ប្រជាពលរដ្ឋនៅភូមិទ្រាក ឃុំស្រែចារ បានផ្ដល់សម្ភាសន៍ថា ក្រុមហ៊ុនមួយដែលមិនស្គាល់ឈ្មោះ បានចាត់ចែងកម្លាំង ឲ្យយកត្រាក់ទ័រមកឈូសឆាយព្រំដី ដើម្បីហ៊ុមព័ទ្ធទីតាំងអភិវឌ្ឍន៍ របស់ខ្លួន ប៉ះពាល់លើដីស្រែរបស់ប្រជាពលរដ្ឋជាច្រើនពាន់គ្រួសារ ដែលធ្វើឲ្យពួកគេមានប្រតិកម្មគំរាមថា នឹងធ្វើសកម្មភាពផ្សេងៗ ដើម្បីទប់ស្កាត់ទៅនឹងសកម្មភាពឈូសឆាយនោះ ៖ «ធ្វើបាតុកម្ម អត់ធ្វើអំពើហិង្សាទេ គ្រាន់តែថា ឲ្យគេចេញទៅវិញ បើមិនចេញទេ អាចខ្ញុំធ្វើម៉េចទៀត» ។
ទន្ទឹមនឹងការអះអាងថា នឹងធ្វើបាតុកម្មនេះ ប្រជាពលរដ្ឋបានឲ្យដឹងបន្ថែមថា កំពុងតែប្រមូលស្នាមមេដៃរបស់ប្រជាពលរដ្ឋឲ្យបានច្រើនដើម្បីប្ដឹងអាជ្ញាធរខេត្ត និងអង្គការក្រៅរដ្ឋាភិបាលមួយចំនួន ឲ្យជួយធ្វើអន្តរាគមន៍ទប់ស្កាត់ ៖ «បើសិនជាក្រុមហ៊ុនហ៊ានមកឈូសឆាយតទៅទៀត ខ្ញុំនឹងដាក់ពាក្យបណ្ដឹងនេះទៅដល់ខេត្ត ហើយឥឡូវហ្នឹងប្រជាជនរួមគ្នាទាំងអស់ដើម្បីនឹងផ្ដិតមេដៃហ្នឹងខ្ទង់ពាន់ឡើងទៅហើយ» ។
ការគំរាមនិងការតវ៉ានេះ បានកើតមានឡើងបន្ទាប់ពីប្រជាពលរដ្ឋ បានសង្កេតឃើញក្រុមហ៊ុនបានដាក់ត្រាក់ទ័រប្រចាំការឈូសឆាយ ធ្វើក្រវាត់ហ៊ុមព័ទ្ធទីតាំងអភិវឌ្ឍន៍របស់ខ្លួន ចំនួន៣ថ្ងៃ មកហើយ ។ ហើយកាលពីថ្ងៃទី ២៤ ឧសភា វេលាថ្ងៃត្រង់ប្រជាពលរដ្ឋ ប្រមាណជិត ៥០០នាក់ បាននាំគ្នាទៅបញ្ឈប់ និងបណ្ដេញឲ្យយកត្រាក់ទ័រនោះចេញ ដោយមិនឲ្យឈូសឆាយតទៅទៀត ៖ «ប្រជាពលរដ្ឋឃាត់អាត្រាក់ដែលឈូសឆាយ យកដីអ្នកស្រុកនៅចំណុចភូមិទ្រាក ។ ប្រជាពលរដ្ឋទៅហ្នឹង គឺបើកយកមកចូលក្នុងភូមិ ការឈូសឆាយវាកៀក ក្បែរស្រែហើយ ក្បែរភូមិ មិនបាន ២០០ម៉ែត្រផងហ្នឹង ។ ឥឡូវប្លង់វា វាកាត់ភូមិតែម្ដង» ។
អភិបាលស្រុកស្នួល គឺលោក អ៊ីវ សាភុម បានជម្រាបតាមទូរស័ព្ទថា ក្រុមហ៊ុន ក្រវេស ប៊ិលឌីង ត្រេតឌីង បានទទួលច្បាប់អនុញ្ញាតឲ្យអភិវឌ្ឍដាំដំណាំកសិឧស្សាហកម្ម លើផ្ទៃដីជាង ៧ពាន់ហិកតា ដែលការដោះស្រាយរបស់លោក កាលពីថ្ងៃទី២៤ ឧសភា លោកបានទូរស័ព្ទឲ្យក្រុមហ៊ុនដកថយសិន ដើម្បីចៀសវាងទំនាស់កើតឡើង ។
លោក អ៊ីវ សាភុម មានប្រសាសន៍ដូច្នេះថា ៖ «ខ្ញុំក៏បានសំណូមពរទៅក្រុមហ៊ុនថា តំបន់ណា កន្លែងណាដែលប៉ះពាល់ដល់ប្រជាពលរដ្ឋ សូមឲ្យក្រុមហ៊ុនដកថយសិន ហើយចាំសម្របសម្រួលតាមនីតិវិធីច្បាប់ ហើយអ្វីៗមិនឲ្យប៉ះពាល់ដល់ប្រជាពលរដ្ឋទេ» ។
លោកអភិបាលស្រុកបានឲ្យដឹងថា ការស្រាវជ្រាវមុននឹងផ្ដល់ដីសម្បទានឲ្យទៅក្រុមហ៊ុន គឺបានសិក្សាច្បាស់លាស់នៅឆ្នាំ ២០០២ តែក្រោយមកក៏មានប្រជាពលរដ្ឋខ្លះ ទៅកាប់ឆ្ការទុកចោល ខ្លះទៀតក៏ដោះដូរដើម្បីយកប្រាក់ ។ ប៉ុន្តែទោះជាយ៉ាងណាក៏ដោយ ក៏ប្រជាពលរដ្ឋនៅតែអះអាងថា នឹងប្រមូលស្នាមមេដៃតវ៉ាឡើងទៅថ្នាក់លើ ដើម្បីឲ្យជួយអន្តរាគមន៍បញ្ឈប់ការឈូសឆាយនោះ ៕