ក្រុមខ្មែរក្រោមនៅកម្ពុជាទាមទារឲ្យវៀតណាមផ្ដល់សំណងដល់ខ្មែរក្រោមដែលបាត់បង់ដីស្រែ
ដោយ សុខ សេរី
2009-09-15
អង្គការនិងសមាគមខ្មែរកម្ពុជាក្រោមនៅកម្ពុជាបានធ្វើញត្តិទាមទារឲ្យរដ្ឋាភិបាលវៀតណាមផ្ដល់សំណងដល់ខ្មែរក្រោមជាច្រើនគ្រួសារដែលបាត់បង់ដីស្រែដោយសារការជីកព្រែករបស់វៀតណាម។
ព្រះសង្ឃពុទ្ធសាសនាខ្មែរកម្ពុជាក្រោមច្រូតស្រូវនៅក្នុងទឹកដីកម្ពុជាក្រោម (ក្នុងប្រទេសវៀតណាម)។
អង្គការនិងសមាគមខែ្មរកម្ពុជាក្រោមចំនួន៩នៅកម្ពុជា បានសរសេរលិខិតលើញតិ្តរួមគ្នាមួយផ្ញើជូនមេដឹកនាំនៃរដ្ឋាភិបាលនិងសភាវៀតណាម ព្រមទាំងអគ្គលេខាធិការមជ្ឈិមបក្សកុម្មុយនីស្តវៀតណាម តាមរយៈស្ថានទូតវៀតណាមនៅក្នុងប្រទេសកម្ពុជាដើម្បីសុំឲ្យកិច្ចអន្តរាគមន៍ផ្តល់សំណងនៃការបាត់បង់ដីស្រែកសិកម្ម ជូនប្រជាពលរដ្ឋខែ្មរកម្ពុជាក្រោមជាង៤០០គ្រួសារ នៅក្នុងស្រុកទិនបៀង ខេត្តអានយ៉ាង ឬខេត្តមាត់ជ្រូក ទឹកដីខ្មែរកម្ពុជាក្រោម ដែលកំពុងកាន់កាប់ដោយអាជ្ញាធរវៀតណាម ដោយសារផែនការជីកព្រែកកន្លងមកនេះ។
យោងតាមលិខិតដែលវិទ្យុអាស៊ីសេរីទទួលបានលិខិតនោះ បាននិយាយថា ដើម្បីឲ្យស្ថានការណ៍នោះ មានសភាពល្អប្រសើរទ្បើងវិញនិងជៀសវាងការថ្កោលទោសពីសហគមន៍អន្តរជាតិចំពោះរដ្ឋាភិបាលវៀតណាមយើងខ្ញុំស្នើសុំយ៉ាងទទូចដល់ឯកឧត្តមថ្នាក់ដឹកនាំកំពូលនៃសាធារណរដ្ឋសង្គមនិយមវៀតណាមទាំងអស់ ជួយដោះស្រាយឲ្យបានសមស្របនូវតម្លៃដីស្រែជាក់សែ្តងទាំងអស់ ជូនប្រជាពលរដ្ឋរងគ្រោះជៀសវាងការរឹបយកដីធ្លីដោយគ្មានសំណងឬសង់ដោយតម្លៃទាបបំផុត។
លិខិតដដែលបានចុះថៃ្ងទី១១ ខែកញ្ញា គឺបានផ្ញើជូនលោក ងៀង តឹងយ៉ុង នាយករដ្ឋមន្រ្តីលោក ងៀង មិនត្រៀក ប្រមុខរដ្ឋាភិបាលលោក ងៀង ភូត្រុង ប្រធានសភា និងលោក ណុង ឌឹកម៉ាញ់ អគ្គលេខាធិការនៃមជ្ឈិមបក្សកុម្មុយនីស្តវៀតណាម តាមរយៈលោក ង៉ូ អាន់យុង ជាឯកអគ្គរដ្ឋទូតនៃប្រទេសវៀតណាមនៅក្នុងប្រទេសកម្ពុជា។
លោក ថាច់ សេដ្ឋា ជាប្រធានសហគមន៍ខែ្មរកម្ពុជាក្រោមនៅក្នុងប្រទេសកម្ពុជានៅក្នុងអង្គការនិងសមាគមន៍ខែ្មរកម្ពុជាក្រោមចំនួន៩ បានផ្ញើញតិ្តរួមគ្នានោះ បានមានប្រសាសន៍ថា ៖ «យកដីស្រែគាត់ធ្វើប្រឡាយ ធ្វើព្រែកអ៊ីចឹងហើយ ដូច្នេះត្រូវតែគិតគូរដោះដូរធ្វើម៉េចឲ្យមានសំណងសមស្រប»។
មិនអាចទាក់ទងមន្ត្រីនៃស្ថានទូតវៀតណាមនៅក្នុងប្រទេសកម្ពុជាបានទេនៅថៃ្ងអង្គារ ទី១៥ ខែកញ្ញា ដើម្បីបញ្ជាក់ថា តើលិខិតឬញតិ្តរួមនោះ បានដល់ដៃស្ថានទូតវៀតណាមហើយឬយ៉ាងណា។
ស្រ្តីម្នាក់នៃស្ថានទូតវៀតណាមបានឆ្លើយជាភាសាខែ្មរថា លោកស្រីមិនបានដឹងទេ។
ប្រជាពលរដ្ឋខែ្មរកម្ពុជាក្រោមម្នាក់នៅក្នុងឃុំអាងគឺ ស្រុកទិនបៀង ខេត្តអានយ៉ាង ប្រទេសវៀតណាម ឬខេត្តមាត់ជ្រូកទឹកដីខែ្មរកម្ពុជាក្រោម បានថែ្លងប្រាប់តាមទូរស័ព្ទមកថា មេដឹកនាំកំពូលវៀតណាមក៏មានការខ្វល់ខ្វាយចំពោះបញ្ហានេះផងដែរ ប៉ុន្តែអាជ្ញាធរថ្នាក់ក្រោមមិនសូវអើពើទេ ៖ «ណុង ឌឹកម៉ាញ់ គេក្ដាប់រួម។ គាត់ស្រែកខ្លាំងដែរ គាត់ស្រែកតាមទូរទស្សន៍ ក៏ប៉ុន្តែថ្នាក់ក្រោមអត់អនុវត្តតាមគាត់។ ឥឡូវកំពុងមានបញ្ហាហ្នឹងខ្លាំងណាស់ (បាត់បង់ដីស្រែ)»។
សូមជម្រាបថា អាជ្ញាធរវៀតណាមនៅក្នុងស្រុកទិនបៀង ខេត្តអានយ៉ាង ឬខេត្តមាត់ជ្រូក ដីខ្មែរកម្ពុជាក្រោម ដែលកំពុងកាន់កាប់ដោយអាជ្ញាធរវៀតណាម បានដាក់កម្លាំងយោធានិងនគរបាលចំនួនប្រមាណ៨០០នាក់ និងសត្វឆ្កែប្រដេញផង កាលពីសប្តាហ៍កន្លងទៅថ្មីៗនេះ ដើម្បីត្រៀមបង្រ្កាបនិងចាប់ខ្លួនប្រជាពលរដ្ឋខែ្មរកម្ពុជាក្រោមណាដែលហ៊ានងើបតវ៉ាប្រឆាំងនឹងផែនការជីកព្រែកមួយខ្សែប្រវែង១០គីឡូម៉ែត្រ និងទទឹង ៥០ម៉ែត្រ ដែលនាំឲ្យប្រជាពលរដ្ឋខែ្មរកម្ពុជាក្រោមជាង ៤០០គ្រួសារ ប្រឈមមុខនឹងការបាត់បង់ដីស្រែកសិកម្មដោយគ្មានសំណងក្រោមផែនការជីកព្រែកនោះ៕
អត្ថបទដែលទាក់ទង
អាជ្ញាធរវៀតណាមគំរាមឲ្យខ្មែរក្រោមដកពាក្យបណ្ដឹងស្ដីពីបញ្ហាដីធ្លី
អតីតសង្ឃខ្មែរក្រោម ទឹម សាខន បានសិទ្ធិរស់នៅប្រទេសស៊ុយអែត
វៀតណាមដកកម្លាំងចេញពីកន្លែងមានបញ្ហាដីធ្លីជាមួយពលរដ្ឋខ្មែរក្រោម
អាជ្ញាធរវៀតណាមបន្ថែមកម្លាំងបង្ក្រាបអ្នកតវ៉ាខ្មែរក្រោម
អាជ្ញាធរវៀតណាមពង្រាយកម្លាំងត្រៀមបង្ក្រាបការតវ៉ារបស់កសិករខ្មែរក្រោម
មេដឹកនាំសហព័ន្ធខ្មែរក្រោមសរសើរយុទ្ធសាស្ត្ររដ្ឋាភិបាលខ្មែរចំពោះខ្មែរក្រោម
ខ្មែរក្រោមជាង៦០គ្រួសាររារាំងអាជ្ញាធរវៀតណាមមិនឲ្យជីកព្រែកលើដីស្រែ
ខ្មែរក្រោមជាង៤០០គ្រួសារគ្រោងធ្វើបាតុកម្មប្រឆាំងនឹងផែនការជីកព្រែក
មន្ត្រីខ្មែរក្រោមនិយាយអំពីអត្តសញ្ញាណប័ណ្ណសញ្ជាតិខ្មែរសម្រាប់ខ្មែរក្រោម
