អង្គការនិងសមាគមអ្នកកាសែតចំនួន ៨ នៅថៃ្ងទី១៧ ខែធ្នូនេះ បានសរសេរញត្តិរួមគ្នា ថ្វាយព្រះមហាត្សត្រខែ្មរ ព្រះបរមនាថ នរោត្តម សីហមុនី ដើម្បីសុំការប្រទានការលើកលែងទោសដល់លោក ហង្ស ចក្រា ចាងហ្វាងកាសែតខែ្មរម្ចាស់ស្រុក ដែលកំពុងតែជាប់នៅក្នុងគុកព្រៃស។
លោក ឃុន ង៉ោ អាយុ ៦៤ឆ្នាំ ជាប្រធានសហព័ន្ធអ្នកសារព័ត៌មានកម្ពុជានៅក្នុងចំណោមអង្គការនិងសមាគមអ្នកកាសែតចំនួន ៨នោះ បានមានប្រសាសន៍ប្រាប់វិទ្យុអាស៊ីសេរីថា លោកចង់ចូលរួមការគាំទ្រក្នុងនាមអាជីពដូចគ្នា។
លោក ឃុន ង៉ោ បានបញ្ជាក់ថា ៖ «ត្រង់គេបម្រើនយោបាយខាងណាៗ អាហ្នឹងជាសិទ្ធិរបស់គេ។ ជួយគ្នាទៅ ធ្វើម៉េចអាជីពដូចគ្នា!»។
ដោយទ្បែក លោក អ៊ូ ច័ន្ទឫទ្ធិ ជាតំណាងរាស្រ្តនៃគណបក្សសិទ្ធិមនុស្សរបស់លោក កឹម សុខា បានសរសេរញតិ្តផ្សេងមួយទៀតនៅថៃ្ងដដែលនេះថ្វាយព្រះមហាក្សត្រខ្មែរ ព្រះបរមនាថ នរោត្តម សីហមុនី សុំឲ្យព្រះអង្គប្រទានការលើកលែងទោសដល់អ្នកកាសែត ២នាក់ គឺលោក ហង្ស ចក្រា និងលោក រស់ សុឃិត ដែលកំពុងតែជាប់នៅក្នុងគុកព្រៃសនោះ។
លោកបានមានប្រសាសន៍បញ្ជាក់ថា ៖ «ព្រះមហាក្សត្រនៃព្រះរាជាណាចក្រកម្ពុជា លោកបានសន្ដោសលើកលែងទោសដល់ជនជាតិថៃម្នាក់។ ដូច្នេះខ្ញុំនឹកឃើញដល់អ្នកសារព័ត៌មានខ្មែរ ២រូបដែលកំពុងជាប់ពន្ធនាគារ ដូច្នេះខ្ញុំមានគំនិតមួយសរសេរលិខិតនេះដើម្បីស្នើសុំទៅព្រះមហាក្សត្រ សុំឲ្យលោកមេត្តាសន្តោសដល់អ្នកកាសែតទាំងពីរហ្នឹង»។
ប្រភពបានឲ្យដឹងថា ព្រះមហាក្សត្រអាចប្រទានការលើកលែងទោសទៅបាន លុះត្រាតែមានសំណើពីលោកនាយករដ្ឋមន្រ្តី។
មិនអាចទាក់ទងលោក ខៀវ កាញារីទ្ធ ជាមន្រ្តីអ្នកនាំពាក្យរបស់រដ្ឋាភិបាលកម្ពុជា និងជារដ្ឋមន្រ្តីក្រសួងព័ត៌មានបានទេជុំវិញការស្នើសុំខាងលើនេះ។
លោក ផៃ ស៊ីផាន មន្រ្តីអ្នកនាំពាក្យរបស់ទីស្តីការគណៈរដ្ឋមន្រ្តី បានមានប្រសាសន៍ថា សំណុំរឿងរបស់លោក ហង្ស ចក្រា និងលោក រស់ សុឃិត នោះ មិនដូចគ្នានឹងសំណុំរឿងរបស់វិស្វករថៃទេ។
ព្រះមហាក្សត្រខែ្មរ ព្រះបរមនាថ នរោត្តម សីហមុនី កាលពីថៃ្ងទី២៥ ខែសីហាកន្លងទៅ បានស្នើសុំលោក អង្គវង្ស វឌ្ឍានា ជារដ្ឋមន្រ្តីក្រសួងយុត្តិធម៌ ពិនិត្យមើលអំពីការលើកលែងទោសលោក ហង្ស ចក្រា ក្រោយពីព្រះអង្គបានទទួលញាតិ្តពីតំណាងអង្គការនិងសមាគមអ្នកកាសែតចំនួន ៨ខាងលើនេះរួចម្តងទៅហើយ។
សំណើដូចគ្នានេះ ព្រះមហាក្សត្របានផ្ញើជូនលោកនាយករដ្ឋមន្រ្តី ហ៊ុន សែន កាលពីថៃ្ងទី២៧ ខែតុលាកន្លងទៅនេះ ប៉ុន្តែគេគ្មានឃើញមានចំណាត់ការអ្វីទ្បើយ។
លោក ហង្ស ចក្រា ជាចាងហ្វាងកាសែតខែ្មរម្ចាស់ស្រុក ត្រូវបានតុលាការសាលាដំបូងរាជធានីភ្នំពេញ កាត់ទោសឲ្យជាប់គុកចំនួន ១២ខែ និងផាកពិន័យជាប្រាក់ចំនួន ៩លានរៀល កាលពីថៃ្ងទី២៦ ខែមិថុនាកន្លងទៅនេះ ក្រោមបទចោទថា លោកបានផ្សាយព័ត៌មានមិនពិតនិងបទបរិហារកេរ្តិ៍ ដោយសារតែលោកបានផ្សាយព័ត៌មានមួយចំនួនចោទប្រកាន់ថា លោកនាយករដ្ឋមន្រ្តី ហ៊ុន សែន បានបំបែកសំបុកមន្រ្តីអាក្រក់និងពុករលួយនៅជុំវិញលោក សុខ អាន ជាឧបនាយករដ្ឋមន្រ្តីនិងជារដ្ឋមន្រ្តីនៃទីស្តីការគណៈរដ្ឋមន្រ្តី និងអត្ថបទមួយចំនួនទៀត។
ចំណែកឯលោក រស់ សុឃិត អាយុ ៤០ឆ្នាំ ត្រូវបានតុលាការសាលាដំបូងរាជធានីភ្នំពេញ កាត់ទោសឲ្យជាប់គុកចំនួន ២ឆ្នាំ កាលពីថៃ្ងទី៦ ខែវិច្ឆិកាកន្លងទៅ ក្រោមបទចោទថា លោកបានផ្សព្វផ្សាយព័ត៌មានមិនពិត ដោយរូបលោកបានផ្ញើសារតាមទូរស័ព្ទដៃសាកសួរលោក សយ សុភាព អ្នកអត្ថាធិប្បាយនៃទូរទស្សន៍ CTN នោះ ជុំវិញការជំរិតទារប្រាក់និងពុករលួយ៕