ស្របពេលនេះដែរ មន្ត្រីជាន់ខ្ពស់នៃគណបក្ស សម រង្ស៊ី និងគណបក្សសិទ្ធិមនុស្ស មានគម្រោងស្នើសុំឲ្យលោក ខឺត ខែមប៊ែល គប្បីលើកយកបញ្ហារំលោភសិទ្ធិមនុស្សនៅកម្ពុជា ទៅពិភាក្សាជាមួយមន្ត្រីជាន់ខ្ពស់រដ្ឋាភិបាលកម្ពុជា។
ប្រធានគណបក្សសិទ្ធិមនុស្ស លោក កឹម សុខា បានរិះគន់ថា មានការធ្វើទុក្ខបុកម្នេញលើប្រជាពលរដ្ឋ ដូចជាការរឹបអូសដីធ្លី ការបាញ់សំលាប់ប្រជាពលរដ្ឋនៅពេលដែលពួកគាត់ងើបតវ៉ាទាមទាររកដំណោះស្រាយជម្លោះដីធ្លី និងការពារព្រៃឈើកន្លងមក។
បញ្ហាទាំងអស់នេះលោកចង់ឲ្យឧបការីរដ្ឋមន្ត្រីក្រសួងការបរទេសសហរដ្ឋអាមេរិក លោក ខឺត ខែមប៊ែល លើកយកបញ្ហារំលោភសិទ្ធិមនុស្សទាំងនោះ ពិភាក្សាជាមួយមន្ត្រីតំណាងរដ្ឋាភិបាលកម្ពុជា ដើម្បីបញ្ឈប់បញ្ហាទាំងនោះ៖ «ទាំងអស់នេះសុទ្ធតែជាការទទួលខុសត្រូវរបស់រដ្ឋាភិបាលបច្ចុប្បន្ន ហើយដែលយើងមិនអាចអត់អោនទោសឲ្យទេ ជាពិសេសមហាអំណាចអាមេរិក ដែលជាអ្នកគោរពសិទ្ធិមនុស្សហ្នឹង គឺសូមឲ្យរដ្ឋាភិបាលខ្មែរហ្នឹងគោរពសិទ្ធិរបស់ប្រជាពលរដ្ឋខ្មែរ នេះជាចំណុចទី១ធំ។ ចំណុចទី២ ពាក់ព័ន្ធនឹងការបោះឆ្នោត។ ការបោះឆ្នោតនេះក៏ត្រូវតែប្រាប់ទៅរដ្ឋាភិបាលខ្មែរថា ការបោះឆ្នោតណាមួយដែលមិនមានលក្ខណៈសេរី ត្រឹមត្រូវ និងយុត្តិធម៌ វានាំមកនូវការបះបោរ»។
ស្រដៀងគ្នានេះដែរ អ្នកនាំពាក្យគណបក្ស សម រង្ស៊ី លោក យឹម សុវណ្ណ និងជាតំណាងរាស្ត្រ បានមានប្រសាសន៍ថា ប្រជាពលរដ្ឋកម្ពុជាកំពុងតែរងគ្រោះយ៉ាងធ្ងន់ធ្ងរ ដោយសារការរឹបយកដីធ្លី និងការបង្ក្រាបដោយហិង្សាពីកងកម្លាំងប្រដាប់អាវុធរបស់រដ្ឋាភិបាលកន្លងមក។
លោក យឹម សុវណ្ណ៖ «ឥឡូវនេះមានការបាញ់សំលាប់អ្នកស្នេហាជាតិ ប្រព្រឹត្តអំពើឃោរឃៅដូចសម័យខ្មែរក្រហម។ មើលនៅក្នុងឃុំកំពង់ដំរី បាញ់សំលាប់ក្មេងស្រី ចាប់សម្រាតប្រជាពលរដ្ឋស្រ្តី ...នេះជាទង្វើអមនុស្សធម៌ ដែលកម្ពុជាមិនអាចទទួលយកបានជាដាច់ខាត។ ដូច្នេះសុំឲ្យតំណាងរដ្ឋាភិបាលអាមេរិកាំង ហើយនិងក្រសួងការបរទេសខ្មែរ ជជែករឿងហ្នឹង ដោះស្រាយបញ្ហាហ្នឹងកុំទុកឲ្យស្ថានភាពបែបនេះកើតមានឡើងនៅក្នុងសង្គមខ្មែរតទៅទៀត»។
អ្នកនាំពាក្យក្រសួងការបរទេសកម្ពុជា លោក កុយ គួង បានមានប្រសាសន៍ថា លោក ខឺត ខែមប៊ែល នឹងជួបពិភាក្សាជាមួយរដ្ឋមន្ត្រីក្រសួងការបរទេស លោក ហោ ណាំហុង និងជាឧបនាយករដ្ឋមន្ត្រី នៅព្រឹកថ្ងៃទី២៥ ខែឧសភា ឆ្នាំ២០១២ ប៉ុន្តែលោកមិនបានប្រាប់ឲ្យដឹងអំពីប្រធានបទនៃការជួបពិភាក្សានោះទេ។
ទាក់ទងនឹងបញ្ហានេះ អ្នកនាំពាក្យនៃស្ថានទូតសហរដ្ឋអាមេរិកនៅប្រទេសកម្ពុជា លោក ស៊ន ម៉ាក្ខិនថស ( Sean McIntosh ) បានមានប្រសាសន៍តាមប្រព័ន្ធសារអេឡិចត្រូនិក ( Email ) នៅថ្ងៃទី២៣ ខែឧសភា ថា៖ លោក ខឺត ខែមប៊ែល នឹងដឹកនាំគណៈប្រតិភូជាន់ខ្ពស់មកចូលរួមក្នុងកិច្ចប្រជុំនៅទីក្រុងភ្នំពេញ ស្ដីពីកិច្ចប្រជុំកំពូលអាស៊ាន និងកិច្ចប្រជុំផ្ដោតលើទន្លេមេគង្គក្រោម។ កិច្ចប្រជុំនេះផ្ដួចផ្ដើមឡើងដោយសហរដ្ឋអាមេរិកកន្លងមក។
លោក ស៊ន ម៉ាក្ខិនថស បានមានប្រសាសន៍ទៀតថា លោក ខឺត ខែមប៊ែល គ្រោងជួបជាមួយមន្ត្រីជាន់ខ្ពស់រដ្ឋាភិបាលកម្ពុជា មួយចំនួន ផ្ដោតលើផលប្រយោជន៍ទៅវិញទៅមក។
លោក ខឺត ខែមប៊ែល ធ្លាប់បានមកទស្សនកិច្ចនៅប្រទេសកម្ពុជា រួចម្តងហើយ នៅថ្ងៃទី៣ ខែកុម្ភៈ ឆ្នាំ២០១២ កន្លងទៅនេះ ដើម្បីរឹតចំណង និងកិច្ចសហប្រតិបត្តិការរវាងកម្ពុជា ដែលជាប្រធានអាស៊ាន នៅឆ្នាំ២០១២ ជាមួយសហរដ្ឋអាមេរិក។
ទស្សនកិច្ចរបស់លោក ខឺត ខែមប៊ែល មកប្រទេសកម្ពុជា នៅពេលនេះ គឺនៅស្របពេលដែលប្រទេសកម្ពុជា កំពុងតែដំណើរការយុទ្ធនាការឃោសនាបោះឆ្នោតជ្រើសរើសក្រុមប្រឹក្សាឃុំសង្កាត់ រយៈពេល ១៥ថ្ងៃ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។