ពលរដ្ឋដែលមានជម្លោះដីនៅកោះកុងសុំកិច្ចអន្តរាគមន៍ពីព្រះមហាក្សត្រ
ដោយ សុខ សេរី
2009-10-20
ព្រះមហាក្សត្រខែ្មរត្រូវបានពលរដ្ឋមកពីខេត្តកោះកុង បានចាត់ទុកថា ជាកន្លែងបង្អែកចុងក្រោយបង្អស់របស់ពួកគាត់ នៅក្នុងការបង្អង់ការអនុវត្តសាលក្រមខាងមុខនេះ ដើម្បីរឹបយកដីធ្លី។
ប្រជាសហគមន៍ស្រែអំបិលក្នុងខែត្រកោះកុង ធ្វើដំណើរទៅតវ៉ាពីបញ្ហាដីធ្លី នៅមុខរដ្ឋសភា ក្នុងរាជធានីភ្នំពេញ កាលពីខែមីនា ឆ្នាំ២០០៧។
ប្រជាពលរដ្ឋខែ្មរ៤៣គ្រួសារនៅក្នុងភូមិព្រែកជីក ឃុំជីខក្រោម ស្រុកស្រែអំបិល ខេត្តកោះកុង ដែលកំពុងតែប្រឈមមុខនឹងការបណ្តេញចេញពីផ្ទះសម្បែងក្នុងទំនាស់ដីធ្លីជាង២០០ហិកតារ បានមកដល់ទីក្រុងភ្នំពេញ នៅថ្ងៃអង្គារ ទី២០ តុលានេះ ដើម្បីថ្វាយញត្តិទៅព្រះមហាក្រត្សខែ្មរ ព្រះបាទរោត្តម សីហមុនី សុំឲ្យព្រះអង្គលើកលែងចោលសាលក្រមរបស់តុលាការកំពូលនៅក្នុងការរឹបយកដីធ្លីរបស់ពួកគាត់ឲ្យទៅក្រុមហ៊ុនឯកជនចំនួន២ខាងមុខនេះ។
តំណាងប្រជាពលរដ្ឋចំនួន៤៣គ្រួសារខាងលើនេះ មកពីភូមិព្រែកជីក ឃុំជីខក្រោម ស្រុកស្រែអំបិល ខេត្តកោះកុង បានថែ្លងប្រាប់វិទ្យុអាស៊ីសេរីថា ប្រជាពលរដ្ឋត្រូវការព្រះរាជអន្តរាគមន៍ពីព្រះមហាក្សត្រ។
តំណាងពលរដ្ឋខាងលើបានថ្លែងដូច្នេះ ៖ «អនុវត្តសាលដីការបស់តុលាការកំពូលថ្ងៃទី២៧ ខែ១០ហ្នឹង អ៊ីចឹងពួកយើងខ្ញុំអត់មានជម្រើសទៀតទេ មានតែសុំស្នើដល់ព្រះមហាក្សត្រ ដើម្បីឲ្យព្រះមហាក្សត្រលើកលែងការអនុវត្តសាលក្រមរបស់តុលាការកំពូល»។
តំណាងប្រជាពលរដ្ឋម្នាក់ទៀតបានថែ្លងថា នេះជាជម្រើសចុងក្រោយរបស់ប្រជាពលរដ្ឋ ក្នុងការដោះស្រាយការប្រឈមមុខនឹងការបាត់បង់ដីធ្លីនាពេលឆាប់ៗនេះ ៖ «ខ្ញុំចង់សុំឲ្យលើកលែង លុបចោលសាលក្រមដែលគេដាក់មកឲ្យពួកយើងហ្នឹង។ ទី១ ប៉ះពាល់ដល់ការរស់នៅរបស់ពួកខ្ញុំ ខំតស៊ូតាំងពីសម័យខ្មែរក្រហមកាន់កាប់ រហូតដល់ផ្លូវស្រុកទេសបានស្រួលបួល ហើយគេរំលោភយកដីយើង»។
វិទ្យុអាស៊ីសេរីនៅមិនទាន់អាចទាក់ទងបាន ដើម្បីសុំសេចក្តីប្រតិកម្មពីតំណាងក្រុមហ៊ុនហេង ហ៊ុយ និងតំណាងក្រុមហ៊ុនសុខ ហុង ជុំវិញទំនាស់ដីធ្លីខាងលើនេះ ប៉ុន្តែភរិយារបស់លោក ហេង ហ៊ុយ បានមានប្រសាសន៍បញ្ជាក់កាលពីថៃ្ងអាទិត្យថ្មីៗនេះថា នោះគឺជាការសម្រេចរបស់តុលាការ។
លោក អំ សំអាត ជាប្រធានក្រុមស៊ើបអង្កេតរបស់អង្គការការពារសិទ្ធិមនុស្សក្រៅរដ្ឋាភិបាល លីកាដូ បានមានប្រសាសន៍ថា ទំនាស់របស់ក្រុមហ៊ុនឯកជនពីរដណ្តើមដីគ្នា បែរមកជាប្រជាពលរដ្ឋជាអ្នករងគ្រោះទៅវិញ។
លោក អំ សំអាត មានប្រសាសន៍ដូច្នេះ ៖ «យើងឃើញថា បញ្ហានៅជីខក្រោមវាផ្ដើមចេញពីឧកញ៉ាពីរដែលគាត់ប្ដឹងគ្នា គឺខាងឧកញ៉ា ហេង ហ៊ុយ និងឧកញ៉ា សុខ ហុង គាត់ប្ដឹងដណ្ដើមដីគ្នា ប៉ុន្តែសាលក្រមដែលសម្រេចឲ្យអ្នកទាំងពីរនេះ វាប៉ះពាល់ទៅដល់ប្រជាពលរដ្ឋដែលគាត់រស់នៅលើដីហ្នឹងដោយមិនដឹងខ្លួន»។
លោក តៅ វ៉ាន់ ជាមេឃុំជីខក្រោម ស្រុកស្រែអំបិល ខេត្តកោះកុង កំពុងតែព្យាយាមដោះស្រាយរឿងខាងលើនេះផងដែរ កុំឲ្យមានការបណ្តេញប្រជាពលរដ្ឋ៤៣គ្រួសារនោះ ដើម្បីបង្អង់ការបណ្តេញនោះ ប៉ុន្តែលោកមិនសូវជាមានសង្ឃឹមទេ។
ក្រុមប្រជាពលរដ្ឋចំនួន៤៣គ្រួសារនោះ កំពុងតែមានការព្រួយបារម្ភយ៉ាងខ្លាំងអំពីសុវត្ថិភាពផ្ទះសម្បែងនិងដីធ្លី ដែលនឹងបាត់បង់នៅពេលឆាប់ខាងមុខនេះ។
ផ្អែកតាមឯកសារដែលវិទ្យុអាស៊ីសេរីទទួលបាន បានឲ្យដឹងថា សាលដីកាជាស្ថាពររបស់តុលាការកំពូល តាមរយៈតុលាការសាលាដំបូងខេត្តកោះកុង ចុះថៃ្ងទី១២ ខែតុលាថ្មីៗនេះ បានជូនដំណឹងឲ្យប្រជាពលរដ្ឋ២៤នាក់ នៃគ្រួសារ៤៣គ្រួសារនោះ ជួបប្រជុំនៅថៃ្ងទី២៧ ខែតុលា ខាងមុខនេះ ដើម្បីចូលរួមក្នុងការអនុវត្តសាលដីកាជាស្ថាពររបស់តុលាការកំពូល៕
អត្ថបទដែលទាក់ទង
អាជ្ញាធរខែត្រកំពង់ធំចាប់ខ្លួនពលរដ្ឋ៤នាក់បន្ថែមទៀតក្នុងរឿងជម្លោះដី
ជនជាតិភាគតិចនៅមណ្ឌលគិរីបារម្ភថាក្រុមហ៊ុនធ្វើឲ្យបាត់ដីចម្ការវិលជុំ
ពលរដ្ឋមានជម្លោះដីនៅឧត្ដរមានជ័យបន្តតវ៉ានៅទីស្ដីការគណៈរដ្ឋមន្រ្តី
ស្ថានភាពបញ្ហាជម្លោះដីនៅស្រុកសន្ទុកខេត្តកំពង់ធំ
សង្គមស៊ីវិលស៊ើបអង្កេតករណីក្រុមហ៊ុនរំលោភបំពានលើជនជាតិភាគតិច
សមត្ថកិច្ចខែត្រកំពង់ធំចាប់ខ្លួនពលរដ្ឋ៣នាក់ក្នុងរឿងជម្លោះដី
សមត្ថកិច្ចខែត្រកំពង់ធំបាញ់បង្រ្កាបការតវ៉ារបស់ពលរដ្ឋក្នុងរឿងជម្លោះដី
អាជ្ញាធរវៀតណាមហាមឃាត់ខ្មែរក្រោមមិនឲ្យធ្វើស្រែលើដីដូនតា
ក្រឡាបញ្ជីតុលាការខេត្តកំពង់ធំរងការចោទថាគំរាមពលរដ្ឋក្នុងរឿងទំនាស់ដី
អាជ្ញាធរខេត្តមណ្ឌលគិរីគ្រោងកោះប្រជុំក្រុមហ៊ុនដែលមិនវិនិយោគចំគោលដៅ
មតិ
អ្នកអាចបញ្ចេញមតិដោយបំពេញទម្រង់ខាងក្រោមនេះក្នុងទម្រង់ជាអក្សរសុទ្ធ។. មតិត្រូវតែអនុញ្ញាតដោយអ្នកសម្របសម្រួលនិងមិនបង្ហាញភ្លាមៗនៅលើទំព័រនេះទេ។ សូមអញ្ជើញត្រឡប់មកបើកទំព័រនេះម្ដងទៀតដើម្បីមើលថាតើមតិរបស់អ្នកត្រូវបានចុះផ្សាយឬអត់។
មើលមតិទាំងអស់.