សាក្សី៖ លោក ហោ ណាំហុង ឋិតក្នុងក្រុមអ្នកគ្រប់គ្រងគុកបឹងត្របែក
h073112lm.mp3
ការបញ្ជាក់ជាថ្មីរបស់សាក្សី រចឹម ទន់ អំពីតួនាទីលោក ហោ ណាំហុង នៅមន្ទីរបឹងត្របែក ក្នុងរបបកម្ពុជាប្រជាធិបតេយ្យ គឺជាការឆ្លើយតបទៅនឹងសំណួររបស់មេធាវីការពារក្ដីឱ្យជនជាប់ចោទ នួន ជា ដែលសួរបញ្ជាក់សាក្សីឡើងវិញ។
មេធាវីអន្តរជាតិការពារក្ដីឱ្យជនជាប់ចោទ នួន ជា គឺលោក អានឌ្រូ អ៊ីអានូហ៊្សី (Andrew Ianuzzi) បានសួរសាក្សីបញ្ជាក់ឱ្យច្បាស់បន្ថែមទៀត អំពីឋានៈ និងតួនាទីរបស់លោក ហោ ណាំហុង ដែលថាគាត់នៅមន្ទីរបឹងត្របែកនោះដែរ កាលពីក្នុងរបបកម្ពុជាប្រជាធិបតេយ្យ។
លោក អានឌ្រូ អ៊ីអានូហ៊្សី សួរ៖ «តើគាត់ជាប្រធាន ឬអនុប្រធាននៅបឹងត្របែកនោះ ទាក់ទងទៅនឹងលោក ហោ ណាំហុង នេះ?»
សាក្សី រចឹម ទន់ ឆ្លើយ៖ «កាលទទួលគាត់កាលនោះ ក្នុងនាមគាត់គ្រប់គ្រងនៅបឹងត្របែកហ្នឹងដែរ។ ក្នុងគ្រប់គ្រង!»។
កាលពីថ្ងៃទី៣០ កក្កដា សាក្សី រចឹម ទន់ ថ្លែងថា លោក ហោ ណាំហុង ឋិតនៅក្នុងមន្ទីរបឹងត្របែក ដែលគេឃុំឃាំងក្រុមនិស្សិតបញ្ញវន្តវិលមកពីបរទេស។ ក្រោយមកទៀត លោក ហោ ណាំហុង ត្រូវបានគេផ្លាស់ឱ្យមកធ្វើការនៅក្រសួងការបរទេសវិញ នៅរយៈពេលខ្លីចុងឆ្នាំ១៩៧៨។
សាក្សី រចឹម ទន់ ថ្លែងថា៖ «បាទ! ពិតអ៊ីចឹងហើយ។ គាត់នៅបឹងត្របែកនោះ វាយូរ។ ដល់ខាង ប១ ទៅទទួលហ្នឹង គឺមួយរយៈខ្លី។ មុនគាត់មកធ្វើការនៅក្រសួង ពីមុនខ្ញុំក៏ក្ដាប់មិនបានដែរ។ ប៉ុន្តែ ដូចខ្ញុំបញ្ជាក់មិញអ៊ីចឹង គឺគាត់នៅក្នុងរង្វង់ការងារទូតហ្នឹងហើយ ខ្ញុំបញ្ជាក់អ៊ីចឹង»។
បញ្ហាពាក់ព័ន្ធនឹងតួនាទីគ្រប់គ្រងរបស់លោក ហោ ណាំហុង នៅមន្ទីរបឹងត្របែក កន្លងមកធ្លាប់ជារឿងក្ដីក្ដាំរវាងលោក និងលោក សម រង្ស៊ី នៅតុលាការប្រទេសបារាំង និងតុលាការកម្ពុជា។ ជាចុងក្រោយ តុលាការកម្ពុជា បានកាត់ឱ្យលោក ហោ ណាំហុង ឈ្នះក្នុងរឿងក្ដីនេះ។ លោក ហោ ណាំហុង ធ្លាប់ថ្លែងថា លោកមិនមែនជាអ្នកគ្រប់គ្រងទេ គឺលោកជាអ្នកជាប់ឃុំម្នាក់។ សក្ខីកម្មរបស់សាក្សី រចឹម ទន់ ពេលនេះ គឺជាបញ្ជាក់មួយថ្មី បំភ្លឺសាលាក្ដីខ្មែរក្រហម ទាក់ទងនឹងតួនាទីរបស់លោក ហោ ណាំហុង។
ក្រៅពីការបញ្ជាក់អំពីលោក ហោ ណាំហុង សាក្សីក៏បានលើកឡើងអំពីឈ្មោះលោក គាត ឈន់ ដែលជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុបច្ចុប្បន្ននេះដែរ។ សាក្សី រចឹម ទន់ ជម្រាបអង្គជំនុំជម្រះថា លោក គាត ឈន់ ក៏មានតួនាទីផ្នែកការទូតម្នាក់នៅក្រសួងការបរទេសនៃរបបកម្ពុជាប្រជាធិបតេយ្យ។
លោក អានឌ្រូ អ៊ីអានូហ៊្សី សួរ៖ «តើលោកយល់ស្របដែរឬទេថា លោក គាត ឈន់ ជាកម្មាភិបាលជាន់ខ្ពស់មួយរូប នៅ ប១ នោះ?»
សាក្សី រចឹម ទន់៖ «គាត់ជាកម្មាភិបាលជាន់ខ្ពស់មួយរូបដែរ នៅក្នុងក្រសួងហ្នឹង។ ពិសេស កិច្ចការខាងនយោបាយខាងក្រៅ គាត់មានពិសោធន៍ច្រើនលើការងារទូត។ ការទំនាក់ទំនងអីផ្សេង គាត់មានពិសោធន៍»។
សាក្សីបញ្ជាក់ជូនអង្គជំនុំជម្រះថា លោក គាត ឈន់ មានតួនាទីសំខាន់ជាអ្នកធ្វើសន្ទរកថា ជាអ្នកជួបចរចាជាមួយប្រតិភូភ្ញៀវ និងកត់កំណត់ហេតុ។
សវនាការសាលាក្ដីខ្មែរក្រហមនៅពេលនេះ កំពុងផ្ដោតការពិភាក្សាដេញដោលសំខាន់ទៅលើអង្គហេតុនានា ទាក់ទងទៅនឹងក្រសួងការបរទេសនៃរបបកម្ពុជាប្រជាធិបតេយ្យ។ សាក្សីដែលឡើងមកបំភ្លឺអង្គជំនុំជម្រះ ចាប់តាំងពីខែមេសា មក ភាគច្រើនជាអតីតកម្មាភិបាលនៃក្រសួងការបរទេសនេះ។
មន្ទីរបឹងត្របែក ត្រូវបានគេដឹងថា ជាកន្លែងឃុំឃាំងនិស្សិតបញ្ញវន្ត ដែលវិលមកពីបរទេសនៅក្នុងរបបកម្ពុជាប្រជាធិបតេយ្យ។ មន្ទីរនេះ ក៏ធ្លាប់ឋិតនៅក្រោមការគ្រប់គ្រងរបស់ក្រសួងការបរទេសដែរ។
សក្ខីកម្មរបស់សាក្សី បានឱ្យដឹងថា មានមនុស្សជាច្រើនរូប ទាំងនៅក្រសួងការបរទេស និងមន្ទីរបឹងត្របែក ត្រូវខ្មែរក្រហមយកចេញ ហើយបាត់ខ្លួនរហូត។ បញ្ហានេះ បានក្លាយជាអង្គហេតុនៅសាលាក្ដីខ្មែរក្រហមក្នុងពេលបច្ចុប្បន្ន។
សវនាការស្ដាប់សក្ខីកម្មរបស់សាក្សី រចឹម ទន់ នឹងត្រូវធ្វើនៅថ្ងៃទី១ សីហា ជាបន្តទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
ok
ពី ppហោ ណាំហុងធ្លាប់ក្តាប់អ្នកបញ្ញាវ័នបឹងត្របែកមែន។ គាត ឈន់ ធ្លាប់ជាអ្នកកាន់តំណែងខ្ពស់ក្នុងរបបខ្មែរក្រហមមែន។
Aug 01, 2012 11:52 PM
អ្នកអានអនាមិក
ពី Florida, USAI do believe, that the name of the high ranking members of ANGKA PAK during the pol pot regime, that the witness brought up, were responsible for the killing of educated Cambodians, and they also known as khmer vietming, and there are alot more of them in the current government in
Phnom Penh, that are still doing the same
kind of work of killing Cambodians, and destroying our Motherland for their foreign boss, or ONG LOEUNG.
Aug 01, 2012 07:39 PM
អ្នកអានអនាមិក
តុលាកាត្រូវតែកោះហៅអ្នកដែលជាប់ពាក់ព័ន្ធចូលស្រាយបំភ្លឺទើបការកាត់ក្តីមានផភាពយុត្តិធម៍។
Aug 01, 2012 05:58 AM
អ្នកអានអនាមិក
តុលាការ ពឹងលើភស្តុតាង និងសាក្សី ចុះបើសាក្សីឆ្លើយដូចនេះពិតជាយកជាការបានហើយ ព្រោះការពិតនៅតែជាការពិត។
Aug 01, 2012 04:48 AM
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
