ប្រជាពលរដ្ឋចំនួន៣៥គ្រួសារមកពីឃុំជីខក្រោម ស្រុកស្រែអំបិល ខេត្តកោះកុង នៅថៃ្ងពុធ ទី៣ កុម្ភៈនេះ បានសម្ដែងការតវ៉ាដោយស្ងាត់ស្ងៀមនៅខាងមុខតុលាការកំពូល ក្នុងរាជធានីភ្នំពេញ ដើម្បីទាមទារឲ្យតុលាការនេះសើរើនិងបើកការជម្រះក្តីជាថ្មីលើសំណុំរឿងដីធ្លីដែលពួកគាត់បានចោទប្រកាន់ថា ក្រុមហ៊ុនហេងហ៊ុយ និងក្រុមហ៊ុនសុខហុង បានឈ្មះក្តីនៅឯតុលាការកំពូលនោះក្នុងការរឹបយកដីធ្លីកសិកម្មជាច្រើនរយហិកតាកន្លងមក។
ក្រុមហ៊ុនហេងហ៊ុយនិងក្រុមហ៊ុនសុខហុង បានប្តឹងផ្តល់គ្នាដណ្តើមដីធ្លីកសិកម្មរបស់គ្រួសារទាំងនោះដល់តុលាការកំពូល ក្រោយមកតុលាការកំពូលនេះបានសម្រេចកាលពីឆ្នាំ២០០៩កន្លងទៅ ឲ្យគ្រួសារប្រជាពលរដ្ឋខ្មែរទាំងនោះជាអ្នកចាញ់ក្តី។
ការមកតវ៉ានេះនៅគ្រាដែលពួកគាត់កំពុងតែមានការលំបាក គ្មានដីធ្លីធ្វើកសិកម្មដូចមុនក្រោយពីដីធ្លីត្រូវបានរងការរឹបយកដោយសារសាលដីកានៃតុលាការកំពូលកាលពីឆ្នាំ២០០៩នោះ។
ប្រជាពលរដ្ឋឈ្មោះ ផាវ ញឿង មកពីភូមិព្រែកជីក ឃុំជីខក្រោម ស្រុកស្រែអំបិល ខេត្តកោះកុង ដែលកំពុងតែឈរនៅមុខតុលាការកំពូល ក្នុងរាជធានីភ្នំពេញ បានថែ្លងប្រាប់វិទ្យុអាស៊ីសេរីអំពីបំណងនៃការមកតវ៉ានេះថា លោកស្រីទាមទារឲ្យតុលាការកំពូលបើកការជម្រះក្តីជាថ្មី ដោយសារតែតុលាការនេះបានចេញសាលដីកាឲ្យក្រុមហ៊ុនទាំងពីរឈ្មះក្តីគ្នា ប៉ុន្តែជាន់លើដីធ្លីរបស់ប្រជាពលរដ្ឋ៣៥គ្រួសារទៅវិញ ដែលមានផ្ទៃដីទំនាស់នោះជាង១២០ហិកតា។
អ្នកស្រី ផាវ ញឿង មានប្រសាសន៍ថា ៖ «ស្នើសុំឲ្យលោកប្រធានតុលាការកំពូលលោកទទួលយកសំណើដែលប្រជាពលរដ្ឋយើងមានបញ្ហានេះ សូមជំនុំជម្រះសាថ្មីឡើងវិញ»។
កាលពីឆ្នាំ២០០៦ គ្រួសារដែលមានជំនាស់ដីធ្លីនោះមានចំនួន៦៣គ្រួសារ ប៉ុន្តែមកដល់ពេលនេះគ្រួសារដែលរងគ្រោះនៅសេសសល់តែចំនួន៣៥គ្រួសារប៉ុណ្ណោះ។
ប្រជាពលរដ្ឋឈ្មោះ ទេព ហៃ អាយុ៤៨ឆ្នាំ បានថែ្លងថា គ្រួសារប្រជាពលរដ្ឋមិនយល់ព្រមជាមួយនឹងសាលដីការបស់តុលាការកំពូលកន្លងមកនោះទេ ដោយសារតែក្រុមហ៊ុនហេងហ៊ុយនិងក្រុមហ៊ុនសុខហុង បានប្តឹងគ្នាមកដណ្តើមដីធ្លីកសិកម្មរបស់ពួកគាត់ទៅវិញ។
លោក ទេព ហៃ បានឲ្យដឹងថា ៖ «ក្រោយមកពួកខ្ញុំបានដឹងថា ទាំងពីរនាក់ហ្នឹងប្ដឹងយកដីពួកខ្ញុំ អ៊ីចឹងហើយពួកខ្ញុំបានដាក់បណ្ដឹងនៅតុលាការកំពូល»។
ប្រធានក្រុមស៊ើបអង្កេតនៃអង្គការការពារសិទ្ធិមនុស្សលីកាដូ លោក អំ សំអាត ដែលបានតាមដានករណីនេះ បានមានប្រសាសន៍ថា ៖ «បច្ចុប្បន្ននេះលោក ហេង ហ៊ុយ កំពុងតែដើររាតត្បាត អុកឡុកបង្ខំឲ្យប្រជាពលរដ្ឋទាំងអស់ហ្នឹងចាកចេញពីដីដែលធ្វើឲ្យគាត់បាត់បង់នូវដីចម្ការ ដីស្រែដើម្បីបង្កបង្កើនផល»។
វិទ្យុអាស៊ីសេរីនៅមិនទាន់អាចទាក់ទងបាននៅទ្បើយដើម្បីសុំការបំភ្លឺពីមន្រ្តីរបស់តុលាការកំពូលនៅជុំវិញការទាមទាររបស់ប្រជាពលរដ្ឋ៣៥គ្រួសារខាងលើនេះ ដែលសុំឲ្យសើរើជម្រះក្ដីជាថ្មីលើសំណុំរឿងនេះ។ ប៉ុន្តែប្រភពពីប្រជាពលរដ្ឋបានឲ្យដឹងថា មន្រ្តីតុលាការនេះបានទទួលសំណើនោះហើយ ហើយគ្រោងចេញជាលិខិតអន្តរាគមន៍មួយឆាប់ៗនេះ ឲ្យប្រគល់ទៅមន្រ្តីតុលាការខេត្តកោះកុងដើម្បីជួយដោះស្រាយ។
តុលាការកំពូលកាលពីឆ្នាំ២០០៩កន្លងទៅ បានចេញសាលដីកាបង្គាប់ឲ្យអាជ្ញាធរនិងតុលាការខេត្តកោះកុង អនុវត្តសាលដីការឹបអូសយកដីធ្លីរបស់គ្រួសារទាំងនោះ ក្រោយពីតុលាការនេះបានកាត់ក្តីឲ្យប្រជាពលរដ្ឋជាអ្នកចាញ់ក្តី។
ព្រះមហាក្សត្រខែ្មរព្រះបរមនាថ នរោត្តម សីហមុនី កាលពីថ្ងៃទី២៤ ខែតុលា ឆ្នាំ២០០៩កន្លងទៅ បានផ្ញើព្រះរាជសារមួយច្បាប់ជូនរដ្ឋមន្រ្តីក្រសួងយុត្តិធម៌ លោក អង្គ វង្សវឌ្ឍានា ជាមួយនឹងការស្នើសុំឲ្យលោកជួយពិនិត្យលើករណីតវ៉ារបស់ប្រជាពលរដ្ឋទាំងនោះ៕