តម្លៃទំនិញហូបចុកនៅទីផ្សារខេត្តក្រចេះ ថ្ងៃអាទិត្យ ទី១០ សីហានេះ អង្ករល្អ មួយគីឡូក្រាម ២.៨០០រៀល សាច់ជ្រូកបីជាន់ ១៦.៥០០រៀល សាច់គោ ២៤.០០០រៀល សាច់មាន់ធ្វើស្រាប់ ២២.០០០រៀល ត្រីឆ្ដោរ ១៥.០០០រៀល។ ឯតម្លៃគ្រឿងទេស កាន់តែឡើងថ្លៃទៅវិញ ដូចជា ស្ករស មួយគីឡូក្រាម ២២០០រៀល ប៊ីចេងមួយកញ្ចប់តូច ពីមុនធ្លាប់តែ ៥០០ ទៅ ៧០០រៀល ឥឡូវឡើងដល់ ១ពាន់រៀល ដែលបញ្ហានេះ ស្រ្តីនៅភូមិដូនជ្រាំ ឃុំក្រចេះថា នេះជាកង្វល់របស់មេផ្ទះគ្រប់ៗរួប។
ស្ត្រីរូបនោះមានប្រសាសន៍ដូច្នេះថា ៖ «ព្រួយបារម្ភគ្រប់តែគ្នាតែម្ដង មិនមែនតែខ្ញុំម្នាក់ទេ ស្រីៗផ្សេងៗទៀត នៅផ្សារប្រជុំគ្នារឿងទំនិញ ឡើងថ្លៃហ្នឹងតែម្ដង»។
ស្រ្ដីម្នាក់លក់ម្ហូបចំអិនស្រាប់នៅឃុំហានជ័យ ស្រុកឆ្លូង បានឲ្យដឹងថា អង្ករ ត្រី សាច់ មានតម្លៃខុសគ្នា ប្រមាណតែ ១០០រៀលប៉ុណ្ណោះ បើប្រៀបធៀបទៅនឹងទំនិញនៅទីផ្សារខេត្តក្រចេះ ដែលបញ្ហានេះ អ្នកស្រីត្រូវសម្រេចចិត្តលក់ក្នុងតម្លៃដដែល ប៉ុន្តែបន្ថយចំនួនម្ហូប ៖ «ធ្លាប់ដួសពីរវែកអ៊ីចឹង យើងដួសមួយវែកកន្លះ។ គេចេះតែស្រែកថា លក់ថ្លៃម៉្លេះ? មិនថ្លៃយ៉ាងម៉េច បើអីវ៉ាន់ឥឡូវ ឡើងថ្លៃ»។
គ្រូបង្រៀននៅវិទ្យាល័យព្រះកុសមៈ បានត្អូញត្អែរថា តម្លៃប្រេងសាំងដែលមុនបោះឆ្នោតមានតម្លៃ ៥.៤០០ ទៅ ៥.៥០០រៀល លុះបោះឆ្នោតភ្លាម ឡើងដល់ ៥.៨០០រៀល មានថ្ងៃមួយដល់ទៅ ៦ពាន់រៀល តែបច្ចុប្បន្ននៅនឹង ត្រឹមតែ ៥.៧០០រៀល។
លោកបានអះអាងថា ប្រាក់ខែរត់តាមតម្លៃទំនិញមិនទាន់ ទោះបីជាមានការប្រកាសឲ្យដំឡើងប្រាក់ខែខ្លះក៏ដោយ ៖ «ធ្វើម៉េចឲ្យមានតុល្យភាព រវាងចំណូលនិងចំណាយ។ ឲ្យរដ្ឋាភិបាលគិតពីបញ្ហាទឹក ភ្លើង អាហារហូបចុកប្រចាំថ្ងៃ សេវាសុខភាពគ្រប់គ្រាន់ អាហ្នឹងទៅជាប្រាក់ខែ គាត់បន្ថែមបន្តិចបន្តួច ហៅថាប្រាក់ឧបត្ថម្ភ វាមិនគ្រប់គ្រាន់សម្រាប់មន្រ្តីរាជការ ដូចគ្រូបង្រៀន យើងខ្ញុំទេ»។
ការដំឡើងថ្លៃប្រេងសាំង ធ្វើឲ្យមានការឡើងថ្លៃជាវអគ្គិសនី ដែលមុនការបោះឆ្នោតគេបានកំណត់តម្លៃ ១.៨០០រៀល ក្នុងមួយគីឡូវ៉ាត់ បានចំនួន ២ខែ តែក្រោយការបោះឆ្នោតគេដំឡើងដល់ទៅ ២.៦៥០រៀល ធ្វើឲ្យប្រជាពលរដ្ឋមួយចំនួនថា នឹងប្ដឹងតវ៉ាទៅមន្រ្តីទទួលបន្ទុកការងារខេត្តក្រចេះ។
តម្លៃប្រេងសាំង ត្រូវបានរដ្ឋាភិបាលប្រកាសមុនការបោះឆ្នោតថា បានធ្វើសម្បទានជាច្រើនលានដុល្លារក្នុងមួយខែៗ ដើម្បីឲ្យតម្លៃប្រេងចុះទាប ប៉ុន្តែរហូតមកទល់នឹងពេលនេះ តម្លៃប្រេងនៅតែមានការកើនឡើងដដែល។
តំណាងរាស្រ្ដទាំងពីរគណបក្ស ដែលជាប់ឆ្នោតនិងអាជ្ញាធរខេត្ត មិនអាចសុំការបំភ្លឺបានទេ នៅថ្ងៃអាទិត្យនេះ ដោយទូរស័ព្ទរោទិ៍ជាច្រើនដង តែពុំមានអ្នកទទួល៕