សកម្មភាពនេះបានកើតមានឡើងចាប់តាំងពីក្រុមហ៊ុន ស៊ីអាយវី ទទួលបានការសិក្សាលើផ្ទៃដីជាង១ពាន់ហិកតារដើម្បីដាំដុះដំណាំកៅស៊ូ ហើយរាល់សកម្មភាពដែលក្រុមហ៊ុននេះប៉ុនប៉ងឈូសឆាយតែងតែងទទួលបានការរារាំងពីប្រជាពលរដ្ឋ។
ប្រជាពលរដ្ឋម្នាក់បានឲ្យដឹងថា ៖ «ខ្ញុំឈ្មោះ គង់ នាង កំពុងតែដេញអាត្រាក់ឲ្យទៅវិញ អត់ឲ្យឈូសដី ប្រជាពលរដ្ឋអត់មានអីធ្វើ។ ថ្ងៃក្រោយមកទៀត ពួកខ្ញុំមកទៀត មិនឲ្យឈូស មិនឲ្យធ្វើទាំងអស់។ ខំបោះឆ្នោតឲ្យគាត់ជាប់ គាត់មិនមើលឃើញអ្នកក្រីក្រទេ តាមការពិតជិះជាន់អ្នកក្រីក្រជាងគេ»។
តំណាងក្រុមហ៊ុនស៊ីអាយវីបានអះអាងថា គ្រឿងចក្របានដកចេញមកក្រៅហើយ តែការដោះស្រាយស្ថិតនៅលើអាជ្ញាធរ ៖ «អាហ្នឹងវាពាក់ព័ន្ធទៅលើអាជ្ញាធរជាមួយនឹងប្រជាពលរដ្ឋ»។
សហគមន៍ប្រជាពលរដ្ឋគឺលោក សារ៉ែន កែត បានឲ្យដឹងថា អាជ្ញាធរស្រុកពុំមានចេតនានឹងដោះស្រាយឡើយដោយហាក់ដូចជានៅពីក្រោយក្រុមហ៊ុននោះ។ លោកបានអះអាងថា មេដឹកនាំតវ៉ាមួយចំនួនត្រូវបានអភិបាលស្រុកលួងលោមឲ្យបញ្ឈប់សកម្មភាពដើម្បីបម្រើផលប្រយោជន៍ដល់ក្រុមហ៊ុន។
លោក សារ៉ែន កែត បានមានប្រសាសន៍ថា ៖ «ចៅហ្វាយស្រុកគាត់ឲ្យខ្ញុំឈប់តវ៉ា យកលុយចិញ្ចឹមកូន ចិញ្ចឹមប្រពន្ធវិញទៅ។ គាត់ហៅខ្ញុំកាលនៅថ្ងៃទី១៩ នៅនឹងវត្តក្បាលត្រាចហ្នឹង ដើម្បីនឹងការសម្រួលជាមួយខ្ញុំ តែខ្ញុំអត់ព្រមទេ ពីព្រោះគាត់មាននីតិវិធីឲ្យខ្ញុំដើរចេញ ឲ្យខ្ញុំហ្នឹងមានការងារធ្វើ គ្រាន់តែជាល្បិចរបស់គាត់ទេ ខ្ញុំជឿថា មិនមែនឲ្យខ្ញុំធ្វើមែនទែនទេ បើគាត់មិនខំប្រឹងដោះស្រាយបែបនេះទេ ក្រុមហ៊ុនឈូសឆាយវាអស់លុយច្រើនហើយ អ៊ីចឹងគាត់គួរតែប្រឹង។ ប្រើវិធីសាស្រ្ដបែបណាដែលគាត់បញ្ចុះបញ្ចូលប្រជាពលរដ្ឋឲ្យព្រមយកលុយយកកាក់»។
អភិបាលស្រុកស្នួល គឺលោក អ៊ីវ សោភុម បានជម្រាបថា លោកនឹងចុះទៅពិនិត្យសកម្មភាពដែលកើតឡើងនោះដើម្បីផ្ដល់យុត្តិធម៌ទាំងសងខាង ហើយលោកបានបដិសេធទៅនឹងការចោទប្រកាន់របស់ប្រជាពលរដ្ឋ។
លោក អ៊ីវ សោភុម បានឲ្យដឹងថា ៖ «ខ្ញុំមានចិត្តគិតគូរអំពីប្រជាពលរដ្ឋដើម្បីរកយុត្តិធម៌ជូនគាត់ ប៉ុន្តែគាត់អត់យល់អំពីច្បាប់ អំពីទម្លាប់អី អ្នកខ្លះចេះតែចោទ ចេះតែប្រកាន់អីអ៊ីចឹងទៅ អាហ្នឹងជាសិទ្ធិរបស់គាត់ទេ»។
នៅក្នុងលិខិតចំណារសម្រេចរបស់សាលាខេត្តក្រចេះ លេខ៣៦៩ ល.ក្រ.ច. លោកអភិបាលខេត្ត ខាំ ភឿន បានសម្រេចឲ្យក្រុមហ៊ុនស៊ីអាយវី អភិវឌ្ឍលើផ្ទៃដី៣០០ហិកតារដោយតម្រូវឲ្យសហការជាមួយសមត្ថកិច្ចពាក់ព័ន្ធនិងអាជ្ញាធរមូលដ្ឋានដើម្បីជួយសម្របសម្រួលជាមួយប្រជាពលរដ្ឋដែលមានពាក់ព័ន្ធដីស្រែចម្ការ ប៉ុន្តែកាលពីថ្ងៃទី២០ សីហា ប្រធានក្រុមប្រឹក្សាភិបាលរបស់ក្រុមហ៊ុនស៊ីអាយវី គឺលោក ហ៊ាង ហ្វូខាយ បានប្ដឹងចោទប្រកាន់ប្រជាពលរដ្ឋ៣នាក់ ថា បានទទួលការញុះញង់ពីសមត្ថកិច្ចឲ្យទៅទន្រ្ទានលើដីក្រុមហ៊ុនចំនួន៧៦៩ហិកតារទៅវិញ ហើយទារសំណងជំងឺចិត្តចំនួន១០ម៉ឺនដុល្លារ៕