ដើម្បីប្រាប់ និងអប់រំដល់មនុស្សជំនាន់ក្រោយ អោយដឹងនូវព្រឹត្តិការណ៍ ដែលបានកើតឡើងនៅក្នុងយុគដ៏ខ្មៅងងឹតនោះ សហគមន៍ខ្មែរមួយ នៅសហរដ្ឋអាមេរិក កំពុងខិតខំប្រមូលឯកសារទាំងឡាយ ដែលទាក់ទងនឹងរបបខ្មែរក្រហម ចងក្រងទុកជាឯកសារប្រវត្តិសាស្ត្រ។
រហូតមកដល់ពេលនេះ គឺមានរយៈពេលជាង ៣០ ឆ្នាំហើយ ចាប់តាំងពីរបបខ្មែរក្រហមដួលរលំ។ បើទោះបីជាមានមនុស្សជាច្រើន នៅក្នុងពិភពលោក បានដឹងឮពីសោកនាដកម្ម ដែលកើតឡើងក្នុងរបបខ្មែរក្រហមក៏ដោយ ក៏នៅមានមនុស្សច្រើនណាស់ទៀត រួមទាំងកូនខ្មែរផង ជាពិសេស អ្នកដែលកើតក្រោយរបបខ្មែរក្រហម នៅពុំបានដឹងរឿងរ៉ាវស៊ីជម្រៅ ឬស្ដាប់ឮពីអតីតជនរងគ្រោះអំពីអ្វី ដែលកើតឡើងក្នុងរបបវាលពិឃាដនោះទេ។
ដើម្បីជាជំនួយក្នុងទិសដៅអប់រំ និងស្រាវជ្រាវអំពីប្រវត្តិខ្មែរក្រហម សហគមន៍ខ្មែរ នៅទីក្រុងឡង ប៊ិច រដ្ឋ California រួមគ្នាជាមួយពលរដ្ឋខ្មែរនៅទីក្រុង ឡូវ៉ែល (រដ្ឋ) កំពុងផ្តួចផ្តើមគំនិតចងក្រងឯកសារ ដោយបង្កើតជាប័ណ្ណសារ ពិសេសមួយ តាមប្រព័ន្ធអេឡិចត្រូចនិច ដែលដាក់ចំណងជើងថា Khmer Rouge Genocidal Library។
ការបង្កើតប័ណ្ណសារពិសេសនេះ គឺដើម្បីរក្សារឿងរ៉ាវពិតៗ ស្តីពីបទពិសោធន៍ជីវិតជូរចត់ និងការរងទារុណកម្មរបស់បុគ្គលម្នាក់ៗ ដែលបានរួចរស់ជីវិតពីរបបខ្មែរក្រហម។
សមាជិកគណៈកម្មការរៀបចំគម្រោង លោក មាស សាម ពលរដ្ឋខ្មែរអាមេរិករស់នៅទីក្រុង ឡូវ៉ែល មានប្រសាសន៍ថា គម្រោងបង្កើតប័ណ្ណសារពិសេសនេះ ជាប្រភពមួយដ៏សំខាន់ ដែលមិនដែលមានពីមុនមក។
លោក មាស សាម៖ «ម្នាក់ៗ បើចង់ដឹងពីប្រវត្តិសាស្ត្រខ្មែរក្រហមអញ្ចឹង អាចចូលមកមើលបាន។ គោលបំណងនោះ គឺចង់សម្ភាសជនរងគ្រោះ ពីរឿងរ៉ាវមុនរបបខ្មែរក្រហមចូលស្រុក។ ពីការរស់នៅរបស់គាត់ក្នុងបដិវត្ត ហើយក្រោយពេលដែលខ្មែរក្រហមបានចាកចេញ មានដូចជា ការរស់នៅក្នុងសហរដ្ឋអាមេរិក ដូចជាការរស់នៅក្នុងប្រទេសទី ៣ អ៊ីចឹង ឬក៏ការរស់នៅសព្វថ្ងៃនៅក្នុងប្រទេសខ្មែរយើងហ្នឹង។ យើងចង់ទាក់ទងបងប្អូនខ្មែរយើងរស់នៅក្នុងសហរដ្ឋអាមេរិក និងគ្រប់ប្រទេសព្រមទាំងនៅស្រុកខ្មែរហ្នឹងដែរ»។
ចំណែកសមាជិកជាន់ខ្ពស់ម្នាក់ទៀត នៃគណៈកម្មការស្ថាបនាប័ណ្ណសារនេះ គឺលោក វ៉ាន់ ទូច មានប្រសាសន៍ដែរថា ស្របពេលដែលសាលាក្ដីខ្មែរក្រហមកំពុងដំណើរការនីតិវិធីកាត់សេចក្ដី អតីតមេដឹកនាំខ្មែរក្រហមនៅកម្ពុជា មានសាក្សី ភស្តុតាង និងឯកសារជាច្រើន ក្នុងដំណើរការក្ដីនេះ គណៈកម្មការនឹងយកមកចងក្រងជាឯកសារ បញ្ចូលជាទិន្នន័យរក្សាទុកក្នុងប្រព័ន្ធអេឡិចត្រូចនិចប័ណ្ណសារ Archive នេះដែរ។
លោក វ៉ាន់ ទូច៖ «ដាក់នៅក្នុងបណ្ណាល័យទាំងអស់យើងមាន Library ទាំងអស់ អ្វីដែលចៅក្រមចេញដីកា មានឯកសារផ្សេងៗ ទាំងអស់។ យើងនឹងធ្វើជាលីងជាមួយតុលាការខ្មែរក្រហមហ្នឹងឲ្យមានតម្លាភាព»។
តាមការអោយដឹងពីសមាជិកជាន់ខ្ពស់ម្នាក់ទៀត គឺលោក ឃឿន សំខាន់ គឺគណៈកម្មការចង់ឲ្យជនរងគ្រោះទាំងអស់បង្ហាញដល់ពិភពលោក ឲ្យដឹងតាមរយៈប័ណ្ណសារនេះ អំពីប្រវត្តិរបស់ខ្លួន ដោយបញ្ចូលឯកសារជាការសរសេរជាសំឡេង មានកាសែតវីដេអូ ជារូបថត និងបទសម្ភាសជនរងគ្រោះផងដែរ។
លោក ឃឿន សំខាន់៖ «គោលបំណងធំនៃការបង្កើត Cyber Library ទាក់ទងនឹងប្រវត្តិសាស្ត្រជនរងគ្រោះខ្មែរក្រហមហ្នឹង គឺមានបំណងថាចង់ប្រមូលនូវឯកសារ សំណុំរឿងផ្សេងៗ។ ជាពិសេស ដល់ជនរងគ្រោះទាំងឡាយ ដែលបានឆ្លងកាត់សម័យខ្មែរក្រហម។គោលបំណងធំហ្នឹង ចង់ឲ្យជនរងគ្រោះទាំងអស់អាចនិយាយប្រាប់រឿងរបស់ខ្លួន»។
លោក ឃឿន សំខាន់ បានបន្ថែមទៀតថា ដើម្បីឲ្យមានដំណើរការសម្រាប់ប័ណ្ណសារប្រព្រឹត្តិនេះទៅបានដោយជោគជ័យ គណៈកម្មការគ្រោងនឹងរកថវិកាពីប្រភពផ្សេងៗ ជាច្រើន ដូចជា ពីបណ្ណាល័យជាតិ អន្តជាតិ ពីរដ្ឋាភិបាលអាមេរិក ពីអង្គការក្រៅរដ្ឋាភិបាល និងពីប្រភពឯកជនផ្សេងៗ ទៀត។
ទោះបីជាយ៉ាងណាក៏ដោយ លោកក៏បានបញ្ជាក់ដែរថា គណៈកម្មការនេះក៏មានថវិកាប្រមាណ ៥ ម៉ឺនដុល្លារ តម្កល់ទុកសម្រាប់ត្រៀមចាប់ផ្ដើមដំណើរការ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។