សវនាការនៅបន្តសួរដេញដោលសាក្សីឈ្មោះ សាឡុត បាន ដែលជាក្មួយបង្កើតរបស់ សាឡុត ស ហៅ ប៉ុល ពត នៅឡើយ ស្ដីអំពីព្រឹត្តិការណ៍នានា ទាក់ទងទៅនឹងក្រសួងការបរទេសនៃរបបកម្ពុជាប្រជាធិបតេយ្យ។
ក្នុងសវនាការនៅថ្ងៃច័ន្ទ ទី៣០ ខែមេសានេះ គឺជាវេទិការបស់មេធាវីការពារក្ដីឱ្យជនជាប់ចោទទាំង ៣ ក្រុម សួរដេញដោលសាក្សីឈ្មោះ សាឡុត បាន ដែលមានឈ្មោះបដិវត្តហៅថា សូ ហុង។
វេទិកាសួរដេញដោលសាក្សីរបស់មេធាវីជនជាប់ចោទទាំងនេះ សុទ្ធតែមានគោលបំណងរកព័ត៌មាននានា ដើម្បីដោះបន្ទុកកូនក្ដីខ្លួន ដែលត្រូវភាគីសហព្រះរាជអាជ្ញាចោទប្រកាន់ ទាក់ទងទៅនឹងបទឧក្រិដ្ឋទាំងឡាយកើតឡើងក្នុងរបបកម្ពុជាប្រជាធិបតេយ្យ។
មេធាវីការពារក្ដីជនជាប់ចោទ អៀង សារី ត្រូវបានអង្គជំនុំជម្រះអនុញ្ញាតឱ្យសួរដេញដោលមុនគេនៅក្នុងវេទិកានេះ ព្រោះតែទាំងជនជាប់ចោទ និងសាក្សីសុទ្ធតែធ្លាប់ធ្វើការជាមួយគ្នានៅក្រសួងការបរទេសនៅក្នុងរបបកម្ពុជាប្រជាធិបតេយ្យ ដែលមានមនុស្សមួយចំនួនរបស់ក្រសួងនេះ ត្រូវគេយកទៅសម្លាប់។ ជនជាប់ចោទ អៀង សារី អតីតជារដ្ឋមន្ត្រីក្រសួងការបរទេស និងជាមេផ្ទាល់របស់សាក្សី សាឡុត បាន ហៅ សូ ហុង។
ជារឿយៗ សាក្សីបានផ្ដល់សក្ខីកម្មថា ជនជាប់ចោទ អៀង សារី បានត្រឹមតែដឹងថា បាត់បុគ្គលិក ដែលនៅក្រោមបង្គាប់របស់ខ្លួន បន្ទាប់ពីគេយកមនុស្សទៅបាត់ហើយ។ អ្នករងគ្រោះទាំងនោះ ភាគច្រើនជាក្រុមបញ្ញាជនមកពីបរទេស ដែលគេយកទៅដាក់ឃុំឃាំងនៅក្នុងជំរំប្រមូលផ្ដុំ២ គឺជំរំច្រាំងចំរេះ និងជំរំបឹងត្របែក។
ដូចកាលពីសប្ដាហ៍មុនដែរ សាក្សីឈ្មោះ សាឡុត បាន ប្រាប់អង្គជំនុំជម្រះថា មានកម្មាភិបាលថ្នាក់មជ្ឈិមមួយរូបឈ្មោះ ប៉ង់ ជាអ្នកគ្រប់គ្រងជំរំទាំងពីរនោះរហូតដល់គាត់បាត់ខ្លួន នៅមុនពេលវៀតណាមវាយចូលប្រទេសកម្ពុជាបន្តិច។ គឺពេលនោះហើយដែលជំរំទាំង ២ ត្រូវបានផ្ទេរមកឱ្យក្រសួងការបរទេស ហើយសាក្សីជាអ្នកគ្រប់គ្រង។
សាក្សីឈ្មោះ សាឡុត បាន៖ «តាមខ្ញុំចាំ បង អៀង សារី ថា បឹងត្របែក ឬច្រាំងចំរេះ ប៉ង់ គេថាឱ្យ ហុង ឯងទទួលខុសត្រូវហើយ។ តែប៉ុណ្ណឹង»។
គាត់បន្ថែមថា ការបាត់ខ្លួនបុគ្គលិកនៅក្រសួងការបរទេសពេលនោះ ធ្វើឱ្យគាត់ ជនជាប់ចោទ អៀង សារី និងបុគ្គលិកដទៃទៀតភ័យព្រួយដូចៗ គ្នា។
លោក សាឡុត បាន បញ្ជាក់ថា រយៈពេលនោះ ជារយៈពេលត្រៀមសម្រាប់ការរត់ចេញពីភ្នំពេញ នៅខែមករា ឆ្នាំ១៩៧៩ ប៉ុណ្ណោះ។ មិនមានសក្ខីកម្មច្បាស់លាស់ណាមួយ ត្រូវសាក្សីឆ្លើយដាក់បន្ទុកជនជាប់ចោទ អៀង សារី ទេ។
បន្ទាប់ពីក្រុមមេធាវីជនជាប់ចោទ អៀង សារី គឺជាវេទិការបស់មេធាវីជនជាប់ចោទ នួន ជា ដែលអតីតជាអនុលេខាបក្សកុម្មុយនិស្តកម្ពុជា។ សក្ខីកម្មចំពោះជនជាប់ចោទរូបនេះ ក៏មិនមានបន្ទុកអ្វីដែរ។ សាក្សី សាឡុត បាន បានសរសើរចំពោះបុគ្គលិកលក្ខណៈរបស់ជនជាប់ចោទ នួន ជា។
សាក្សី សាឡុត បាន៖ «លោកមិនមានធ្វើអីឱ្យខ្ញុំអាក់អន់ស្រពន់ចិត្តដល់ខ្ញុំទេ គឺលោកមានតែពន្យល់ឱ្យចេះស្រឡាញ់គ្នាក្នុងក្រុម។ បើមិនចេះស្រឡាញ់គ្នាទេ ការពារបដិវត្តមិនបានទេ»។
សាក្សីបានបញ្ជាក់ខ្លះៗ ដែរ អំពីលោក ហោ ណាំហុង និងលោក គាត ឈន់ នៅក្នុងសម័យនោះ៖ «ពេលនោះដូចជាបង ហោ ណាំហុង បង សារិន ឆាក គឺនៅផ្ទះវីឡា។ ឯអ្នកដទៃទៀតនេះ គម្រោងរៀបចំឱ្យធ្វើជា ខ្លះចូលក្រសួងការបរទេស ខ្លះទៅជាគ្រូបង្រៀនក្មេងៗ»។
មេធាវីជនជាប់ចោទ នួន ជា ក៏បានចោទសួរសាក្សី សាឡុត បាន ៣ សំណួរជាប់ៗគ្នា ពាក់ព័ន្ធនឹងលោក ហោ ណាំហុង និងលោក គាត ឈន់៖ «លោកសាក្សី លោកដឹងថា អ្នកទាំងពីរនោះមានការភ័យខ្លាច មិនហ៊ានមកផ្ដល់សក្ខីកម្មដែរឬទេ? តើលោកដឹងអ្នកទាំងនោះទទួលការណែនាំពីរដ្ឋាភិបាលមិនឱ្យកផ្ដល់សក្ខីកម្ម មកជាជំនួយដល់តុលាការនេះ ដើម្បីស្វែងរកការពិតដែរឬទេ? តើនាយករដ្ឋមន្ត្រី ហ៊ុន សែន បានប្រាប់អ្នកទាំងពីរមិនឱ្យមកផ្ដល់សក្ខីកម្មដែរឬទេ?»។
សំណួរទាំងនេះ ត្រូវប្រធានអង្គជំនុំជម្រះសាលាដំបូង លោកចៅក្រម និល ណុន ប្រាប់ទៅសាក្សីថា មិនបាច់ឆ្លើយទេ ព្រោះអង្គហេតុមិនពាក់ព័ន្ធ៖ «សាក្សីមិនបាច់ឆ្លើយតបនឹងសំណួរនេះទេ»។
ក្រុមមេធាវីការពារក្ដីឱ្យជនជាប់ចោទ ខៀវ សំផន ទើបតែបានចាប់ផ្ដើមសួរបានបន្តិច ហើយត្រូវអស់ម៉ោង។ ពេលវេលាសម្រាប់មេធាវីជនជាប់ចោទ ខៀវ សំផន សួរសាក្សីនឹងបន្តនៅថ្ងៃពុធ ទី២ ខែឧសភា។
ប្រធានអង្គជំនុំជម្រះសាលាដំបូង លោកចៅក្រម និល ណុន ប្រកាសថា ដោយសារតែថ្ងៃទី១ ឧសភាជាថ្ងៃបុណ្យ ទិវាពលកម្មអន្តរជាតិ សាលាដំបូងនឹងមិនបើកសវនាការទេ សវនាការនឹងលើកទៅបន្តនៅថ្ងៃពុធទី២ ខែឧសភា ជាបន្តទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។