គណៈកម្មាធិការប្រព្រឹត្តកម្មនៃសមាគមនិងអង្គការការពារសិទ្ធិមនុស្សកម្ពុជា ដែលមានអង្គការចំនួន៦ ជាសមាជិក បានសរសេរក្នុងសេចក្ដីប្រកាសព័ត៌មានរួមគ្នាមួយថា ការតាំងចិត្តរបស់សហគមន៍អន្តរជាតិក្នុងការបន្តផ្ដល់ថវិកាដល់សាលាក្ដី គឺជាបញ្ហាសំខាន់ក្នុងការប្រយុទ្ធប្រឆាំងនឹងនិទណ្ឌភាពនិងស្ដារនីតិរដ្ឋរបស់កម្ពុជាឡើងវិញ ។
នាយកប្រតិបត្តិនៃអង្គការក្រុមអ្នកច្បាប់ការពារសិទ្ធិកម្ពុជា លោកមេធាវី សុក សំអឿន ដែលជាសមាជិកនៃគណៈកម្មាធិការប្រព្រឹត្តិកម្មនៃសមាគមនិងអង្គការការពារសិទ្ធិមនុស្សកម្ពុជា បានមានប្រសាសន៍ថា បើសិនជាគ្មានថវិកាជំនួយបន្ថែម តុលាការអាចនឹងត្រូវបិទ ហើយការប្រឹងប្រែងស្វែងរកយុត្តិធម៌ជូនជនរងគ្រោះនឹងត្រូវបរាជ័យ ។
លោក សុក សំអឿន ថ្លែងដូច្នេះថា ៖ «យើងខ្លាចដូចថា កន្លងមក ដោយសារយើងឃើញតុលាការរអាក់រអួល ហើយយើងអត់ចង់ឲ្យមានការរអាក់រអួលអ៊ីចឹង ដល់ដឹងដំណឹងថា គេទៅកៀងគររកមូលនិធិ យើងក៏សម្រេចចិត្តគាំទ្រសុំឲ្យម្ចាស់ជំនួយជួយផ្ដល់ជំនួយតទៀត» ។
គួរជម្រាបថា សាលាក្ដីខ្មែរក្រហម បានចាប់ផ្ដើមដំណើរការនៅក្នុងឆ្នាំ២០០៦ ដោយគ្រោងទឹកប្រាក់ប្រមាណ ៥៦.៣លានដុល្លារសហរដ្ឋអាមេរិក និងប្រើរយៈពេលបីឆ្នាំ ។ រហូតមកទល់នឹងពេលនេះ សាលាក្ដីកំពុងតែជួបវិបត្តិថវិកា ហើយកំពុងស្វះស្វែងរកជំនួយបន្ថែមទៀតដើម្បីបន្តដំណើរការរកយុត្តិធម៌ដល់ប្រជាពលរដ្ឋខ្មែរ ដែលរងគ្រោះដោយសាររបបខ្មែរក្រហម ។
សេចក្ដីប្រកាសព័ត៌មានរបស់សង្គមស៊ីវិល បានឲ្យដឹងផងដែរថា កង្វះថវិកានឹងធ្វើឲ្យឯករាជភាពរបស់តុលាការនិងលទ្ធភាពក្នុងការស្វែងរកយុត្តិធម៌ដល់ប្រជាពលរដ្ឋកម្ពុជា ក៏ជួបបញ្ហាផងដែរ ។
នៅសប្ដាហ៍នេះ ប្រទេសជប៉ុនបានផ្ដល់ជំនួយដល់សាលាក្ដីជាទឹកប្រាក់ប្រមាណជិត ៣លានដុល្លារសហរដ្ឋអាមេរិក ។
កន្លងមក សាលាក្ដីបានស្នើសុំប្រទេសម្ចាស់ជំនួយឲ្យផ្ដល់ថវិកាចំនួនប្រមាណ ១១៤លានដុល្លារបន្ថែមទៀត ដើម្បីបន្តដំណើរការរបស់សាលាក្ដី ។
ទាក់ទងនឹងបញ្ហាថវិកានេះដែរ មន្ត្រីសាលាក្ដីខ្មែរក្រហម បានផ្ដល់ព័ត៌មានថា សាលាក្ដីនឹងធ្វើសន្និសីទកាសែតស្ដីពីការផ្ដល់ថវិកាពីម្ចាស់ជំនួយ នៅថ្ងៃអង្គារសប្ដាហ៍ក្រោយនេះ ៕