ទាក់ទងទៅនឹងបញ្ហានេះ រដ្ឋាភិបាលមិនទាន់មានជំហរច្បាស់លាស់នៅឡើយរហូតមកទល់ពេលនេះ ទៅលើករណីសមត្ថកិច្ចខែត្រក្រចេះ បាញ់សម្លាប់កុមារី ហេង ចន្ថា នៅក្នុងប្រតិបត្តិការបង្ក្រាបទៅលើក្រុមប្រជាពលរដ្ឋ ដែលរដ្ឋាភិបាលចោទប្រកាន់ថា ជាក្រុមប៉ុនប៉ងធ្វើអបគមន៍នោះ។
អស់រយៈពេលជាង១សប្ដាហ៍កន្លងមកហើយ ជនល្មើសសម្លាប់កុមារី ហេង ចន្ថា នៅខែត្រក្រចេះ កំពុងស្ថិតនៅក្រៅសំណាញ់ច្បាប់នៅឡើយ។ រដ្ឋាភិបាលមិនទាន់ចេញសេចក្ដីប្រកាសដើម្បីតាមចាប់ខ្លួនជនដៃដល់យកមកផ្ដន្ទាទោសនោះទេ។
ក្រុមអង្គការសង្គមស៊ីវិលបានថ្កោលទោសចំពោះទង្វើរបស់អាជ្ញាធរខែត្រក្រចេះ និងបានចាត់ទុកទង្វើនេះថា ជាអំពើមួយប្រឆាំងទៅនឹងអនុសញ្ញាអន្តរជាតិស្ដីពីសិទ្ធិកុមារ ដែលរដ្ឋាភិបាលកម្ពុជា បានផ្ដល់សច្ចាប័នរួចហើយនោះ។
កុមារី ហេង ចន្ថា មានអាយុ ១៤ឆ្នាំ ត្រូវគ្រាប់កាំភ្លើងនៅក្នុងផ្ទះទាំងមិនដឹងខ្លួន កាលពីថ្ងៃទី១៦ ខែឧសភា ឆ្នាំ២០១២ ហើយនាងបានស្លាប់នៅតាមផ្លូវ នៅពេលគេដឹកជញ្ជួនទៅកាន់មន្ទីរពេទ្យទាំងក្ដីអាឡោះអាល័យពីក្រុមគ្រួសាររបស់នាង និងមនុស្សទូទៅក្ដី ប៉ុន្តែអ្វីដែលជាបញ្ហាចោទទៅទៀតនោះ ក្រុមគ្រួសាររបស់នាងកំពុងស្ថិតនៅក្នុងភាពភ័យខ្លាចនៅពេលបច្ចុប្បន្ន។
ឪពុកកុមារីរងគ្រោះលោក ហេង គឹមលាង បានរៀបរាប់ទាំងភាពភ័យខ្លាចថា ទោះបីជាលោកបានបាត់បង់កូនជាទីស្រឡាញ់ទាំងនៅវ័យកុមារភាពទៅហើយក្ដី ប៉ុន្តែលោកនៅតែប្រឈមនឹងភាពភ័យខ្លាចទៅវិញ។ លោក ហេង គឹមលាង បានលើកឡើងថា ទោះបីជាលោកស្ថិតនៅក្នុងភាពភ័យខ្លាចយ៉ាងនេះក្ដី ប៉ុន្តែលោកទាមទារឲ្យរដ្ឋាភិបាលជួយរកយុត្តិធម៌ជួនកូនស្រីរបស់លោក។
កុមារី ហេង ចន្ថា ត្រូវគ្រាប់កាំភ្លើងស្លាប់នៅពេលកម្លាំងចម្រុះរបស់រដ្ឋាភិបាលខែត្រក្រចេះ រាប់រយនាក់ បានចុះធ្វើប្រតិបត្តិការបង្ក្រាបទៅលើក្រុមរបស់លោក ប៊ុន រដ្ឋា ដែលរដ្ឋាភិបាលបានចោទប្រកាន់ក្រុមនេះថា ជាក្រុមប៉ុនប៉ងចង់ធ្វើអបគមន៍ នៅភូមិប្រម៉ា ឃុំកំពង់ដំរី ស្រុកឆ្លូង ខែត្រក្រចេះ កាលពីថ្ងៃទី១៦ ខែឧសភា។
ភ្ជាប់ទៅនឹងបញ្ហានេះ ក្រុមអង្គការសង្គមស៊ីវិលបានចេញសេចក្ដីថ្លែងការណ៍រួមគ្នាមួយ កាលពីថ្ងៃទី២៣ ខែឧសភា អំពាវនាវឲ្យរដ្ឋាភិបាលត្រូវតែចាប់ខ្លួនជនដៃដល់បាញ់សម្លាប់កុមារី ហេង ចន្ថា នេះ យកមកផ្ដន្ទាទោសតាមច្បាប់ឲ្យបាន ដើម្បីឆ្លុះបញ្ចាំងអំពីនិទណ្ឌភាព ឬហៅថា ភាពគ្មានទោសពៃរ៍នៅកម្ពុជា។
ការបាញ់សម្លាប់កុមារី ហេង ចន្ថា នេះ នៅបន្ទាប់ពីសមត្ថកិច្ចខែត្រកោះកុង បានបាញ់សម្លាប់សកម្មជនការពារព្រៃឈើ លោក ឈុត វុទ្ធី និងមន្ត្រីកងរាជអាវុធហត្ថ អ៊ិន រតនា កាលពីចុងខែមេសា កន្លងទៅនេះ។
ប្រធានអង្គការជំនួយផ្លូវច្បាប់ដល់កុមារ និងស្ត្រី អ្នកស្រី លី វិជ្ជតា មានប្រសាសន៍ថា ការអនុវត្តរបស់កម្លាំងចម្រុះខែត្រក្រចេះនេះ ជាការរំលោភច្បាប់ និងរំលោភសិទ្ធិកុមារ ហើយករណីទាំងនេះរដ្ឋាភិបាលជាអ្នកទទួលខុសត្រូវ។
សេចក្ដីថ្លែងការណ៍ដែលមានអង្គការសង្គមស៊ីវិលចំនួនបី បានចុះហត្ថលេខារួមគ្នានោះ គឺអង្គការសីលការ អង្គការជំនួយផ្លូវច្បាប់ដល់កុមារ និងស្ត្រី និងអង្គការយេនឌ័រ និងអភិវឌ្ឍន៍ដើម្បីកម្ពុជា បានសម្ដែងក្ដីព្រួយបារម្ភកាន់តែខ្លាំងពីការរើសអើងទៅលើស្ត្រី និងកុមារី ដែលប្រព្រឹត្តឡើងដោយមន្ត្រីអនុវត្តច្បាប់។
នៅក្នុងសេចក្ដីថ្លែងការណ៍នោះ បានទទូចឲ្យរដ្ឋាភិបាលធ្វើការស៊ើបអង្កេតមួយដោយឯករាជ្យជាបន្ទាន់ ចំពោះករណីនេះ ដើម្បីកំណត់ថា តើកុមារី ហេង ចន្ថា រងគ្រោះដោយរបៀបណា ដោយអ្នកណា និងដោយសារមូលហេតុអ្វី? ហើយរដ្ឋាភិបាលកម្ពុជា ត្រូវមានកាតព្វកិច្ចតាមផ្លូវច្បាប់ ដើម្បីធានាថា ជនល្មើសដែលប្រព្រឹត្តបទឧក្រិដ្ឋនេះ ត្រូវនាំយកមកកាត់ទោសចំពោះមុខច្បាប់។
ឆ្លើយតបទៅនឹងបញ្ហានេះ អភិបាលខែត្រក្រចេះ លោក ស ចំរុង បានអះអាងថា អាជ្ញាធរខែត្រកំពុង ធ្វើការស៊ើបអង្កេតលើករណីនេះហើយ ប៉ុន្តែលោកមិនបានបញ្ជាក់ច្បាស់លាស់អំពីបញ្ហានេះទេ។
មន្ត្រីនាំពាក្យក្រសួងមហាផ្ទៃ លោក ខៀវ សុភ័គ បានឲ្យដឹងកាលពីថ្ងៃទី១៦ ខែឧសភា បន្ទាប់ពីកើតហេតុភ្លាមៗថា រដ្ឋាភិបាលទទួលខុសត្រូវចំពោះករណីកុមារី ហេង ចន្ថា ស្លាប់នៅក្នុងប្រតិបត្តិការនេះ។
រហូតមកទល់ពេលនេះ ក្រុមគ្រួសារជនរងគ្រោះបានឲ្យដឹងថា រដ្ឋមន្ត្រីក្រសួងមហាផ្ទៃ បានផ្ដល់ថវិកាចំនួន ៥០០ដុល្លារ និងអភិបាលខែត្រប្រមាណ ២៥០ដុល្លារទៀត ដើម្បីធ្វើបុណ្យសពកុមារី ហេង ចន្ថា។
ទោះបីជាយ៉ាងណាក៏ដោយ អាជ្ញាធរខែត្របានយាមយ៉ាងតឹងរ៉ឹងបំផុតនៅពេលគ្រួសាររបស់ ហេង ចន្ថា បានធ្វើបុណ្យនាងកាលពីថ្ងៃទី១៧ ខែឧសភា នោះ សមត្ថកិច្ចហាមមិនឲ្យអ្នកសារព័ត៌មាន មន្រ្តីសិទ្ធិមនុស្សជាតិ អន្តរជាតិ ទៅចូលរួមបុណ្យសពនោះទេ។
ប្រធានអង្គការយេនឌ័រ និងអភិវឌ្ឍន៍ដើម្បីកម្ពុជា អ្នកស្រី រស់ សុភាព បានពន្យល់ថា ការអនុវត្តរបស់រដ្ឋាភិបាលនេះជារឿងខុសច្បាប់ និងផ្ទុយពីអ្វីដែលរដ្ឋាភិបាលបានចុះហត្ថលេខាលើសន្ធិសញ្ញាស្ដីពីសិទ្ធិមនុស្ស និងសិទ្ធិកុមារ ដូច្នេះរដ្ឋាភិបាលត្រូវតែពិចារណាឡើងវិញចំពោះករណីនេះ។
មាត្រា៦ នៃអនុសញ្ញាអន្តរជាតិស្ដីពីសិទ្ធិកុមារបានចែងថា រដ្ឋភាគីទទួលស្គាល់ថា កុមារគ្រប់រូបមានសិទ្ធិរស់រានមានជីវិតជាប់ពីកំណើត។ រដ្ឋភាគីត្រូវធានាក្នុងកម្រិតអតិបរមា តាមដែលអាចធ្វើទៅបាន ចំពោះការរស់រាន និងការលូតលាស់របស់កុមារ។
បន្ថែមពីលើនេះ ក្រុមអ្នកឃ្លាំមើលសិទ្ធិមនុស្សបានលើកឡើងថា ប្រទេសកម្ពុជា ត្រូវស្ថិតនៅក្រោមផ្លូវច្បាប់មួយនេះ ដើម្បីធានាថា កុមារទាំងអស់ត្រូវបានការពារឲ្យរួចផុតពីការធ្វើទុក្ខបុកម្នេញទាំងឡាយ មិនមែនឲ្យកុមាររងគ្រោះពីភ្នាក់ងាររបស់រដ្ឋណាមួយនោះទេ។
ប្រធានអង្គការសីលការ អ្នកស្រី ធីដា ឃិះ បានពន្យល់ថា រដ្ឋាភិបាល ឬតុលាការត្រូវតែអនុវត្តច្បាប់ឲ្យមានតម្លាភាពចំពោះប្រជាពលរដ្ឋទូទៅ ដើម្បីឲ្យប្រជាពលរដ្ឋមានទំនុកចិត្តថា ប្រជាពលរដ្ឋរស់នៅក្នុងសង្គមដែលមានច្បាប់ការពារ និងមិនស្ថិតនៅក្នុងភាពភ័យខ្លាច។
ក្រុមអ្នកឃ្លាំមើលសិទ្ធិមនុស្សបានបញ្ជាក់ទៀតថា ប្រទេសកម្ពុជា កំពុងស្ថិតនៅក្នុងភាពអនាធិបតេយ្យលើការប្រើប្រាស់អាវុធ ដើម្បីបង្ក្រាបទៅលើប្រជាពលរដ្ឋស្លូតត្រង់នៅក្នុងការតវ៉ាទាមទារសិទ្ធិរស់រានមានជីវិតសមរម្យនោះ។
របាយការណ៍របស់សមាគមសិទ្ធិមនុស្សអាដហុក បានសរសេរថា នៅក្នុងរយៈពេល ៥ខែ ដើមឆ្នាំ២០១២ មានអំពើហិង្សាប្រើអាវុធយ៉ាងតិច ៤ករណី និងធ្វើឲ្យមនុស្សស្លាប់ដោយការបាញ់ប្រហារនោះចំនួនបីនាក់ និងចាប់ខ្លួនប្រមាណ ២៤នាក់។
អង្គការសង្គមស៊ីវិលបញ្ជាក់ថា សហគមន៍ជាតិ និងអន្តរជាតិមានការភ្ញាក់ផ្អើលជាខ្លាំងចំពោះរដ្ឋាភិបាល មិនអាចគ្រប់គ្រងលើកងកម្លាំងយោធា និងប៉ូលិស ដែលប្រើហិង្សាបង្ក្រាបអ្នកតវ៉ា ដើម្បីការពារប្រយោជន៍ក្រុមហ៊ុនឯកជននោះ។ បញ្ហាទាំងនេះរដ្ឋាភិបាលកម្ពុជា កំពុងតែបង្ហាញគំរូអាក្រក់ដល់ប្រទេសជាសមាជិកនៅក្នុងតំបន់អាស៊ាន ក្នុងឋានៈខ្លួនជាប្រធានសមាគមអាស៊ាននោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។