អៀង សារី-អៀង ធីរិទ្ធ ត្រូវបានអនុញ្ញាតឲ្យជួបគ្នាម្ដងក្នុង១សប្ដាហ៍

ដោយ ម៉ៅ សុធានី

2008-05-06

អតីតឧបនាយករដ្ឋមន្ត្រីខ្មែរក្រហម អៀង សារី និងភរិយា អៀង ធីរិទ្ធ ដែលជាអតីតរដ្ឋមន្ត្រីក្រសួងសង្គមកិច្ច បានត្រូវតុលាការខ្មែរក្រហមយល់ព្រមឲ្យជួបគ្នា ៤៥នាទី ក្នុងនាមជាប្តីប្រពន្ធ ម្តងក្នុងមួយសប្ដាហ៍ នាខណៈកំពុងជាប់ក្នុងមន្ទីរឃុំឃាំង រង់ចាំការកាត់សេចក្តីពីបទឧក្រិដ្ឋកម្មប្រឆាំងមនុស្សជាតិ និងឧក្រិដ្ឋកម្មសង្គ្រាម ក្នុងរបបកម្ពុជាប្រជាធិបតេយ្យខ្មែរក្រហម ។

AFP Photo

ក្នុងរូបថតឯកសារថតនៅថ្ងៃទី ៣ កក្កដា ២០០៣ អៀង សារី (ឆ្វេង) និងភរិយា អៀង ធីរិទ្ធ ចូលរួមបុណ្យសពរបស់ភរិយាទី១របស់ប៉ុលពត នៅក្រុងប៉ៃលិន។

មេធាវី អៀង ធីរិទ្ធ បានមានប្រសាសន៍ថា កូនក្តីរបស់ខ្លួនបានស្នើសុំផ្ទាល់មាត់ទៅសហចៅក្រមស៊ើបអង្កេតនៃតុលាការខ្មែរក្រហម កាលពីថ្ងៃ១៣ ខែមីនា កន្លងមកនេះ ដើម្បីជួបជាមួយស្វាមី អៀង សារី ២ដង ក្នុងមួយសប្តាហ៍ ក៏ប៉ុន្តែ សហចៅក្រមស៊ើបអង្កេតអនុញ្ញាតឲ្យ អៀង ធីរិទ្ធ ជួប អៀង សារី តែម្តងទេ ក្នុងមួយសប្តាហ៍ រយៈពេល៤៥នាទី ។

លោក អាង ឧត្តម មេធាវីការពារក្តីឲ្យ អៀង សារី បានមានប្រសាសន៍ថា លោកពុំដឹងថាតើតុលាការខ្មែរក្រហមនឹងអនុញ្ញាតឲ្យអ្នកទាំងពីរជួបគ្នារយៈពេលយូរ ប៉ុន្មាននោះឡើយ ។

លោកមេធាវី អាង ឧត្តម បន្តថា ជាធម្មតាគឺជាការលំបាកក្នុងលក្ខណៈដែលស្វាមីភរិយា រស់នៅបែកគ្នាពុំអាចជួបនិយាយគ្នាឬឃើញមុខគ្នា ។ ការរស់នៅបែកគ្នាដូច្នេះ វានឹងនាំឲ្យប៉ះពាល់ យ៉ាងធ្ងន់ដល់សតិអារម្មណ៍របស់គេ ។

សូមរំឭកជូនថា ក្នុងរបបកម្ពុជាប្រជាធិបតេយ្យខ្មែរក្រហម ពីឆ្នាំ១៩៧៥ ដល់ ១៩៧៩ ប្រជាពលរដ្ឋខ្មែរជិត ២លាននាក់ បានស្លាប់ដោយសារឈឺអត់អាហារ ដោយធ្វើការបាក់កម្លាំង និងដោយការកាប់សម្លាប់ ។

ប្រជាពលរដ្ឋរាប់លាននាក់ ដែលបានជម្លៀសចេញពីភ្នំពេញនិងចេញពីទីក្រុងមួយចំនួននៅតាមបណ្តាខេត្តខ្លះ បានត្រូវមេខ្មែរក្រហម ចាត់តាំងឲ្យទៅនៅទីកន្លែងផ្សេងៗពីគ្នា សូម្បីប្តីប្រពន្ធនិងកូនចៅ ក៏ត្រូវរស់នៅបែកគ្នា មិនដែលឃើញមុខនិងជួបគ្នា ទាល់តែសោះ រហូតដល់របបខ្មែរក្រហមដួលរំលំ នៅឆ្នាំ១៩៧៩ ទើបប្រជាពលរដ្ឋបានដឹងថា សមាជិកគ្រួសារណាស្លាប់ឬនៅរស់ ៕

បោះពុម្ព អ៊ីម៉េល