តាមប្រកាសលទ្ធផលពានរង្វាន់ កាលពីថ្ងៃទី ២៩ ខែកក្កដា លោក គល់ បញ្ញា គឺជាជ័យលាភី ១ រូប ក្នុងចំណោមមនុស្ស ៦ នាក់ ដែលទទួលពានរង្វាន់នេះ។
លោកត្រូវបានទទួលស្គាល់អំពីភាពក្លាហានក្នុងការដឹកនាំអង្គការខុមហ្រ្វែល ធ្វើការជំរុញឱ្យមានកំណែទម្រង់ប្រព័ន្ធបោះឆ្នោត នៅក្នុងប្រទេសកម្ពុជា ព្រមទាំងបានប្រមូលផ្ដុំក្រុមអ្នកស្ម័គ្រចិត្តចំនួន ៥ ម៉ឺននាក់ (50,000) រួមគ្នាបម្រើការងារសង្កេតការណ៍បោះឆ្នោតនៅកម្ពុជា និងបណ្ដុះបណ្ដាលពលរដ្ឋខ្មែរ ១៥ ម៉ឺននាក់ (150,000) ឱ្យបានយល់ដឹងអំពីការងារបោះឆ្នោត។
ព័ត៌មាននេះ ត្រូវបានចុះផ្សាយលើគេហទំព័ររបស់មូលនិធិ រ៉ូម៉ាន ម៉ាក់សៃសៃ អាវ័ដ សរសេរអំពីជីវប្រវត្តិសង្ខេបថា លោក គល់ បញ្ញា ធ្លាប់ជាកុមារម្នាក់រស់នៅក្នុងភាពភ័យរន្ធត់ ក្នុងរបបនយោបាយផ្ដាច់ការ ហើយកាលពីលោកមានអាយុទើបតែ៨ឆ្នាំ ឪពុកម្ដាយ និងក្រុមគ្រួសាររបស់លោកត្រូវបានខ្មែរក្រហមយកទៅសម្លាប់ចោល ហើយភាពតក់ស្លុតរបស់លោកបានដិតដាមក្នុងអារម្មណ៍រហូតដល់ពេញវ័យ។ ដោយសារតែលោកបានឆ្លងកាត់បទពិសោធន៏ ក្នុងរបបផ្ដាច់ការប្រល័យពូជសាសន៍ដ៏រន្ធត់ដូច្នេះ លោកមានគំនិតមួយចង់ផ្លាស់ប្ដូរសង្គម ឲ្យមានសន្តិភាព។
ក្រោយពេល លោក គល់ បញ្ញា បានរៀនចប់សកលវិទ្យាល័យនៅកម្ពុជា លោកបានចាប់ផ្ដើមចូលប្រលូកការងារសិទ្ធិមនុស្ស និងអង្គការក្រៅរដ្ឋាភិបាលឯករាជធ្វើការទាក់ទងការរៀបចំការ បោះឆ្នោតជាបណ្ដើរៗមក រហូតដល់ឆ្នាំ១៩៩៨ លោកបានទទួលដំណែងជា នាយប្រតិបត្តិ នៃគណៈកម្មាធិការ ដើម្បីបោះឆ្នោតដោយសេរីនិងត្រឹមត្រូវនៅកម្ពុជា បន្ទាប់ពីលោកបានទទួលសញ្ញាប័ត្រថ្នាក់បណ្ឌិតផ្នែកនយោបាយ នៃការផ្លាស់ប្ដូរការអភិវឌ្ឍន៍រួចមក។
មូលនិធិនេះបានកោតសរសើរស្នាដៃលោក គល់ បញ្ញា ថា លោកហ៊ានតស៊ូធ្វើការក្រោមការគំរាមកំហែងក្នុងរបបនយោបាយផ្ដាច់ការ ដើម្បីការងារបោះឆ្នោតដោយសេរី និងត្រឹមត្រូវនៅកម្ពុជា ចាប់តាំងពីប្រទេសកម្ពុជាបានប្ដូរពីរបបនយោបាយកុម្មុយនិស្ត មករបបប្រជាធិបតេយ្យ នៅឆ្នាំ១៩៩៣ មកទល់សព្វថ្ងៃ។ ជាពិសេសក្នុងពេលបោះឆ្នោតឆ្នាំ២០០៨ ដែលលោក គល់ បញ្ញា បានអប់រំផ្សព្វផ្សាយប្រជាពលរដ្ឋ ឲ្យយល់ដឹងអំពីនីតិវិធី និងដំណើរការបោះឆ្នោត រួមទាំងការជ្រើសរើស និងបញ្ជូនអ្នកសង្កេតការណ៍បោះឆ្នោតស្ម័គ្រចិត្តចំនួន ១ ម៉ឺននាក់ សង្កេតការណ៍ដំណើរការបោះឆ្នោតនៅស្ថានីយបោះឆ្នោតចំនួន ៩៥% នៅទូទាំងប្រទេស ដើម្បីជំរុញឲ្យដំណើរការបោះឆ្នោតប្រកបដោយសេរី និងត្រឹមត្រូវ។
មូលនិធិ រ៉ូម៉ាន ម៉ាក់សៃសៃ អាវ័ដ បានចាត់ទុកថា ក្នុងការងារនៃគណៈកម្មាធិការដើម្បីបោះឆ្នោតដោយសេរី និងត្រឹមត្រូវនៅកម្ពុជា លោក គល់ បញ្ញា បានរៀបចំបើកសិក្ខាសាលាអប់រំបុគ្គលិកស្ម័គ្រចិត្តកម្ពុជា ពីចំនួន ៥ ម៉ឺនទៅ ១ សែន ៥ ម៉ឺននាក់ អំពីចំណេះដឹងនានា ទាក់ទងនឹងដំណើរការចុះឈ្មោះ និងដំណើរការបោះឆ្នោត រួមទាំងបានបណ្ដុះបណ្ដាលអ្នកសង្កេតការណ៍បោះឆ្នោត និងធ្វើសកម្មភាពផ្សេងៗ ទាក់ទងទៅនឹងការបោះឆ្នោតដោយសេរី និងត្រឹមត្រូវ ដើម្បីពង្រឹងលទ្ធិប្រជាអធិបតេយ្យនៅកម្ពុជា ដែលមូលនិធិនេះ ហៅលទ្ធិប្រជាធិបតេយ្យនៅកម្ពុជាថា នៅផុយស្រួយ និងស្ថិតក្នុងសភាពគ្រោះថ្នាក់។
មូលនិធិ រ៉ូម៉ាន ម៉ាក់សៃសៃ អាវ័ដ រំពឹងថា ពានរង្វាន់នេះ ដែលន័យថា ពានរង្វាន់នៃភាពជោគជ័យក្នុងនាមជាអ្នកដឹកនាំនោះ នឹងជំរុញឲ្យកម្ពុជាមានអភិបាលកិច្ចល្អ និងលទ្ធិប្រជាធិបតេយ្យពិតប្រាកដនៅកម្ពុជា ទៅអនាគត ៖ «ក្នុងការជ្រើសរើស គល់ បញ្ញា ដើម្បីទទួល ពានរង្វាន់ រ៉ូម៉ាន ម៉ាក់សៃសៃ ឆ្នាំ ២០១១ នេះ ក្រុមប្រឹក្សាគ្រប់គ្រង បានទទួលស្គាល់ ការប្ដេជ្ញាចិត្ត និងភាពក្លាហាន ក្នុងភាពជាអ្នកដឹកនាំរបស់គាត់ ដើម្បីទ្រទ្រង់យុទ្ធនាការបំភ្លឺ រៀបចំ និងត្រួតពិនិត្យប្រជាពលរដ្ឋ ដើម្បីធានាការបោះឆ្នោតដោយសេរីនិងត្រឹមត្រូវ ព្រមទាំងទាមទារឲ្យការដឹកនាំគ្រប់គ្រងមានតម្លាភាព ពីមន្ត្រីដែលត្រូវបានប្រជាពលរដ្ឋបោះឆ្នោតជ្រើសតាំងឡើង ក្នុងការធានាបាននូវលទ្ធិប្រជាធិបតេយ្យ ដែលកំពុងចាប់ពន្លកនៅក្នុងកម្ពុជាសព្វថ្ងៃ»។
ឆ្លើយតបទៅនឹងព័ត៌មានទទួលពានរង្វាន់នេះ លោក គល់ បញ្ញា មានប្រសាសន៍ថា លោករំភើបចិត្ត ហើយពានរង្វាន់នេះនឹងជំរុញឲ្យលោកខិតខំធ្វើការខ្លាំងថែមទៀត ដើម្បីឲ្យស័ក្ដិសមនិងកិត្តិយស ដែលទទួលបានរង្វាន់នេះ ដោយលោកបានរិៈគន់ ប្រព័ន្ធបោះឆ្នោតនៅកម្ពុជានៅខ្សោយនៅឡើយដែលទាមទារឲ្យមានការកែទម្រង់បន្ថែម ៖ «ខ្ញុំមានកិត្តិយសធំមែនទែន ហើយមានមោទនភាពមែនទែនដែលបានទទួលរង្វាន់នេះ គឺថាវាមានសារៈសំខាន់ណាស់ ចំពោះពានរង្វាន់នេះ។ ហើយខ្ញុំគិតថា ពានរង្វាន់នេះធ្វើឲ្យខាងខ្ញុំខិតខំធ្វើការថ្មីមួយទៀត ដើម្បីធានាការបោះឆ្នោតនឹងឲ្យល្អប្រសើរ ដោយសេរី យុត្តិធម៌ ឲ្យដំណើរការប្រជាធិបតេយ្យនៅកម្ពុជានឹងដំណើរការល្អ»។
ចំពោះការរិៈគន់ប្រព័ន្ធបោះឆ្នោតនេះ លោក ទេព នីថា អគ្គលេខាធិការនៃគណៈកម្មាធិការបោះឆ្នោតជាតិ ហៅកាត់ថា គ.ជ.ប កំពុងធ្វើការកែទម្រង់ជាបណ្ដើរហើយ តែមិនបានល្អឥតខ្ចោះដូចដែលលោក គល់ បញ្ញា ចង់បាននោះទេ។ តែយ៉ាងណាក្ដី លោក ទេព នីថា សម្ដែងការអបអរចំពោះលោក គល់ បញ្ញា ដែលទទួលពានរង្វាន់ រ៉ូម៉ាន ម៉ាក់សៃសៃ ឆ្នាំ២០១១នេះ។
លោក ទេព នីថា ៖ «យើងខ្ញុំជាអ្នករៀបចំបោះឆ្នោតដូចគ្នា ហើយម្យ៉ាងទៀតក៏ជាខ្មែរដូចគ្នា ខ្ញុំអបអរសាទរចំពោះលទ្ធផលដែលកាត់ធ្វើបាននេះ ហើយសង្ឃឹមថា ការបានទទួលពានរង្វាន់នេះ គាត់អាចនឹងរួមសហការបន្ថែមទៀតជាមួយ គ.ជ.ប តាមតួនាទីរបស់គាត់ ដើម្បីពង្រឹង និងរៀបចំការបោះឆ្នោតនៅកម្ពុជាឲ្យកាន់តែប្រសើរ»។
ឈ្មោះមូលនិធិពានរង្វាន់ រ៉ូម៉ាន ម៉ាក់សៃសៃ អាវ័ដ ត្រូវបានបង្កើតឡើង បន្ទាប់ពីលោកប្រធានាធិបតីហ្វីលីពិន ឈ្មោះ រ៉ូម៉ាន ម៉ាក់សៃសៃ ស្លាប់ក្នុងឧបទ្ទវហេតុធ្លាក់យន្តហោះមួយ នៅឆ្នាំ ១៩៥៧។ មូលនិធិនេះត្រូវបានបង្កើតឡើងដោយលោក រ៉ុឃីហ្វីលើ ក្នុងបំណងរំលឹកគុណូបការៈ និងគំរូល្អ ព្រមទាំងអំពើល្អរបស់លោកប្រធានាធិបតី កាលនៅរស់ លោកបានបំពេញការងារដ៏ថ្លៃថ្លានៅក្នុងសង្គមដូចជា ការគោរពតម្លៃរបស់មនុស្សជាតិ និងអប់រំមនោគមលទ្ធិប្រជាធិបតេយ្យ។
លោក គល់ បញ្ញា នឹងធ្វើដំណើរទៅទីក្រុង ម៉ានិល (Manila) ប្រទេសហ្វីលីពិន (Philippine) ដើម្បីទទួលរង្វាន់នេះនៅថ្ងៃទី៣១ ខែសីហា ឆ្នាំ២០១១៕