អាជ្ញាធររាជធានីភ្នំពេញ និងប្រធានមជ្ឈមណ្ឌលកម្សាន្តកោះពេជ្រ រួមទាំងក្រុមគ្រួសារអ្នកស្លាប់នៅលើស្ពានពេជ្រ នៅថ្ងៃទី២២ វិច្ឆិកា ឆ្នាំ២០១១ បាននាំគ្នាប្រារព្ធពិធីបុណ្យឆ្លងស្តូប សង់ដើម្បីរំលឹកវិញ្ញាណក្ខន្ធអ្នករងគ្រោះដោយសារព្រឹត្តិការណ៍ជាន់គ្នាកាលពីឆ្នាំ២០១០ កន្លងទៅ និងបានបង្សុកូលឧទ្ទិសដល់អ្នកស្លាប់។
អភិបាលរាជធានីភ្នំពេញ លោក កែប ជុតិមា បានថ្លែងប្រាប់ក្រុមអ្នកកាសែតថា ការប្រារព្ធពិធីបុណ្យឆ្លងនេះគឺនឹងត្រូវធ្វើឡើងជារៀងរាល់ឆ្នាំ ហើយត្រូវចាត់ទុកថា ជាព្រឹត្តិការណ៍ប្រវត្តិសាស្ត្រមួយ បានកើតឡើងនៅរាជធានីភ្នំពេញ។
លោកថា ស្តូបនេះធ្វើឡើងដើម្បីកត់សម្គាល់ និងរំលឹកការចងចាំ៖ «មិនចាំបាច់ខ្ញុំទេ អ្នកណាក៏ដោយ បើមានបងប្អូនជនរួមជាតិជាខ្មែរបាត់បង់ជីវិត យើងត្រូវតែសោកស្ដាយ យើងត្រូវតែចងចាំ។ យើងបានឆ្លងកាត់ការឈឺចាប់ក្នុងរបប ប៉ុល ពត អ៊ីចឹងជនរងគ្រោះ ជនរួមជាតិរបស់យើងដែលទទួលគ្រោះថ្នាក់ យើងត្រូវតែសោកស្ដាយ»។
លោកបានបញ្ជាក់ថា ស្តូបនេះបានចំណាយថវិកាសាងសង់ប្រហែល ១២ម៉ឺនដុល្លារ ដែលបានមកពីមូលនិធិទូរទស្សន៍បាយ័ន មូលនិធិទូរទស្សន៍ស៊ីធីអ៊ិន (CTN) ក្រុមហ៊ុនអូស៊ីអាយស៊ី (OCIC) និងសាលារាជធានីភ្នំពេញ។
ឪពុកម្ដាយ ឬសាច់ញាតិរបស់អ្នកដែលបានស្លាប់នៅលើស្ពានពេជ្រ ដែលមកចូលរួមក្នុងពិធីបុណ្យនេះ បានសម្ដែងការឈឺចាប់ និងធ្វើឲ្យពួកគេនឹករលឹកឡើងវិញចំពោះការបាត់បង់មនុស្សជាទីស្រលាញ់របស់ពួកគេ។
លោកស្រី សុំ សុភាព អាយុ ៤៦ឆ្នាំ ដែលបានអុជធូបបួងសួងដល់វិញ្ញាណក្ខន្ធកូនប្រុសអាយុ ១៨ឆ្នាំដែលបានស្លាប់នៅលើស្ពានកោះពេជ្រនេះ បាននិយាយទាំងទឹកភ្នែកថា ក្នុងរយៈពេលមួយឆ្នាំកន្លងផុតទៅនេះ គាត់នៅតែនឹកឃើញកូនជាទីស្រលាញ់របស់គាត់ដែលបានមកចោលជីវិតនៅលើស្ពាននេះ៖ «ឲ្យកូនចាប់ជាតិរកភពថ្មី កុំឲ្យនៅទីនេះទៀត សូមឲ្យកូនមានសេចក្ដីសុខ អាយុវែង កុំឲ្យមានអាយុខ្លីដូចជាតិនេះ»។
ខែ សុណង៖ តើបងមានការពេញចិត្តទេ ដែលខាងអាជ្ញាធរគេធ្វើស្តូបធ្វើអីឲ្យដូច្នេះ? សុំ សុភាព៖ គ្មានពេញចិត្តអីទេ ខ្ញុំស្ដាយកូនខ្ញុំ។
លោកស្រី តឹក សំអាត អាយុ ៤០ឆ្នាំ មកចូលរួមពិធីនេះដែរ ឲ្យដឹងថា កូនប្រុសគាត់ម្នាក់អាយុ ១២ឆ្នាំបានស្លាប់ និងកូន ២នាក់ទៀតរងរបួសក្នុងហេតុការណ៍លើស្ពាននេះ នាំឲ្យគាត់ចងចាំមិនភ្លេច។ យ៉ាងណាគាត់ពេញចិត្តចំពោះការសាងសង់ឲ្យមានស្តូប ដើម្បីរំលឹកនូវហេតុការណ៍ដ៏អាក្រក់នេះកុំឲ្យមានលើកក្រោយទៀត។
លោកស្រីបន្តថា៖ «មក ៥នាក់ បងប្អូនវាហ្នឹង ជាប់តែវាមួយទេ មួយទៀតស្រី ដេកពេទ្យកាល់ម៉ែត។ មានធ្វើការអីកើតឥឡូវមកធ្វើការរោងចក្ររវល់តែសន្លប់។ តូចចិត្តអាណិតតែកូន វាស្ដាយកូន ទោះបីលុយកាក់ប៉ុន្មានក៏ខ្ញុំអត់ចង់បានដែរ។ ថ្ងៃស្លាប់ហើយគេហៅមកយកលុយ សម្ដេចហ្នឹង ខ្ញុំហួសមកហ្នឹងមួយភ្លែត ក៏នឹកឃើញស្ពាននេះខឹង។ គេសួររាល់ថ្ងៃហ្នឹងក៏ខឹងដែរ នឹកឃើញថា មិនដែលមានឧបទ្ទវហេតុអ៊ីចឹង បើប្ដីខ្ញុំរឹតតែស្អប់ទៀត»។
កាលពីរាត្រីថ្ងៃបង្ហើយនៃពិធីបុណ្យអុំទូក ថ្ងៃទី២២ វិច្ឆិកា ឆ្នាំ២០១០ បន្ទាប់ពីពិធីបណ្ដែតប្រទីប ពិធីបាញ់កាំជ្រួចនៅម៉ោងប្រហែល ៩យប់ ក្នុងពេលតែមួយសន្ទុះប៉ុណ្ណោះ សោកនាដកម្មលើស្ពានកោះពេជ្របានកើតឡើងដោយសារមនុស្សផ្អើលជាន់គ្នាបណ្ដាលឲ្យមានមនុស្សស្លាប់ ៣៥៣នាក់ និងរបួស ៣៩៣នាក់ ដែលជារឿងសែនសោកស្ដាយជាទីបំផុត ធ្វើឲ្យការចូលរួមសប្បាយថ្ងៃបុណ្យក្លាយជាការកាន់ទុក្ខទៅវិញ៕