អាមេរិកចែកចាយមួកការពារសុវត្ថិភាពនៅខេត្តក្រចេះ
ដោយ ដែន អយុធ្យា
2012-02-25
រដ្ឋាភិបាលសហរដ្ឋអាមេរិក តាមរយៈមជ្ឈមណ្ឌលបង្ការ និងកម្ចាត់ជំងឺនៃសហរដ្ឋអាមេរិក (US-CDC) ថ្មីៗនេះ បានចែកមួកការពារសុវត្ថិភាពចំនួន ៥១៦មួក ដល់សិស្សានុសិស្ស និងគ្រូបង្រៀននៅសាលាបឋមសិក្សាសណ្ដាន់១ និងសាលាបឋមសិក្សាភូមិធំ នៅខេត្តក្រចេះ។
សេចក្ដីប្រកាសព័ត៌មានចុះថ្ងៃទី២៤ ខែកុម្ភៈ ស្ថានទូតអាមេរិកប្រចាំទីក្រុងភ្នំពេញបានឲ្យដឹងថា សហរដ្ឋអាមេរិក និងមូលនិធិបង្ការរបួសនៅអាស៊ី (AIP Foundation) បានរៀបចំឲ្យមានកម្មវិធីមួកការពារសុវត្ថិភាពសម្រាប់កុមារ ក្នុងពេលធ្វើដំណើរតាមកង់ ឬម៉ូតូ។ ស្ថានទូតអាមេរិកបានឲ្យដឹងបន្ថែមថា ការបង្កើតឲ្យមានកម្មវិធីផ្ដល់មួកសុវត្ថិភាពដល់កុមារនៅខេត្តក្រចេះនោះ គឺក្នុងបំណងជួយកាត់បន្ថយគ្រោះថ្នាក់ចរាចរ ដែលកុមារកម្ពុជាកំពុងប្រឈមមុខធ្ងន់ធ្ងរ។
របាយការណ៍របស់មូលនិធិ (AIP) បានបង្ហាញថា កាលពីឆ្នាំ២០១១ មានកុមារកម្ពុជា ១៤៨នាក់ ស្លាប់ដោយគ្រោះថ្នាក់ចរាចរ និងថា ជិតពាក់កណ្ដាលនៃកុមាររងគ្រោះស្លាប់ដោយសាររងបួសក្បាលធ្ងន់ធ្ងរ។
មន្ត្រីស្ថានទូតអាមេរិកអះអាងថា អ្នកធ្វើដំណើរតាមម៉ូតូ ឬកង់ ទាំងមនុស្សចាស់ ឬក្មេង ដែលបានប្រើប្រាស់មួកការពារសុវត្ថិភាព មានទាំងអស់ ៨% នៅទូទាំងប្រទេស។ លោកស្រី Dianne Syrvalin តំណាងស្ថានទូតអាមេរិកប្រចាំទីក្រុងភ្នំពេញ ដែលបានចូលរួមប្រគល់មួកសុវត្ថិភាពនោះ ថ្លែងអំពាវនាវឲ្យកុមារ និងមនុស្សពេញវ័យ ត្រូវពាក់មួកការពារសុវត្ថិភាពឲ្យបានគ្រប់គ្នា ក្នុងពេលធ្វើដំណើរតាមកង់ ឬម៉ូតូ ដើម្បីកាត់បន្ថយគ្រោះថ្នាក់ចរាចរដល់អាយុជីវិត។
លោក គឹម បញ្ញា ជាប្រធានមូលនិធិ AIP ប្រចាំនៅប្រទេសកម្ពុជា។ លោកបានឲ្យដឹងថា អង្គការរបស់លោកកំពុងជំរុញឲ្យមានការផ្សព្វផ្សាយតាមគ្រប់រូបភាព អប់រំពលរដ្ឋកម្ពុជា ពិសេសកុមារឲ្យចូលរួមប្រើប្រាស់មួកសុវត្ថិភាពក្នុងពេលធ្វើដំណើរតាមម៉ូតូ ឲ្យបានគ្រប់ៗគ្នា។ ចំណែកលោក ហឿ ស៊ីយ៉ែម អភិបាលរងខេត្តក្រចេះទទួលស្គាល់ថា គ្រោះថ្នាក់ចរាចរនៅក្នុងប្រទេសកម្ពុជា មានការកើនឡើងគួរឲ្យព្រួយបារម្ភ៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។
អត្ថបទដែលទាក់ទង
អភិបាលខេត្តក្រចេះ លោក ខាំ ភឿន ស្លាប់ក្នុងគ្រោះថ្នាក់ចរាចរណ៍
អាជ្ញាធរខេត្តកំពង់ចាមរារាំងអង្គការមិនឲ្យចែកអំណោយដល់កុមារកំព្រា
មន្ត្រីរាជការនៅមណ្ឌលគិរីមិនបានបើកប្រាក់បៀវត្ស៣ខែហើយ
អាជ្ញាធររកឃើញសារធាតុគីមីនិងគ្រាប់មិនទាន់ផ្ទុះពីសម័យសង្គ្រាម
សាលារាជធានីភ្នំពេញហាមមិនឲ្យរថយន្តដឹកសាំងបើកឆ្លងទីក្រុង៥ថ្ងៃ
ប្រជានេសាទនៅកំពតត្អូញពីការពិបាកចតទូកដោយសារគំនរខ្សាច់
ពលរដ្ឋនៅកំពង់ឆ្នាំងចោទអាជ្ញាធរថាយកតម្លៃសេវាធ្វើលិខិតផ្សេងៗថ្លៃ
មតិ
Click here to add your own comment