កិច្ចប្រជុំពេញអង្គនឹងត្រូវធ្វើជាសម្ងាត់នៅក្នុងសាលសវនាការសាលាក្តីខ្មែរក្រហម ដោយសាធារណជនមិនអាចដឹងបានថា ការប្រព្រឹត្តទៅនៃកិច្ចប្រជុំមានលក្ខណៈយ៉ាងណានោះទេ។
ក៏ប៉ុន្តែនៅក្នុងសុន្ទរកថាបើកកិច្ចប្រជុំ កាលពីព្រឹកថ្ងៃទី៧ ខែកញ្ញា ឆ្នាំ២០០៩ លោក គង់ ស្រ៊ីម ប្រធានដឹកនាំនៃកិច្ចប្រជុំពេញអង្គ ថ្លែងថា មានរបៀបវារៈសំខាន់ៗជាច្រើន ដែលត្រូវពិភាក្សាក្នុងកិច្ចប្រជុំនៅសប្តាហ៍នេះ ក្នុងនោះមានសំណើធ្វើវិសោធនកម្មលើវិធានផ្ទៃក្នុងមួយចំនួន និងការពិនិត្យលើការកែប្រែលើសេចក្តីណែនាំអនុវត្តន៍ផ្សេងៗទៀត ហើយលោកថ្លែងបន្តថា៖ «ព្រមទាំងទិសដៅនាពេលអនាគត និងការចូលរួមរបស់ដើមបណ្ដឹងរដ្ឋប្បវេណី ដែលភាគច្រើននៃសំណើទាំងនេះ គឺក្នុងគោលបំណងដើម្បីជំរុញលើការងារមួយចំនួន ដែលទាមទារឲ្យកិច្ចប្រជុំពេញអង្គពិនិត្យនិងអនុម័តដើម្បីឲ្យតុលាការអាចបំពេញការងារប្រកបដោយប្រសិទ្ធភាពខ្ពស់»។
បញ្ហាការចូលរួមរបស់ដើមបណ្តឹងរដ្ឋប្បវេណី ដែលអង្គជំនុំជម្រះសាលាដំបូងកំពុងមានបញ្ហាប្រឈមមុខនោះ ត្រូវលោកស្រី Silvia Cartwright ចៅក្រមអន្តរជាតិនិងជាអនុប្រធាននៃកិច្ចប្រជុំពេញអង្គ បន្ទរថា ៖ «ដូច្នេះក្នុងសប្ដាហ៍នេះ ចៅក្រមទាំងឡាយរបស់ អ.វ.ត.ក. (អង្គជំនុំជម្រះវិសាមញ្ញក្នុងតុលាការកម្ពុជា) នឹងពិនិត្យឡើងវិញ នូវទម្រង់នៃការចូលរួមរបស់ជនរងគ្រោះនិងការពិចារណារកវិធីដើម្បីកែលម្អទម្រង់នេះ ជាប្រយោជន៍សម្រាប់ជនរងគ្រោះនិងសាធារណជន»។
បញ្ហាដើមបណ្តឹងរដ្ឋប្បវេណីនៅក្នុងសំណុំរឿងលេខ០០១ របស់ជនជាប់ចោទឈ្មោះ កាំង ហ្កេកអ៊ាវ ហៅ ឌុច ត្រូវបានអង្គជំនុំជម្រះសាលាដំបូងដកសិទ្ធិសួរជនជាប់ចោទនិងសាក្សី កាលពីថ្ងៃទី២៧ ខែសីហា ឆ្នាំ២០០៩ ហើយកាលពីសប្តាហ៍មុននេះ ដើមបណ្តឹងរដ្ឋប្បវេណីចំនួន២៨រូបក្នុងចំណោម ៩៣រូប បានធ្វើពហិការសវនាការពេញមួយសប្តាហ៍ ជាការតវ៉ាទៅនឹងការដកសិទ្ធិនោះ។
លោក ជុំ ម៉ី ជាអតីតអ្នកទោសនៅគុកទួលស្លែងមួយរូប បានថ្លែងកាលពីថ្ងៃសៅរ៍ ទី៥ ខែកញ្ញា ថា ៖ «ចាំមើលចម្លើយពីខាងចៅក្រមមើល៍ គាត់យ៉ាងម៉េចអីយ៉ាងម៉េច»។
លោក ឆាំង យុ ប្រធានមជ្ឈមណ្ឌលឯកសារកម្ពុជា ថ្លែងថា ការដកសិទ្ធិដើមបណ្តឹងរដ្ឋប្បវេណីនៅពេលនេះ គឺជាការបរាជ័យមួយដែលសាលាក្តីខ្មែរក្រហមមើលរំលងកន្លងមក។
ក្រៅពីការពិភាក្សាលើបទពិសោធន៍កន្លងមកនេះ កិច្ចប្រជុំពេញអង្គលើកទី៦ ក៏មានគម្រោងលើកឡើងផងដែរថា ថវិការបស់សាលាក្តីនឹងត្រូវអស់នៅដំណាច់ឆ្នាំ២០០៩នេះហើយៗ សាលាក្តីកំពុងធ្វើគម្រោងថវិកាថ្មីសម្រាប់ឆ្នាំ២០១០ និង២០១១៕