សវនាការលើកាយសម្បទាជនជាប់ចោទនៅថ្ងៃទី៣១ ខែសីហា គឺបានផ្ដោតការជជែកដេញដោលសំខាន់លើបញ្ហាសុខភាពរបស់ជនជាប់ចោទ នួន ជា ដែលបច្ចុប្បន្នមានវ័យ ៨៥ឆ្នាំ។
ក្នុងការជជែកដេញដោលនៅថ្ងៃបញ្ចប់នេះ អ្នកជំនាញខាងថែទាំសុខភាពមនុស្សចាស់ លោក ចន ខេមប៊ែល (John Campbell) បានផ្ដល់អនុសាសន៍ថា ស្ថានភាពសុខភាពទូទៅរបស់ជនជាប់ នួន ជា មិនមានអ្វីជាឧបសគ្គដែលអាចរារាំងគាត់មិនឱ្យចូលរួមសវនាការបានទេ។ ម្យ៉ាងទៀត បើទោះជាគាត់មានបញ្ហាឈឺចង្កេះ ដែលមិនអាចអង្គុយយូរបានក្ដី ក៏គាត់អាចចូលរួមសវនាការពីចម្ងាយ គឺនៅក្នុងបន្ទប់រង់ចាំ ដែលគាត់អាចសម្រួលឥរិយាបថ និងអាចទម្រេតខ្លួនបាន។
លោកបន្ថែម ឧបករណ៍របស់សាលាក្ដីសម្រាប់ជាជំនួយដល់ជនជាប់ចោទក្នុងការចូលរួមសវនាការក៏សមល្មម ដោយមិនមានអ្វីខ្វះខាតត្រូវកែលម្អទេនៅពេលនេះ។
កាលពីព្រឹកថ្ងៃទី៣១ ខែសីហានេះ ជនជាប់ចោទដែលចូលរួមសវនាការតាមការបញ្ជូនរូបភាព និងសំឡេងពីបន្ទប់រង់ចាំបានទាមទារឱ្យបិទរូបភាពសវនាការពីកញ្ចក់ទូរទស្សន៍ ព្រោះគាត់មិនអាចទ្រាំមើលដំណើរការសវនាការនោះតទៅទៀតបានទេ។
ជនជាប់ចោទ នួន ជា សុំលះបង់សិទ្ធិចូលរួមនោះ ហើយវិលទៅបន្ទប់ឃុំឃាំងវិញ។ ក៏ប៉ុន្តែ សំណើរបស់គាត់ត្រូវអង្គជំនុំជម្រះបដិសេធ ហើយតម្រូវឱ្យគាត់ចូលរួមសវនាការនៅក្នុងបន្ទប់រង់ចាំរហូតដល់ចប់ដដែល។
នៅក្នុងសេចក្ដីសន្និដ្ឋាន មេធាវីការពារក្ដីអន្តរជាតិរបស់ជនជាប់ចោទ អៀង សារី បានសុំឱ្យតុលាការបដិសេធសេចក្ដីសន្និដ្ឋានរបស់អ្នកជំនាញ ចន ខេមប៊ែល ដោយលើកឡើងថា គាត់មិនមានជំនាញគ្រប់គ្រាន់ទេ។ មេធាវីរូបនេះ បានសុំទៅតុលាការឱ្យមានក្រុមអ្នកជំនាញវាយតម្លៃផ្សេងទៀត សម្រាប់ជនជាប់ចោទ នួន ជា ដោយផ្ដោតលើការផ្ចង់អារម្មណ៍ និងអំពីព័ត៌មានអតីតកាលរបស់គាត់។
មេធាវីជាតិរបស់គាត់ គឺលោក សុន អរុណ បន្ថែមថា លោក ខេមប៊ែល មានការខ្វះខាត ព្រោះពេលវេលារបស់លោក ខេមប៊ែល ជួបជាមួយកូនក្ដីលោកចុងក្រោយខ្លីណាស់ គឺ ៥នាទីប៉ុណ្ណោះ ហើយគ្មានឧបករណ៍អីទេ គឺទៅដោយដៃទទេ។ លោកថា លោកព្រួយរឿងខួរក្បាលគាត់ចុះខ្សោយ។ គាត់ពិបាកងើបដើរ លុះត្រាតែមានអ្នកជួយគ្រា និងមានឈើច្រត់ ដែលហៅថា ដើរជើងដប់។
ទាំងព្រះរាជអាជ្ញា និងមេធាវីដើមបណ្ដឹងរដ្ឋប្បវេណីនាំមុខសុទ្ធតែបានស្នើសុំទៅអង្គជំនុំជម្រះបដិសេធចោលសេចក្ដីស្នើសុំ និងការលើកឡើងរបស់មេធាវីរបស់លោក នួន ជា។ ភាគីទាំងបានលើកសំអាងថា លោក នួន ជា នៅមានសុខភាពល្អណាស់សម្រាប់វ័យ ៨៥ឆ្នាំរបស់គាត់។ សហព្រះរាជអាជ្ញាអន្តរជាតិ បានសុំឱ្យច្រានចោលការស្នើសុំឱ្យមានការពិនិត្យជនជាប់ចោទ នួន ជា បន្ថែម។
ក្រោយការសេចក្ដីសន្និដ្ឋានពីគ្រប់ភាគីមក ប្រធានចៅក្រមជំនុំជម្រះ បានកំណត់ឱ្យមេធាវីការពារក្ដីដាក់សំណើជាលាយលក្ខណ៍អក្សរមិនឱ្យហួសថ្ងៃទី៧ ខែកញ្ញា។ ចំពោះភាគីព្រះរាជអាជ្ញា និងមេធាវីនាំមុខ ប្រសិនបើចង់ឆ្លើយតប គឺត្រូវដាក់សំណើមិនឱ្យហួសថ្ងៃទី១២ ខែកញ្ញា។
លទ្ធផលស្ដីពីសវនាការរយៈពេល ៣ថ្ងៃនេះ នៅមិនទាន់ដឹងនៅឡើយទេ សាលាដំបូងនឹងប្រកាសជាសាធារណៈនៅពេលក្រោយ៕