អ្នកនាំពាក្យនៃសាលាក្តីខ្មែរក្រហម លោក រាជ សម្បត្តិ បានមានប្រសាសន៍ថា លោក នួន ជា និងលោក ខៀវ សំផន បានត្រូវគេនាំចូលទីឃុំឃាំងវិញហើយ បន្ទាប់ពីបានត្រូវគ្រូពេទ្យពិនិត្យសុខភាព។
លោក រាជ សម្បត្តិ មានប្រសាសន៍បន្ថែមថា លោក អៀង សារី ក៏ត្រូវចូលឲ្យគ្រូពេទ្យពិនិត្យក្នុងសប្តាហ៍នេះដែរ ៖ «ថ្ងៃនេះ គឺលោក នួន ជា និងលោក ខៀវ សំផន ត្រូវបានលោកគ្រូពេទ្យយកគាត់ទៅដើម្បីពិនិត្យ ហើយពួកគាត់បានវិលត្រឡប់មកកាន់កន្លែងឃុំឃាំងវិញអស់ហើយ ហើយបន្ទាប់ពីនេះទៀត គឺលោក អៀង សារី ក៏នឹងត្រូវយកទៅដែរ នៅក្នុងអាទិត្យហ្នឹងដែរ។ ហើយពួកគាត់មានស្ថានភាពដូចគ្នា បានន័យថា ត្រូវមានការត្រួតពិនិត្យដែលវិទ្យាសាស្រ្ដពេទ្យ គឺត្រូវតាមដានអ៊ីចឹងរាល់ប្រមាណខែម្ដង តាមការកំណត់។ ទាំងអស់ហ្នឹង ត្រូវត្រួតពិនិត្យសុខភាពឡើងវិញ បានន័យថា គ្រូពេទ្យហ្នឹងគាត់មានភារកិច្ចត្រូវមើលជាប្រចាំទៅលើសុខភាពរបស់ពួកគាត់ ប៉ុន្តែមិនមែនបានន័យថា ពួកគាត់មានជំងឺអីដែលជាការកត់សម្គាល់ ត្រូវបង្ខំឲ្យគ្រូពេទ្យយកគាត់ទៅពិនិត្យសុខភាពទេ»។
សូមជម្រាបថា មកដល់ពេលនេះ មានអតីតមេខ្មែរក្រហមទាំងអស់ ៥នាក់ ដែល ២នាក់ទៀត គឺ កាំងហ្កិច អ៊ាវ ហៅ ឌុច និងលោកស្រី អៀង ធីរិទ្ធ ដែលកំពុងស្ថិតនៅក្នុងមន្ទីរឃុំឃាំងរង់ចាំការជំនុំជម្រះទោស៕