ការអនុញ្ញាតនេះធ្វើឡើងក្រោយពីថ្នាក់ដឹកនាំសមាគមខ្មែរកម្ពុជាក្រោមចំនួន ៩ បានដាក់សំណើស្នើទៅក្រសួងព័ត៌មានជួយធ្វើអន្តរាគមន៍ទៅថ្នាក់ដឹកនាំវិទ្យុជាតិស្នើសុំមានម៉ោងផ្សាយកម្មវិធីរបស់ខ្មែរកម្ពុជាក្រោមនៅតាមវិទ្យុជាតិកន្លងមក។
លោក ថាច់ សេដ្ឋា បានឲ្យដឹងពីកម្មវិធីអប់រំដែលសមាគមខ្មែរកម្ពុជាក្រោម គ្រោងលើកយកទៅធ្វើការផ្សព្វផ្សាយនៅតាមវិទ្យុជាតិដូច្នេះ ៖ «ផ្សព្វផ្សាយពីខ្មែរក្រោមយើងនៅខាងក្រោម ឲ្យបងប្អូនប្រជារាស្ត្រលោកបានដឹងថា នៅខាងក្រោមមានប្រជាពលរដ្ឋខ្មែរមានការគោរពទំនៀមទម្លាប់ ព្រះពុទ្ធសាសនា និងអំពីប្រវត្តិសាស្ត្រ ជាដើម ដើម្បីឲ្យបងប្អូនយើងបានជ្រួតជ្រាបអំពីសហគមន៍ខ្មែរក្រោមយើងនៅលើទឹកដីកំណើតរបស់យើង»។
ទោះយ៉ាងនេះក្តី លោក សេដ្ឋា នៅមិនទាន់រំពឹងថា ថ្នាក់ដឹកនាំវិទ្យុជាតិនឹងអនុញ្ញាតដល់សមាគមបានផ្សព្វផ្សាយកម្មវិធីអប់រំទាក់ទងនឹងខ្មែរកម្ពុជាក្រោមនៅតាមវិទ្យុជាតិនៅឡើយទេ ព្រោះសមាគមកំពុងបង្កើតគណៈកម្មការដើម្បីធ្វើទំនាក់ទំនងជាមួយវិទ្យុជាតិប៉ុណ្ណោះ។
វិទ្យុអាស៊ីសេរីមិនអាចទាក់ទងលោក ខៀវ កាញារីទ្ធ រដ្ឋមន្ត្រីក្រសួងព័ត៌មានបានទេតាមទូរស័ព្ទនៅថ្ងៃទី១៤ ខែកុម្ភៈនេះ ជុំវិញសំណើមានម៉ោងផ្សាយនៅតាមវិទ្យុជាតិរបស់សមាគមខ្មែរកម្ពុជាក្រោម ដោយទូរស័ព្ទរោទ៍ជាច្រើនដង ប៉ុន្តែលោកមិនលើកទទួល។
លោក តន់ យ៉ាន ប្រតិភូរាជរដ្ឋាភិបាលទទួលបន្ទុកអគ្គនាយកដ្ឋានវិទ្យុជាតិ មានប្រសាសន៍ថា រហូតមកដល់ពេលនេះលោកមិនទាន់បានទទួលលិខិតអន្តរាគមន៍ពីលោករដ្ឋមន្ត្រីក្រសួងព័ត៌មានជុំវិញសំណើសុំមានម៉ោងផ្សាយរបស់សមាគមខ្មែរកម្ពុជានៅឡើយទេ។
លោក តន់ យ៉ាន បានបញ្ជាក់ថា ៖ «ខ្ញុំមិនទាន់បានទទួលដំណឹងពីឯកឧត្ដមផង ឥឡូវខ្ញុំកំពុងតែចាំស្រាវជ្រាវមើលណា៎!»។
ប្រធានសាខាសហព័ន្ធខ្មែរកម្ពុជាក្រោមពិភពលោកប្រចាំប្រទេសកម្ពុជា លោក តាំង សារៈ មានប្រសាសន៍ថា ៖ «យ៉ាងហោចណាស់ក៏មានឱកាសនឹងផ្សាយពីសកម្មភាពខ្លះរបស់ប្រធានសមាគមរបស់ខ្មែរក្រោម ហើយនិងពាក់ព័ន្ធដល់ប្រវត្តិសាស្ត្រ ភូមិសាស្ត្រអីខ្លះៗដែរ ហើយនិងប្រពៃណីទំនៀមទម្លាប់របស់ខ្មែរក្រោម»។
លោក ថាច់ សេដ្ឋា ប្រធានសមាគមខ្មែរកម្ពុជាក្រោម មានប្រសាសន៍ថា កម្មវិធីអប់រំដែលសមាគមខ្មែរក្រោមគ្រោងនឹងលើកយកមកផ្សព្វផ្សាយនៅតាមវិទ្យុជាតិមានឈ្មោះថា សំឡេងខ្មែរកម្ពុជាក្រោម។ លោករំពឹងទៀតថា គេនឹងលើកយកបញ្ហាការរស់នៅនិងការប្រឈមមុខប្រចាំថ្ងៃរបស់ប្រជាពលរដ្ឋនៅកម្ពុជាក្រោម ដែលជាទឹកដីកំពុងតែកាន់កាប់ដោយវៀតណាមមកផ្សព្វផ្សាយផងដែរ លើរលកធាតុអាកាសវិទ្យុជាតិ AM 815KHz និងវិទ្យុជាតិ FM 96MHz ផ្សាយចេញពីរាជធានីភ្នំពេញនោះ៕