លោក ជុំ ម៉ី អ្នកទោសខ្មែរក្រហម ដែលទទួលបានសំឡេងគាំទ្រជាប្រធានសមាគមជនរងគ្រោះនៃរបបខ្មែរក្រហម បានចោទប្រកាន់ក្នុងសន្និសីទសារព័ត៌មាននៅថ្ងៃអាទិត្យថា ភាពលម្អៀងរបស់តុលាការសាលាដំបូងខ្មែរក្រហមបានបន្ថយសិទ្ធិតវ៉ារបស់ដើមបណ្តឹងជាជនរងគ្រោះបែរជាលើកតម្កើងសិទ្ធិជនជាប់ចោទ កាំង ហ្កេចអ៊ាវ ហៅ ឌុច។
លោក ជុំ ម៉ី ថ្លែងដូច្នេះថា ៖ «ខ្ញុំចង់ស្ដាប់មើល៍ថា តើតុលាការហ្នឹងយុត្តិធម៌ ឬមិនយុត្តិធម៌សម្រាប់សាលាក្ដីគំរូនេះ? ខ្ញុំចង់យល់។ ដូចពីដើមមកវាខុស ដល់ពេលឥឡូវវាខុសគ្នា កាប់សម្លាប់អស់ ១៦.០០០នាក់ តើគាត់ចង់យកកូនសិស្ស ឌុច ហ្នឹង ដើម្បីមកលាងកំហុស ឌុច ឬយ៉ាងម៉េច? ខ្ញុំចង់ដឹងបញ្ហាហ្នឹង»។
អនុប្រធានទី១ សមាគមជនរងគ្រោះនៃរបបខ្មែរក្រហម លោក ជុំ សីរ៉ាត មានប្រសាសន៍ថា ការចងក្រងបង្កើតជាសមាគមនេះឡើង ព្រោះតែព្រឹត្តិការណ៍ថ្ងៃទី២៧ ខែសីហា តុលាការសាលាដំបូងខ្មែរក្រហមមិនផ្តល់សិទ្ធិឲ្យមេធាវីរបស់ដើមបណ្តឹងបានសាកសួរពីអត្តចរិតរបស់ជនជាប់ចោទឈ្មោះ ឌុច នោះទេ។
លោកបន្តថា គោលបំណងនៃការបង្កើតសមាគមនេះឡើង ទី១ ចាត់ចែងរៀបចំជួយឧបត្ថម្ភគ្នាទៅមក ទាំងផ្នែកស្មារតី ទាំងផ្នែកសម្ភារៈ។ ទី២ បន្តឲ្យខ្ជាប់ខ្ជួនជានិរន្តរ៍នូវអនុស្សាវរីយ៍និងបំផុសឡើងវិញនូវសេចក្តីថ្លៃថ្នូររបស់បុព្វបុរសដែលបានបាត់បង់ជីវិតក្នុងរបបខ្មែរក្រហម។ ទី៣ ប្រុងប្រយ័ត្នកុំឲ្យក្មេងជំនាន់ក្រោយភ្លេចនូវអំពើយង់ឃ្នងនៃរបបខ្មែរក្រហមនិងជៀសវាងឲ្យបាននូវរបបនេះកុំឲ្យវិលត្រឡប់មកវិញបាន។ ទី៤ ចូលរួមលើកស្ទួយសេរីភាពនិងលទ្ធិប្រជាធិបតេយ្យនៃប្រជាជនខ្មែរ ក្នុងស្មារតីគោរពដល់បុព្វបុរសដែលបានចែកឋានទៅនោះ។
លោកបន្តថា សមាគមបន្តការតាមដានដោយឥតប្រហែសនូវដំណើរការនៃការកាត់ទោសមេដឹកនាំខ្មែរក្រហម ហើយទាមទារឲ្យតុលាការទទួលស្គាល់សិទ្ធិរបស់ជនរងគ្រោះជាដើមបណ្តឹងរដ្ឋប្បវេណីដើម្បីឲ្យទទួលបានយុត្តិធម៌។
មន្រ្តីនាំពាក្យនៃសាលាក្តីខ្មែរក្រហម លោក ឌឹម សុវណ្ណារុំ ថ្លែងថា ការបង្កើតសមាគមជាសិទ្ធិរបស់ប្រជាជន ហើយបើចោទថា សាលាក្តីលម្អៀងគួរតែតាមដានការជជែករបស់តុលាការពីថ្ងៃ២៦-២៧ ខែសីហានោះមក។
លោក ឌឹម សុវណ្ណារុំ មានប្រសាសន៍ថា ៖ «ដូច្នេះបើសិនជាពិនិត្យមើលនៅក្នុងស្មារតីនៃកិច្ចពិភាក្សាដេញដោលយ៉ាងសស្រាក់សស្រាំនោះ អាចនឹងដឹងថា តើការសម្រេចរបស់ចៅក្រមនៃសាលាដំបូងហ្នឹងវាយ៉ាងណា?»។
សូមជម្រាបថា សមាគមជនរងគ្រោះនៃរបបខ្មែរក្រហមនេះ ជ្រើសរើសដោយការបោះឆ្នោតពីក្រុមជនរងគ្រោះចំនួន៣៣រូប សម្រេចរើសយកសមាជិកសមាគមចំនួន ៨រូប ក្នុងនោះ លោក ជុំ ម៉ី ជាប់ជាប្រធានសមាគម លោក ជុំ សីរ៉ាត ជាអនុប្រធានទី១ និងលោក ប៊ូ ម៉េង ជាអនុប្រធានទី២ ហើយ៥នាក់ទៀតធ្វើការងាររដ្ឋបាលនិងហិរញ្ញិក៕