អភិបាលរាជធានីភ្នំពេញ លោក កែប ជុតិមា បានចូលរួមជាអធិបតីភាពក្នុងពិធីសាសនាមួយហៅថា ពិធីក្រុងពាលី ដើម្បីបើកឲ្យឆ្លងស្ពានពេជ្រឡើងវិញ តែលោកបានមិនបានដើរឆ្លងស្ពានពេជ្រ ដែលទើបបើកឲ្យឆ្លងកាត់ជាថ្មីនោះទេ ក្រោយពីមានមនុស្សស្លាប់ជាច្រើនរយនាក់នៅលើស្ពាននោះ។
ព្រះសង្ឃ លោកតាអាចារ្យ និងលោក ពុង ខៀវសែ ម្ចាស់វិនិយោគតំបន់កោះពេជ្រ បានដើរទៅបើករបាំងហាមឃាត់ឆ្លងកាត់ស្ពានជានិម្មិតរូបមុនគេ បន្ទាប់មកទើបប្រជាពលរដ្ឋទូទៅបានធ្វើចរាចរណ៍តាមក្រោយជាធម្មតា តែមិនមានចំនួនច្រើននោះទេនៅថ្ងៃដំបូងនេះ។
នៅក្នុងពិធីនោះដែរ លោក កែប ជុតិមា បានអនុម័តឲ្យសង់ស្ពានចំនួន ២បន្ថែមទៀត ឆ្លងទៅតំបន់កោះពេជ្រ នៅពេលឆាប់ៗខាងមុខនេះ ដើម្បីបញ្ជៀសនូវការកកស្ទះ និងកុំឲ្យកើតមានឧបទ្ទវហេតុធ្វើឲ្យស្លាប់មនុស្សជាច្រើនដូចនៅក្នុងព្រឹត្តិការណ៍ថ្ងៃទី២២ ខែវិច្ឆិកា នៅលើស្ពាននោះទៀត។
លោក កែប ជុតិមា មានប្រសាសន៍បន្ថែមថា ៖ «តាមពិតយើងកំពុងរកមើលប្លង់ តាមពិតការងារហ្នឹងស្ទើរតែរួចរាល់អស់ហើយ ប៉ុន្តែយើងមើលកែតម្រូវប្លង់បន្តិច ហើយខ្ញុំធានាថា មិនយូរទេ យើងនឹងបើកផ្លូវការសាងសង់ស្ពានពីរនេះ»។
លោកបន្តថា ក្រៅពីកិច្ចការសង់ស្ពានបន្ថែមនេះ សាលាក្រុងនឹងរៀបចំសង់ស្តូបមួយស្ថិតនៅខាងស្ដាំត្រើយខាងលិចនៃស្ពានពេជ្រ ដើម្បីរំឭកវិញ្ញាណក្ខន្ធ គោរពបូជាដល់អ្នកដែលស្លាប់នៅលើស្ពានពេជ្រនេះ ហើយបច្ចុប្បន្នអ្នកជំនាញកំពុងសិក្សាគូប្លង់ហើយ។
ចំពោះថវិកាសាងសង់ស្តូប លោកបញ្ជាក់ថា ប្រើប្រាស់មូលនិធិទូរទស្សន៍បាយ័ន ស៊ី.ធី.អិន (CTN) និងថវិការបស់អ្នកវិនិយោគតំបន់កោះពេជ្រ លោក ពុង ខៀវសែ។
ប្រជាពលរដ្ឋម្នាក់ឈ្មោះ លោក រ៉ាឌី ដែលមកចូលការបើកឲ្យប្រើប្រាស់ឡើងវិញនូវស្ពានពេជ្រនេះ ថ្លែងថា គេមិនជំទាស់ទេចំពោះការបើកឡើងវិញនូវស្ពានដែលមានសោកនាដកម្មនេះ ប៉ុន្តែលោកសូមឲ្យអាជ្ញាធរគិតគូរឡើងវិញ ចំពោះការដាក់កម្លាំងសន្តិសុខនៅទីនោះ និងការសម្រួលការធ្វើចរាចរណ៍ឲ្យបានត្រឹមត្រូវជាងពេលមុន។
លោក សុន ឆ័យ តំណាងរាស្ត្របក្សប្រឆាំង បានហៅការប្រញាប់ប្រញាល់ឆាប់បើកឲ្យប្រើប្រាស់ឡើងវិញនូវស្ពានកោះពេជ្រ ដែលកើតមានសោកនាដកម្មសម្លាប់មនុស្សដ៏ច្រើននេះ ជាអំពើបិទបាំងមួយនូវទង្វើដែលថៅកែកោះពេជ្រ និងមន្ត្រីសាលាក្រុងមិនទទួលខុសត្រូវ។
លោកបន្តថា ការថ្លែងបែបនេះ ដោយសារគណបក្ស សម រង្ស៊ី មិនទទួលយកលទ្ធផលស៊ើបអង្កេតរបស់រដ្ឋាភិបាលកន្លងមក លើឧបទ្ទវហេតុលើស្ពានកោះពេជ្រនោះ ហើយបានទាមទារឲ្យបង្កើតក្រុមការងារស៊ើបអង្កេតឯករាជ្យមួយ ហើយពេលនេះ គណបក្ស សម រង្ស៊ី និងសង្គមស៊ីវិលមួយចំនួន ក៏កំពុងធ្វើការស្រាវជ្រាវរកហេតុផលលើករណីខាងលើនេះនៅឡើយ។
លោក ពុង ខៀវសែ ពុំធ្វើការអត្ថាធិប្បាយណាមួយឆ្លើយតបនឹងសំណួររបស់អ្នកកាសែតឡើយ នៅក្នុងពិធីបើកឲ្យឆ្លងកាត់ស្ពានពេជ្រឡើងវិញនោះ។
នៅតំបន់កោះពេជ្រទៅថ្ងៃខាងមុខ នឹងមានស្ពានឆ្លងទៅមកចំនួន ៥ មានដូចជា ស្ពានហង្ស ស្ពានពេជ្រ ដែលកើតនូវសោកនាដកម្ម ស្ពាននាគ ស្ថិតនៅខាងត្បូងស្ពានហង្ស ចេញទៅផ្លូវសុធារស ដែលកំពុងសាងសង់ ហើយស្ពាន ២ទៀតដែលគេគ្រោងសង់បន្ថែមនោះ ពុំទាន់មានឈ្មោះនៅឡើយ ដែលមានទីតាំងនៅម្ដុំស្ពានពេជ្រភាគខាងជើងតំបន់កោះពេជ្រនោះ៕