសៅរ៍នេះ បង្ហាញអំពីភាពទុក្ខសោករបស់ខ្មែរក្រោមនៅក្រោមនឹមអាណានិគមវៀតណាមនេះ គឺក្នុងឱកាសចូលរួមពិធីរំឭកខួបទី៦០នៃទិវាសិទ្ធិមនុស្សអន្តរជាតិ។
ព្រះតេជគុណ លី ពៅ មានថេរដីកាដូច្នេះថា ៖ «គណៈប្រតិភូដែលនិមន្តនិងអញ្ជើញមកពីគ្រប់ទិសទីទាំងអស់ គេនិយាយផ្សព្វផ្សាយអំពីការជិះជាន់របស់កុម្មុយនីស្តវៀតណាមដែលបានជិះជាន់លើខ្មែរកម្ពុជាក្រោមជាយូរយារណាស់មកហើយ រាប់សតវត្សរ៍មកហើយ។ ខ្មែរកម្ពុជាក្រោម ដូចយើងដឹងស្រាប់ហើយ មានការរងទុក្ខវេទនា។ សព្វថ្ងៃ ដោយសារមានព្រះពុទ្ធ ព្រះធម៌ ព្រះសង្ឃ វត្តអារាមទេ បាននៅឈ្មោះកម្ពុជាក្រោមហ្នឹងឯង ប៉ុន្តែការគ្រប់គ្រងគឺដោយកុម្មុយនីស្តវៀតណាម ហើយដោយសារបងប្អូនខ្មែរកម្ពុជាក្រោមដែលនៅឯប្រទេសក្រៅដូចជានៅសហរដ្ឋអាមេរិក នៅកាណាដា នៅបារាំង នៅ New Zealand នៅអូស្ត្រាលី ជាដើម ដែលផ្ដុំគ្នាធ្វើហ្នឹងដើម្បីសម្ដែងទុក្ខសោកនិងសោកនាដកម្មរបស់ខ្មែរកម្ពុជាក្រោមបង្ហាញឲ្យអង្គការសហប្រជាជាតិ ឲ្យអន្តរជាតិ ភ្ញៀវជាតិនិងភ្ញៀវអន្តរជាតិបានឃើញថា កុម្មុយនីស្តយួនធ្វើបាបខ្មែរយ៉ាងណាខ្លះ»។
ប្រវត្តិសាស្ត្របានលាតត្រដាងថា ទឹកដីខ្មែរកម្ពុជាក្រោមត្រូវអតីតអាណានិគមនិយមបារាំង បានកាត់ចេញពីដីខ្មែរប្រគល់ជាផ្លូវការទៅឲ្យវៀតណាមកាន់កាប់នៅថ្ងៃទី៤ មិថុនា ឆ្នាំ១៩៤៩។
សហព័ន្ធខ្មែរកម្ពុជាក្រោមដែលកំពុងតស៊ូទាមទារយកដីរបស់ខ្លួនមកគ្រប់គ្រងកាន់កាប់វិញតាមរយៈមធ្យោបាយតវ៉ាតាមផ្លូវច្បាប់ សង្ឃឹមថា ពិធីបង្ហាញអំពីភាពទុក្ខសោកខ្មែរក្រោម តាមរយៈពិធីជួបជុំជាអន្តរជាតិនានា នឹងអាចញ៉ាំងឲ្យពិភពលោកជួយសើរើដើម្បីទាមទារយកទឹកដីកម្ពុជាក្រោមនោះបានមកវិញ៕