ក្នុងសវនាការនៅថ្ងៃពុធនេះ សាក្សី ឌុច បានបង្ហាញពីអារម្មណ៍ច្រឡោតរបស់គាត់ចំពោះមេធាវីការពារក្ដីជនជាប់ចោទ នួន ជា គឺលោក ម៉ៃឃើល ផេសមិន (Michiel Pestman) ដែលសួរគាត់ឡើងវិញទាក់ទងនឹងប្រភេទក្រុមអ្នកសួរចម្លើយនៅគុកទួលស្លែង៖ «ខ្ញុំសុំប្ដឹងតុលាការថា លោកចុចតែមួយកន្លែងមក ដើម្បីសង្កត់ខ្ញុំ រកពិរុទ្ធភាពរបស់ខ្ញុំ។ មិនល្អទេ។ ខ្ញុំគិតថា មិនជាសប្បុរសទេសំណួររបស់លោក។ មានបំណងមួយច្បាស់លាស់ គឺដាក់ពិរុទ្ធភាពដល់ខ្ញុំ លាក់បិទបាំងពិរុទ្ធភាពកូនក្ដីរបស់លោក»។
ការឆ្លើយតបរបស់សាក្សី ឌុច បែបនេះ គឺនៅពេលដែលមេធាវីការពារក្ដីជនជាប់ចោទ នួន ជា គឺលោក ម៉ៃឃើល ផេសមិន សួរបញ្ជាក់ ឌុច ជាថ្មីរកការពិតមួយថា ហេតុអ្វីបានជាគាត់ឆ្លើយថា ម្ដងថាដឹង និងម្ដងទៀតមិនបានដឹងអំពីឈ្មោះក្រុមអ្នកសួរចម្លើយ ៣ ប្រភេទ នៅគុកទួលស្លែង កាលពីមុន៖ «លោកសាក្សី ខ្ញុំសូមជម្រាបលោកថា សូមលោកឆ្លើយសំណួរខ្ញុំផង។ ពីដំបូងបំផុតនោះ តើនៅពេលណាដែលលោកបានឮពាក្យថា ក្រុមក្ដៅ ក្រុមត្រជាក់ និងក្រុមអង្កៀម។ តើលោកបានប្រើពាក្យហ្នឹងដោយខ្លួនឯងទេ កាលលោកនៅ ស២១ នោះ?»។
សាក្សី ឌុច បានបដិសេធទៅមេធាវីថា គាត់មិនឆ្លើយនឹងសំណួរនេះទេ ដោយគាត់លើកឡើងថា មេធាវីច្បិចយកតែផ្នែកខ្លះមកសួរគាត់។ សាក្សី ឌុច បានទាមទារឱ្យមេធាវី ម៉ៃឃើល ផេសមិន ប្រមូលយកឯកសារពាក់ព័ន្ធទាំងនោះមកពិនិត្យឱ្យបានគ្រប់ សម្រាប់សួរគាត់ ពីព្រោះគាត់ភ្លេចខ្លះ៖ «ដូច្នេះខ្ញុំវង្វេង។ នៅពេលសហចៅក្រមលោកសួរ ខ្ញុំឆ្លើយអ៊ីចេះ។ ដល់ក្រោយមកឃើញឯកសារនេះ ខ្ញុំនឹកដល់រឿងចាស់។ ដូច្នេះលោកសួរច្បិចដើម្បីបង្ហាញសាធារណៈ និងតុលាការថា ខ្ញុំមិនស្មោះត្រង់នឹងខ្លួនឯង ឬយ៉ាងម៉េច។ ដូច្នេះ កុំសួរពាក្យហ្នឹងទៀត។ ខ្ញុំសុំប្ដឹងតុលាការ។ ខ្ញុំសុំលោកកុំសួរពាក្យហ្នឹងទៀត។ ពាក្យហ្នឹងមិនសប្បុរសទេ លោកមានបំណងទុច្ចរិតចំពោះខ្ញុំ»។
ការសាកសួរសាក្សី ឌុច ដោយមេធាវីការពារជនជាប់ចោទ នួន ជា ដែលជាអតីតមេកើយរបស់ ឌុច ផ្ទាល់ បានចាប់ផ្ដើមតាំងពីថ្ងៃទី ៣ មេសា។ ការចោទឆ្លើយរវាងភាគីទាំងពីរមានសភាពតឹងតែងបន្តិច ចាប់តាំងពីពេលនោះមក។
មានសំណួរភាគច្រើនដែរ ដែលសាក្សី ឌុច បដិសេធមិនឆ្លើយតប ដោយលើកហេតុផលថា វាជាការដាក់កំហុសលើខ្លួនឯង។
តាមការសង្កេត មេធាវីការពារជនជាប់ចោទ បានសួរសាក្សី ឌុច អំពីសកម្មភាពរបស់គាត់ធ្វើបាប ឬធ្វើទារុណកម្មអ្នកទោសនៅមន្ទីរសន្តិសុខ ម១៣ នៅខេត្តកំពង់ស្ពឺ និងមន្ទីរ ស-២១ ឬគុកទួលស្លែង នៅភ្នំពេញ។ សំណួរភាគច្រើនរបស់មេធាវី ត្រូវបានភាគីផ្សេងៗទៀតជំទាស់។
បើទោះជាដូច្នេះក្ដី លោក ម៉ៃឃើល ផេសមិន ទទូចអង្គចៅក្រមឱ្យសាក្សី ឌុច ឆ្លើយសំណួររបស់គាត់៖ «លោកប្រធានសូមលោកមេត្តាណែនាំសាក្សីឱ្យឆ្លើយសំណួររបស់ខ្ញុំ»។
ចៅក្រម និល ណុន បានណែនាំ ឌុច អំពីកាតព្វកិច្ចរបស់សាក្សីដែលត្រូវឆ្លើយជូនអង្គជំនុំជម្រះអំពីអ្វីដែលខ្លួនបានឃើញ ដឹង ឮ ឬមានបទពិសោធន៍ឆ្លងកាត់ ឬមានការកត់សម្គាល់កន្លងមក ពាក់ព័ន្ធទៅនឹងព្រឹត្តិការណ៍ និងការតាំងសំណួរពីភាគីចំពោះខ្លួន លើកលែងតែករណីមួយចំនួន៖ «លើកលែងតែការជំទាស់មិនឆ្លើយតបហ្នឹងនាំឱ្យមានពិរុទ្ធលើខ្លួនឯង ចំពោះអង្គហេតុទាំងឡាយដែលតុលាការមិនទាន់បានវិនិច្ឆ័យ សេចក្ដីជាស្ថាពរ ដូចជាអង្គហេតុនៅ ម១៣ ជាដើម»។
ប្រកាសអំពីសិទ្ធិរបស់សាក្សី៖ ឌុច មានសិទ្ធិជំទាស់ទៅនឹងការឆ្លើយសំណួរពាក់ព័ន្ធអង្គហេតុទាំងឡាយ ដែលមិនទាន់វិនិច្ឆ័យសេចក្ដីក្នុងសំណុំរឿង ០០១ ដែលអាចនាំឱ្យដាក់ពិរុទ្ធភាពលើខ្លួនឯង ដែលអាចនឹងត្រូវចោទប្រកាន់នៅពេលអនាគត។
ការសួរដេញដោលសាក្សី ឌុច ដោយមេធាវីការពារជនជាប់ចោទ នួន ជា នៅមិនទាន់បញ្ចប់នៅឡើយទេ ហើយត្រូវបន្តទៅថ្ងៃទី ៥ មេសាទៀត៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។