នៅថ្ងៃទី៩ មេសានេះ មេធាវីការពារក្ដីឱ្យជនជាប់ចោទ អៀង សារី លោក ម៉ៃឃើល ខាណាវ៉ាស (Michael Karnavas) បានសួរដេញដោលសាក្សី ឌុច បញ្ជាក់លើចម្លើយនានា ដែលគាត់បានផ្ដល់នៅចំពោះមុខសហចៅក្រមស៊ើបអង្កេត កាលពីពេលកន្លងមក។
យើងសង្កេតឃើញថា សំណួរភាគច្រើនបំផុតដែលមេធាវី ម៉ៃឃើល ខាណាវ៉ាស សួរទៅសាក្សី ឌុច គឺជាសំណួរបញ្ជាក់សាក្សីឱ្យឆ្លើយត្រឹមតែថា បាទ! ពិតមែន ឬមិនមែនទេប៉ុណ្ណោះ ខុសពីសំណួររបស់សហព្រះរាជអាជ្ញា កាលពីសប្ដាហ៍មុន ដែលសួរឱ្យសាក្សីរៀបរាប់លម្អិត។
ជារឿយៗ មេធាវីការពារជនជាប់ចោទ អៀង សារី ច្រើនតែកាត់ ឌុច ពេលដែល ឌុច ឆ្លើយវែង និងព្យាយាមពន្យល់អំពីចម្លើយទាំងនោះ៖ «នៅពេលដែល វន វ៉េត មកដល់ ស២១ មកដល់ពីល្ងាច។ ព្រឹកឡើងខ្ញុំទៅពីព្រលឹមមុនគេ។ ទៅហ្នឹងខ្ញុំមានបំណងសុំទោសគាត់។ រួចហើយខ្ញុំសួរគាត់ថា ហេតុអីបានបង ប៉ុល ចាប់បងឯង? គាត់ឆ្លើយថា មិត្តអើយ! បង ប៉ុល ពិបាកណាស់...»។
មេធាវី ខាណាវ៉ាស៖ «ខ្ញុំសុំកាត់សម្ដីលោកសាក្សី ដោយសារតែយើងមានពេលវេលាកំណត់។ សុំឱ្យតែលោកឆ្លើយតែសំណួរបានហើយ»។
ការតាំងសំណួររបស់មេធាវីការពារក្ដីខ្លះ ត្រូវបានសហព្រះរាជអាជ្ញាកាត់ និងឃាត់ដោយប្រធានចៅក្រមជំនុំជម្រះ មិនឱ្យសាក្សីឆ្លើយដែរ ដោយសំអាងថា ជាប្រភេទសំណួរដឹកមុខ សំណួរទូលាយពេកពិបាកយល់ សំណួរច្រំដែល ឬក៏ជាប្រភេទសំណួរ ដែលឱ្យសាក្សីធ្វើសេចក្ដីសន្និដ្ឋានលើសាច់រឿងអ្វីមួយ តាមចិត្តរបស់គាត់។
សំឡេងមេធាវីសួរ៖ គេមានបំណងអ្វី ដែលគេចាប់ វន វ៉េត ធ្វើទារុណកម្មនោះ?
សាក្សី ឌុច៖ ជម្រាបប្រសាសន៍លោកប្រធាន! បើនិយាយពីបំណងខ្ញុំមិនឆ្លើយទេ ព្រោះវាចូលក្នុងសេចក្ដីសន្និដ្ឋាន។
ពេលខ្លះទៀត សាក្សី ឌុច ខ្លួនឯង ក៏បានបដិសេធមិនឆ្លើយនឹងសំណួររបស់មេធាវីការពារក្ដីជនជាប់ចោទដែរ ដោយលើកឡើងថា សំណួររបស់មេធាវីវិលចុះវិលឡើង ដែលធ្វើឱ្យលោកពិបាកឆ្លើយ។
បញ្ហានេះ ធ្វើឱ្យមេធាវីការពារក្ដីជនជាប់ចោទ អៀង សារី មានមន្ទិលថា សាក្សី ឌុច គេចវេះពីការឆ្លើយសំណួរ៖ «នៅពេលដែលគេលើកឡើងអំពីអំណាចផ្ទាល់របស់លោក ដែលលោកផ្ដល់សក្ខីកម្មគេចវេះ ឬក៏មិនជាក់លាក់ មិនច្បាស់លាស់ ហើយចម្លើយលោកនិយាយនោះបង្កឱ្យមានការភ័ន្តច្រឡំ តើមែនដែរឬទេ? សូមលោកឆ្លើយសំណួរនេះ»។
សាក្សី ឌុច៖ «ជម្រាបប្រសាសន៍លោកប្រធាន! ចម្លើយរបស់ខ្ញុំៗ ពុះពារជាអតិបរមា ដើម្បីស្មោះត្រង់នឹងសភាពការណ៍ពិត ដើម្បីស្មោះត្រង់នឹងអារម្មណ៍របស់ខ្ញុំ។ ឯចំណែកការវិនិច្ឆ័យរបស់អ្នកផ្សេងទៀតមកលើខ្ញុំ អាហ្នឹងជាសិទ្ធិរបស់គេ។ ចុងបញ្ចប់អង្គជំនុំជម្រះជាអ្នកជម្រះសេចក្ដី។ នេះជារឿងធម្មតា»។
នៅមុនពេលបញ្ចប់នាទីសួរដេញដោលរបស់ខ្លួន មេធាវីការពារក្ដីជនជាប់ចោទ អៀង សារី បានតវ៉ាថា លោកមានបញ្ហាពេលវេលាចង្អៀតសម្រាប់សួរដេញដោលសាក្សី ឌុច។
សវនាការសួរដេញដោលសាក្សី ឌុច ត្រូវបន្តទៅថ្ងៃទី១០ មេសា នេះទៀត ហើយអង្គជំនុំជម្រះនឹងផ្ដល់ឱកាសដល់ក្រុមមេធាវីការពារក្ដីជនជាប់ចោទ ខៀវ សំផន ដើម្បីតាំងសំណួរចំពោះសាក្សី ឌុច៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។