តំបន់រមណីយដ្ឋានអន្លង់ផ្សោតកាំពី នាខេត្តក្រចេះបានទាក់ទាញភ្ញៀវទេសចរឲ្យចូលមកទស្សនាមានចំនួនកើតច្រើនក្នុងពិធីបុណ្យចូលឆ្នាំចិន និងវៀតណាមឆ្នាំនេះ។ ប៉ុន្តែភ្ញៀវទេសចរដែលចូលមកទស្សនាតំបន់នេះ បានរអ៊ូរទាំថា តម្លៃម្ហូបអាហារ ឬកន្លែងអង្គុយលំហែកាយបានកើនតម្លៃខ្ពស់។
អ្នកទេសចរមិនបង្ហាញអត្តសញ្ញាណម្នាក់ដែលបាននាំក្រុមគ្រួសារចូលទៅទស្សនាតំបន់អន្លង់ផ្សោតកាំពី។ លោកបានសំណូមពរឲ្យអាជ្ញាធរខេត្ត ឬមន្ទីរទេសចរណ៍ខេត្តក្រចេះ ត្រូវណែនាំចំពោះតម្លៃសេវាគ្រប់ប្រភេទកុំឲ្យកើនខ្ពស់នាថ្ងៃបុណ្យជាតិ ឬថ្ងៃបុណ្យផ្សេងៗ ដើម្បីទាក់ទាញភ្ញៀវទេសចរចូលមកទស្សនាខេត្តនេះបានច្រើននាថ្ងៃអនាគត។
មន្ត្រីសហគមន៍ទេសចរណ៍ប្រចាំការតំបន់រមណីយដ្ឋានអន្លង់ផ្សោតកាំពីបានឲ្យដឹងថា ក្នុងរយៈពេលបីថ្ងៃនៃពិធីបុណ្យចូលឆ្នាំចិនវៀតណាម គឺមានភ្ញៀវចូលទស្សនារមណីយដ្ឋាននេះក្នុង ១ថ្ងៃៗ ប្រមាណពី ២ពាន់ ទៅជិត ៣ពាន់នាក់។
មន្ត្រីសហគមន៍ទេសចរណ៍មិនបញ្ចេញឈ្មោះបានបញ្ជាក់ថា មូលហេតុដែលពួកគេដំឡើងតម្លៃសេវាផ្សេងៗ ក្នុងថ្ងៃបុណ្យចូលឆ្នាំចិនវៀតណាម ដោយសារតែសហគមន៍បានចំណាយថវិកាអស់ច្រើនក្នុងការអភិវឌ្ឍតំបន់ទេសចរណ៍មួយនេះឲ្យមានសោភណភាពល្អ។ មួយផ្នែកទៀត មានមន្ត្រីជំនាញមកពីច្រើនផ្នែកនៃសាលាខេត្តក្រចេះ បានមកកោសរូសលុយកាក់ពីសហគមន៍ច្រើនស្ថាប័នពេក។
ទាក់ទងបញ្ហានេះ លោក នុត គឹមសាន ជាមន្ត្រីសម្របសម្រួលគណៈកម្មាធិការអភិរក្ស និងអភិវឌ្ឍន៍ទេសចរណ៍សត្វផ្សោតទន្លេមេគង្គ។ លោកបានឲ្យដឹងថា សហគមន៍នេះបានរៀបចំតូបចំនួនជាង ២រយតូប ក្នុងឱកាសបុណ្យចូលឆ្នាំចិន និងវៀតណាម ដោយកំណត់តម្លៃតូបក្នុង ១តូបតម្លៃ ៥០០០រៀល។
លោក រ៉ុន ភារ៉ា ជាប្រធានមន្ទីរទេសចរណ៍ខេត្តក្រចេះ។ លោកមានប្រសាសន៍ថា មន្ទីរបានណែនាំដល់អាជីវករនៅសហគមន៍ទេសចរណ៍ពីការកំណត់តម្លៃសេវាលក់ដូរក្នុងតំបន់អន្លង់ផ្សោតកាំពីនេះដែរ។
ចំណែកលោក ខាំ ភឿន ជាអភិបាលខេត្តក្រចេះ។ លោកបានឲ្យដឹងថា សាលា និងស្ថាប័នពាក់ព័ន្ធតែងបានណែនាំពីក្រុមអាជីវករក្នុងការកំណត់តម្លៃសេវាផ្សេងៗ ឲ្យមានតម្លៃថេរ បើទោះថ្ងៃបុណ្យ ឬថ្ងៃចុងសប្ដាហ៍ក្ដី ដើម្បីទាក់ទាញភ្ញៀវទេសចរចូលមកទស្សនាតំបន់នេះបានកាន់តែច្រើននាថ្ងៃអនាគត។
មន្ត្រីមន្ទីរទេសចរណ៍ខេត្តក្រចេះបានឲ្យដឹងថា ខេត្តនេះមានតំបន់រមណីយដ្ឋានវប្បធម៌ប្រវត្តិសាស្ត្រ វប្បធម៌ធម្មជាតិ និងរមណីយដ្ឋានកែឆ្នៃសរុបមានចំនួន ១៦កន្លែង ដើម្បីបម្រើឲ្យភ្ញៀវជាតិ និងអន្តរជាតិចូលទស្សនា។ ហើយថា កំណើនភ្ញៀវទេសចរទាំងជាតិ និងអន្តរជាតិដែលចូលមកទស្សនាខេត្តក្រចេះនាឆ្នាំ២០១១ មានកំណើនខ្ពស់ជាងឆ្នាំ២០១០។
រមណីយដ្ឋានអន្លង់ផ្សោតកាំពី មានទីតាំងស្ថិតក្នុងស្រុកចិត្តបុរី មានចម្ងាយប្រមាណ ១៣គីឡូម៉ែត្រ ពីទីរួមខេត្តក្រចេះ។ រមណីយដ្ឋាននេះមានបម្រើដល់ភ្ញៀវទេសចរទស្សនាសត្វផ្សោត ភ្ញៀវអាចងូតទឹកកម្សាន្តក្នុងទន្លេមេគង្គ សម្រាកលម្ហែតាមតូបសង់តាមជ្រលងទឹក និងមានមាន់ដុត ឬត្រីដុត ដែលប្រជាសហគមន៍ចិញ្ចឹមតាមបែបធម្មជាតិក្នុងទន្លេមេគង្គ និងបឹងធម្មជាតិថែមទៀត៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។