លោក ផង់ ប្រជាពលរដ្ឋនៅឃុំ២ធ្នូ ស្រុកស្នួល ខេត្តក្រចេះ បានឲ្យដឹងថា លោក រួមទាំងអ្នកស្រុកប្រមាណ ៨០គ្រួសារទៀត បានទៅតាំងទីលំនៅប្រកបរបរដាំដំឡូង តាំងពីឆ្នាំ១៩៩៨ មកម្ល៉េះ នៅលើទីវាលត្រង់ចំណុចគីឡូម៉ែត្រលេខ ១១៤។ ហើយកាលពីថ្ងៃទី២៤ តុលា វេលាម៉ោងប្រមាណជាង ៤រសៀល មានមន្រ្តីបរិស្ថានគ្រប់គ្រងដែនជម្រកសត្វព្រៃ បានយករណារយន្ត ទៅអារកាត់បំផ្លាញជម្រករបស់លោក ហើយបាញ់គំរាមបណ្ដេញចេញទៀត។
លោក ផង់ ថ្លែងដូច្នេះថា ៖ «យកម៉ាស៊ីនកាត់ រុះរើ ខឹងខ្ញុំហាមឃាត់ គេចង់កាំភ្លើងបាញ់ មានកាំភ្លើងខ្លីមួយដើម កាំភ្លើងវែង ២ដើម។ អ្នកដែលបាញ់ខ្ញុំនោះ ឈ្មោះ ថាល បាញ់នឹងកាំភ្លើងខ្លី បាញ់២គ្រាប់ បាញ់នឹងដី ចម្ងាយប្រហែលជា ២ម៉ែត្រពីខ្លួនខ្ញុំ»។
ស្រ្ដីនៅក្នុងហេតុការណ៍ដែលសុំមិនបញ្ចេញឈ្មោះ បានឲ្យដឹងថា នៅល្ងាចថ្ងៃទី២៤ តុលានោះ ក្រោយការអារផ្ដួលរំលំផ្ទះ ហើយមន្រ្តីអភិរក្សបានបាញ់គំរាមនៅពេលដែលប្រជាពលរដ្ឋចូលទៅតវ៉ា។ ហើយនៅព្រឹកថ្ងៃទី២៥ តុលា ក្រុមអភិរក្សបានទៅបំផ្លាញបង្ហើយលំនៅនោះទៀត ៖ «ឈ្មោះ ថាល ឈ្មោះ ខា មួយទៀត។ ដល់ភ្លាមគេយកម៉ាស៊ីនត្រង់ស៊ីន័រ កាត់រោង ដល់ពេលស្អែកឡើង ម្ចាស់ផ្ទះគាត់ហ្នឹងទៅផ្គុំៗនៅទៀត គេមករំលំបន្ថែមទៀត យកសាំងយកអីចាក់ដុតបង្ហើយតែម្ដង ដុតទាំងខោអាវផ្ទះគាត់ទៀត»។
មិនអាចទំនាក់ទំនងសុំការបំភ្លឺសុំការបំភ្លឺពីមន្រ្តីអភិរក្សដែនជម្រកសត្វព្រៃបានទេ នៅថ្ងៃអាទិត្យនេះ ប៉ុន្តែអភិបាលស្រុកស្នួល គឺលោក អ៊ីវ សោភុម បានបំភ្លឺថា ក្រុមអភិរក្សដែនជម្រក ទោះជាមានបាញ់ ឬក៏ចាប់ប្រជាពលរដ្ឋ ក៏ពុំដែលឆ្លងឲ្យលោកដឹងដែរ ប៉ុន្តែលោកនឹងការពារសិទ្ធិរបស់ប្រជាពលរដ្ឋ។
លោក អ៊ីវ សោភុម មានប្រសាសន៍ដូច្នេះថា ៖ «ត្រូវតែគិតគូរអំពីសុខទុក្ខរបស់ប្រជាពលរដ្ឋហើយ ហើយមិនឲ្យអ្នកណាដែលប្រើអំពើហិង្សាទៅលើប្រជាពលរដ្ឋទេ ហើយបើសិនជាបងប្អូនណា ដែលគាត់អនុវត្តខុសឆ្គង អាហ្នឹងក៏ទទួលខុសត្រូវទៅ»។
កាលពីថ្ងៃទី៧ ខែមិថុនា ប្រជាពលរដ្ឋនៅភូមិវាល៣ ឃុំពីរធ្នូ ចំនួន ៦០នាក់ បានផ្ដិតមេដៃលើពាក្យបណ្ដឹងចោទប្រកាន់មន្រ្តីបរិស្ថាន ដាក់ជូនទៅអាជ្ញាធរខេត្ត ដោយចោទថា ក្រុមបរិស្ថាន ១៣នាក់ ប្រដាប់ដោយអាវុធ ៧ដើម បានចុះទៅរុះរើផ្ទះអ្នកស្រុក ហើយបាញ់គំរាមមនុស្ស ២នាក់ ថែមទាំងចាប់ចងប្រតែងគ្នា ហើយជំរិតទារប្រាក់ជាថ្នូរទៅនឹងការដោះលែងវិញ ដែលបញ្ហានេះ រហូតមកទល់នឹងពេលនេះ គេនៅតែសង្កេតឃើញមានដដែល៕