កាសែតភ្នំពេញប៉ុស្តិ៍រាយការណ៍កាលពីចុងសប្តាហ៍ថា លោក ញ៉ែម អេន ដែលជាអ្នកថតរូបនៅគុកទួលស្លែងក្នុងរបបខ្មែរក្រហម បានមានប្រសាសន៍ថា ដោយមានការអនុញ្ញាតពីរដ្ឋាភិបាល កាលជាង២ឆ្នាំមុន លោកបានទិញដី២៧ហិកតារ ចម្ងាយប្រមាណ ២-៣ គីឡូម៉ែត្រពីទីប្រជុំជនស្រុកអន្លង់វែង ហើយឥឡូវមិនអាចរកអ្នកគាំទ្រគម្រោងនេះបាននៅឡើយ។
លោកថា ពីដំបូង ពលរដ្ឋខ្មែរមួយចំនួន មានបំណងបោះទុនលើគម្រោងនេះដែរ ប៉ុន្តែថ្មីៗនេះ គេមានការរួញរាដោយដឹងថា សាលាក្តីខ្មែរក្រហមនៅតែដំណើរការនោះ។ ហើយថា ពលរដ្ឋនៅម្តុំនោះ មានការបារម្ភថា តុលាការនោះនឹងនាំឲ្យប៉ះពាល់ដល់ការរកស៊ីរបស់ខ្លួន។
ព័ត៌មានបន្តថា គេរំពឹងថា ប្រាក់ប្រមាណ៣២ម៉ឺនដុល្លារអាមេរិកសម្រាប់សង់សារមន្ទីរនឹងត្រូវឧបត្ថម្ភដោយក្រុមរកស៊ីនិងអង្គការក្រៅរដ្ឋាភិបាលមួយចំនួន។
លោក ឆាំង យុ ប្រធានមជ្ឈមណ្ឌលឯកសារកម្ពុជា បានមានប្រសាសន៍ថា មជ្ឈមណ្ឌលលោកអាចជួយឧបត្ថម្ភផ្នែករដ្ឋបាលដល់លោក ញ៉ែម អេន នៅពេលណាដែលសារមន្ទីរនោះចេញជារូបរាងហើយដំណើរការ ដូចជាជួយរៀបចំជាសិក្ខាសាលានិងរៀបការតាំងពិព័រណ៍ ក៏ប៉ុន្តែមិនអាចផ្តល់ថវិកាឲ្យទេ៕