ហេតុការណ៍បាញ់គំរាមនេះបានកើតមានឡើងកាលពីវេលាម៉ោង៤ល្ងាច នាថ្ងៃទី២៣ ខែកញ្ញា ឆ្នាំ២០០៨ នៅភូមិចម្លងរម៉ាំងលើ ឃុំអូរសំរិល ស្រុកសំឡូត ខេត្តបាត់ដំបង បន្ទាប់ពីប្រជាពលរដ្ឋចំនួន២០គ្រួសារបាននាំគ្នាទៅសាងសង់ខ្ទមនៅលើដីមួយកន្លែងដែលគេអះអាងថា ជាដីរបស់លោកវរសេនីយ៍ឯក ប៉ែន សាវឿន ជាទាហានភូមិភាគ៥ ប្រចាំទិសខេត្តពោធិ៍សាត់។
តាមប្រភពព័ត៌មានពីនគរបាលស្រុកសំឡូតបានឲ្យដឹងថា លោកវរសេនីយ៍ឯក ប៉ែន សាវឿន បានបញ្ជាកូនទាហានរបស់ខ្លួនចំនួន៦នាក់ទៅហាមឃាត់ក្រុមអ្នកភូមិចំនួន២០គ្រួសារមិនឲ្យសាងសង់ខ្ទមលើដីនោះ ប៉ុន្តែត្រូវបានពលរដ្ឋទាំង២០គ្រួសារប្រដាប់ដោយកាំបិតគ្រប់ដៃដេញកាប់ទើបទាហានទាំង៦នាក់បានប្រើកាំភ្លើង R15 ពីរដើម និងកាំភ្លើងខ្លីមួយដើមបាញ់បង្ហើរចំនួន៦គ្រាប់។
សមាជិកក្រុមប្រឹក្សាឃុំអូរសំរិល លោក អ៊ឹង សំអុល បានថ្លែងថា ដីទំហំជាង១០០ហិកតារនៅតំបន់នោះត្រូវបានគេពុះជាទំហំ៥ហិកតារ ហើយបែងចែកគ្នានិងកាន់កាប់ដោយក្រុមគ្រួសារលោកវរសេនីយ៍ឯក ប៉ែន សាវឿន និងកូនទាហានរបស់លោក ចំណែកឯប្រជាពលរដ្ឋទាំង២០គ្រួសារនោះរងការចោទថាជាក្រុមអនាធិបតេយ្យ។
លោក អ៊ឹង សំអុល បានមានប្រសាសន៍ថា ៖ «មិនមែនរបស់គាត់ទាំងអស់ទេ របស់កូនចៅគាត់ខ្លះ គ្រួសារសាច់សាលោហិតគាត់ខ្លះ»។
ទោះជាយ៉ាងណាគេមិនអាចទំនាក់ទំនងភាគីប្រជាពលរដ្ឋនិងលោកវរសេនីយ៍ឯក ប៉ែន សាវឿន ដើម្បីធ្វើការបញ្ជាក់បន្ថែមជុំវិញបញ្ហាទំនាស់ដីធ្លីខាងលើរហូតដល់មានការប្រើកាំភ្លើងបាញ់គំរាមនេះទេ។
អភិបាលស្រុកសំឡូត លោក ហែន សុផល បានមានប្រសាសន៍ថា ទំនាស់ដីធ្លីរហូតដល់មានការបាញ់បោះនេះ អាជ្ញាធរស្រុកមិនទាន់ចេញលិខិតកាន់កាប់ឬទទួលស្គាល់ភាគីណាមួយនៅឡើយទេ។
លោក ហែន សុផល បានមានប្រសាសន៍ថា ៖ «ខាងយើងខ្ញុំជាអាជ្ញាធរមានសិទ្ធិចេញលិខិតកាន់កាប់បណ្ដោះអាសន្ន ព្រោះខ្ញុំអត់ទាន់មានចេញសិទ្ធិឲ្យអ្នកណាដែរ»។
មន្ត្រីសមាគមការពារសិទ្ធិមនុស្សអាដហុក លោក យិន ម៉េងលី បានថ្លែងថា យោធាទាំងនោះមិនគួរប្រើប្រាស់អាវុធបាញ់គំរាមទៅប្រជាពលរដ្ឋទេ ហើយថាបើសិនប្រជាពលរដ្ឋទាំងនោះបានរំលោភបំពានទៅលើដីនោះ ពួកគេអាចដាក់ប្តឹងទៅគណៈកម្មការសុរិយោដីស្រុក ឬក៏ប្តឹងទៅតុលាការដើម្បីអនុវត្តទៅតាមផ្លូវច្បាប់។
លោក យិន ម៉េងលី បានឲ្យដឹងថា ៖ «ការបាញ់បោះ ការប្រើប្រាស់កម្លាំង ឬក៏ការទៅដោះស្រាយដោយកម្លាំងនេះ វាមិនសមស្របទៅតាមផ្លូវច្បាប់ទេ យើងគប្បីតែចៀសវាងបញ្ហានេះ ហើយប្រគល់ភារកិច្ចនេះឲ្យគណៈកម្មការសុរិយោដីឲ្យតុលាការធ្វើការដោះស្រាយទៅតាមផ្លូវច្បាប់»។
លោក ហែន សុផល បានមានប្រសាសន៍ថា គណៈបញ្ជាការឯកភាពស្រុកនៅថ្ងៃព្រហស្បតិ៍ ទី២៥ ខែកញ្ញា បានដឹកនាំកម្លាំងជាង៣០នាក់ចុះធ្វើការត្រួតពិនិត្យស្រាវជ្រាវជុំវិញជម្លោះដីធ្លីរវាងក្រុមទាហាននិងប្រជាពលរដ្ឋនេះដើម្បីធ្វើរបាយការណ៍ដាក់ទៅថ្នាក់ដើម្បីដោះស្រាយ ប៉ុន្តែលទ្ធផលយ៉ាងណានោះគេនៅមិនទាន់ដឹងនៅឡើយទេ៕