សាលាក្ដីខ្មែរក្រហម និងបើកសវនាការបឋមនៃសំណុំរឿង០០២ នៅថ្ងៃទី២៧ ខែមិថុនា រហូតដល់ថ្ងៃទី៣០ ខែមិថុនា ឆ្នាំ២០១១ លើជនជាប់ចោទចំនួន ៤នាក់ មានលោក អៀង សារី លោក ខៀវ សំផន លោក នួន ជា និងលោកស្រី អៀង ធីរិទ្ធិ ក្រោមបទចោទប្រល័យពូជសាសន៍ ឧក្រិដ្ឋកម្មប្រឆាំងមនុស្សជាតិ ការរំលោភបំពានលើអនុសញ្ញាក្រុងហ្សឺណែវ ឆ្នាំ១៩៤៩ និងអនុសញ្ញាជាតិ ឆ្នាំ១៩៥៦។
សាលាក្ដីខ្មែរក្រហមបានចំណាយពេលស៊ើបអង្កេតលើសំណុំរឿង០០២ នេះចំនួន ២ឆ្នាំកន្លះ ដោយបានប្រមូលភស្តុតាងដាក់បន្ទុក និងដោះបន្ទុកចំនួនរាប់សែនទំព័រ។
មន្ត្រីអ្នកនាំពាក្យសាលាក្ដីខ្មែរក្រហម លោក ឌឹម សុវណ្ណារុំ បានមានប្រសាសន៍នៅថ្ងៃទី១៣ ខែឧសភា ឆ្នាំ២០១១ ថាសំណុំរឿង០០២ នេះ ជាសំណុំរឿងស្នូល ពីព្រោះជនជាប់ចោទចំនួន ៤នាក់នោះ ជាអតីតមេដឹកនាំខ្មែរក្រហមជាន់ខ្ពស់ ៖ "មិនថាជនរងគ្រោះដោយផ្ទាល់ ឬប្រយោលទេ រង់ចាំយូរហើយ។ សំណុំរៀង០០២ហ្នឹង នៅពេលដែលមានសវនាការជាសាធារណនៅពេលនោះ អាចនឹងការពិតមួយ និងយុត្តិធម៌មួយ សង្ឃឹមថានឹងត្រូវបានរកឃើញ និងទាន់ពេលវេលា"។
លោកបានបញ្ជាក់ថា សវនាការបឋមនោះ មិនមែនជាសវនាការសាធារណទេ គឺដើម្បីពិនិត្យមើលបញ្ជីឈ្មោះដើមបណ្ដឹង សាក្សី និងអង្គហេតុ។ ប៉ុន្តែក្រោយមក សាលាក្ដីខ្មែរក្រហម នឹងបើកសវនាការពេញអង្គជាសាធារណនៅខែសីហា ឬខែកញ្ញា ឆ្នាំ២០១១។
អតីតអ្នកទោសនៃរបបខ្មែរក្រហម នៅគុកទួលស្លែង លោក ជុំ មី អាយុ៨០ឆ្នាំ បានថ្លែងថា បើសិនណាសាលាក្ដីខ្មែរក្រហម មិនផ្ដន្ទាទោសឲ្យ កាំង ហ្គេក អ៊ាវ ហៅ ឌុច ជាប់គុកមួយជីវិតទេ លោកមិនចូលរួមក្នុងសវនាការសំណុំរឿង០០២ ទេ ៖ "ហ្នឹងចំពោះខ្ញុំ។ តែចំពោះបងប្អូនគេទៅក៏ទៅចុះ។ ខ្ញុំអត់ជំទាស់ទេ ខ្ញុំសប្បាយចិត្ត"។
សាលាក្ដីខ្មែរក្រហមមានគម្រោងការប្រកាសសាលដីកាជាស្ថាពរ បិតផ្លូវតវ៉ានៃសំណុំរឿង០០១ របស់អតីតមេគុកទួសស្លែង ឈ្មោះ កាំង ហ្គេក អ៊ាវ ហៅ ឌុច នៅចុងខែមិថុនា ឆ្នាំ២០១១ ខាងមុខនេះ។
សាលាក្ដីខ្មែរក្រហម កាលពីថ្ងៃទី២៦ ខែកក្កដា ឆ្នាំ២០១០ កន្លងទៅ បានប្រកាសសាលក្រមផ្ដន្ទាទោស កាំង ហ្គេក អ៊ាវ ហៅ ឌុច ឲ្យជាប់គុក ៣៥ឆ្នាំ ក្រោមបទឧក្រិដ្ឋប្រឆាំងមនុស្សជាតិ និងការរំលោភបំពានលើអនុសញ្ញាក្រុងហ្សឺណែវ ឆ្នាំ១៩៤៩៕