លោក ពារ គឹមហេង នាយរងខណ្ឌរដ្ឋបាលព្រៃឈើក្រុងប៉ៃលិនបានថ្លែងថា កម្លាំងរដ្ឋបាលព្រៃឈើក្រុងប៉ៃលិន និងរដ្ឋបាលព្រៃឈើខេត្តបាត់ដំបង ៩នាក់ សហការជាមួយកងរាជអាវុធហត្ថក្រុងប៉ៃលិន៧នាក់ កាលពីថ្ងៃទី២០ ខែសីហា បានចាប់អេស្ការវេទ័រ១គ្រឿងយកទុកនៅទីបញ្ជាការដ្ឋានកងរាជអាវុធហត្ថខណ្ឌសាលាក្រៅ ។
លោក ពារ គឹមហេង បានឲ្យដឹងថា ៖ «ក្រោយពីខ្ញុំចាប់ឃាត់ មានអ្នកផ្សេងទេដែលគាត់ថា ដីនេះជាដីរបស់លោក កែវ សុមេទ្ធ ហើយអ៊ីចឹងខ្ញុំថាឲ្យសុំអញ្ជើញប្រធានសហគមន៍ កែវ សុមេទ្ធហ្នឹងមកជួបខាងខ្ញុំមក ហើយយកឯកសារពាក់ព័ន្ធទាំងប៉ុន្មានមកឲ្យខាងខ្ញុំត្រួតពិនិត្យ ព្រោះនេះជាដីព្រៃរបស់រដ្ឋ ។ ហើយយើងមុនធ្វើអីក៏សហគមន៍ត្រូវមានការអនុញ្ញាតដែរ កិច្ចអភិវឌ្ឍន៍អីក៏មានការអភិវឌ្ឍដែរ អ៊ីចឹងខ្ញុំទាមទារយកឯកសារយកមកត្រូតពិនិត្យ ។ កន្លងមកគាត់អត់ប្រគល់ឲ្យ» ។
យោងតាមប្លង់ទីតាំងរបស់មន្ទីររៀបចំដែនដីនគរូបនីយកម្មសំណង់ និងសុរិយោដី ក្រុងប៉ៃលិន ដីព្រៃសម្រាប់ធ្វើការដាំដុះកូនឈើនេះមានទំហំ២០០ហិកតារ មានព្រំប្រទល់ខាងជើងទល់នឹងដីបម្រុងទុកធ្វើព្រលានយន្តហោះ ខាងត្បូងទល់នឹងត្រពាំងស្នោរ ខាងកើតទល់នឹងជើងភ្នំកេះ ខាងលិចទល់នឹងផ្លូវស្ថិតក្នុងភូមិទំនប់ សង្កាត់ស្ទឹងត្រង់ ខណ្ឌសាលាក្រៅ ក្រុងប៉ៃលិន ។
លោក ពារ គឹមហេង បានថ្លែងថាតាមការពិនិត្យគ្រឿងចក្របានធ្វើសកម្មភាពឈូសចូលទទឹងប្រវែងជិត៣០០ម៉ែត្រ និងបណ្តោយជាង១០០០ម៉ែត្រលើផ្ទៃដីរដ្ឋ សម្រាប់ការដាំដុះកូនឈើដែលមានទំហំ២០០ហិកតា ។
លោក ពារ គឹមហេង បានមានប្រសាសន៍ថា ៖ «ដីនេះជាដីគម្រោងដាំឈើរបស់រដ្ឋ ដែលសាលាក្រុងបានប្រគល់មកខាងរដ្ឋបាលព្រៃឈើក្រុងប៉ៃលិន ជាដីឯកជនរបស់រដ្ឋសម្រាប់ធ្វើការដាំដុះកូនឈើឡើងវិញ ។ ហើយមួយផ្នែកទៀតជាប់ព្រំដីខាងខ្ញុំគឺ កន្លងមកគឺឈ្មោះថា សហគមន៍ព្រៃឈើ តែសហគមន៍ហ្នឹងគាត់មិនបានធ្វើអីឲ្យវាច្បាស់លាស់ទេ ។ យើងតែងតែហៅគាត់មកឲ្យធ្វើលិខិតស្នាមដើម្បីយើងបំពេញបែបបទ ស្នើមកថ្នាក់ដឹកនាំយើងដើម្បីឲ្យគាត់បង្កើតទៅតាមនីតិវិធីច្បាប់សហគមន៍ព្រៃឈើ ។ ស្រាប់ដល់ពេលចុះបង្ក្រាបទៅវាឃើញជាការឈូសឆាយហ៊ុមព័ទ្ធទៅជាលក្ខណៈចង់យកដីធ្វើជាដីឯកជន» ។
លោក កែវ សុមេទ្ធ ប្រធានអង្គការសហគមន៍អភិវឌ្ឍន៍តាមព្រំដែនកម្ពុជា មិនអាចទាក់ទងសុំការបញ្ជាក់ជុំវិញការឈូសឆាយលើដីរដ្ឋទុកដាំកូនឈើនេះទេ ។
ប៉ុន្តែបើតាមលោក ពារ គឹមហេង បានបញ្ជាក់ថាក្រោយពីអេស្កាវេទ័រមួយគ្រឿងត្រូវបានចាប់រក្សាទុកនៅទីបញ្ជការដ្ឋានកងរាជអាវុធហត្ថខណ្ឌសាលាក្រៅរួចមក លោក កែវ សាមេទ្ធ បានបើកឡានទៅមើល ហើយបានបញ្ជាពីក្នុងរថយន្តមកថា ឲ្យប្រគល់សោអេស្ការវេទ័រទៅឲ្យលោកវិញ ហើយបោះផែនទីមិនច្បាស់លាស់មួយតាមកញ្ចក់ឡានចេញមកក្រៅ ទៅលើដីឲ្យក្រុមរដ្ឋបាលព្រៃឈើមើល ។
លោក ពារ គឹមហេង បានបញ្ជាក់ថា ៖ «គាត់គប់ ហើយរូបភាពនេះ គាត់ដាក់ក្នុងស៊ុមកញ្ចក់មួយយ៉ាងស្អាត ហើយគាត់គ្រវែងតាមកញ្ចក់ឡាន ហើយគាត់បើកឡានត្រឡប់ទៅវិញ» ។
លោក អ៊ី ឈាន អភិបាលក្រុងប៉ៃលិនថ្លែងថា ការដែលគ្រឿងចក្រឈូសឆាយចូលដីរដ្ឋទុកសម្រាប់ដាំកូនឈើដែលមានទទឹងជិត៣០០ម៉ែត្រ និងបណ្តោយជាង១០០០ម៉ែត្រនោះ គឺជារឿងយល់ច្រឡំ ហើយចូលព្រំគ្នាបន្តិចបន្តួចប៉ុណ្ណោះ ។
លោក អ៊ី ឈាន បានមានប្រសាសន៍ថា ៖ «គ្រាន់តែប៉ះព្រំគ្នាបន្តិចបន្តួច អានោះវាច្រឡំ វាច្រឡំដូចតែគ្នាហ្នឹង ។ ឥឡូវកំពុងដោះស្រាយ មិនត្រូវទេ ពីព្រោះអាហ្នឹងអាជ្ញាធរប៉ុណ្ណាណីគេឲ្យទៅឈូសឆាយដើម្បីការពារព្រំដែន មិនមែនឈូសឆាយបំផ្លាញឯណា ដើម្បីការពារអភិរក្សសត្វ» ។
លោក អ៊ី ឈាន អភិបាលក្រុងប៉ៃលិនបានប្រតិកម្មខឹងទៅនឹងក្រុមមន្ត្រីរដ្ឋបាលព្រៃឈើ ដែលបានចាប់អេស្ការវេទ័ររបស់សហគមន៍ លោក កែវ សុមេទ្ធ ដោយស្តីបន្ទោសថា ខណ្ឌរដ្ឋបាលព្រៃឈើបានចុះចាប់គ្រឿងចក្រនោះមិនបានជូនដំណឹងទៅឲ្យអាជ្ញាធរមូលដ្ឋាន ។
លោក អ៊ី ឈាន បានបញ្ជាក់ថា ៖ «ព្រោះអាហ្នឹងវាអត់មានសហការជាមួយអាជ្ញាធរអីបន្តិច យ៉ាងម៉េចក៏សួរគេសិន អត់មានអីសហការទេ ពីព្រោះគេនៅកន្លែងនេះ យ៉ាងម៉េចក៏ដោយអភិបាលក្រុង មានអភិបាលខណ្ឌ មានចៅសង្កាត់ មានមេភូមិ ដឹកនាំតាំងពីលើដល់ក្រោម ។ ហើយវាអត់មានសហការជាមួយគេមិនជាធ្វើអី ហើយធ្វើអ៊ីចឹងម៉េចបាន ពីព្រោះខ្ញុំទៅហើយមានអ្នកណាទៀត» ។
ក្រុមមន្ត្រីរដ្ឋបាលព្រៃឈើបានអះអាងថា ពួកគេមិនចាំបាច់ជូនដំណឹងទៅអាជ្ញាធរដូចការទាមទាររបស់លោក អ៊ីឈាន នោះទេ ពីព្រោះករណីឈូសឆាយដីរដ្ឋនេះគឺជាបទល្មើសជាក់ស្តែង ។
យោងតាមលិខិតរបស់សាលាក្រុងប៉ៃលិន ចុះថ្ងៃទី១ ខែមករា ឆ្នាំ២០០២ លោក អ៊ី ឈាន ខ្លួនឯង បានយល់ព្រមប្រគល់ដីទំហំ២០០ហិកតារ ស្ថិតនៅក្នុងភូមិទំនប់ សង្កាត់ស្ទឹងត្រង់ ខណ្ឌសាលាក្រៅ ក្រុងប៉ៃលិននេះ ឲ្យទៅមន្ទីរកសិកម្ម រុក្ខាប្រមាញ់ និងនេសាទ ដើម្បីអភិវឌ្ឍ ហើយតាមប្លង់ទីតាំងរបស់មន្ទីររៀបចំដែនដីនគរូបនីយកម្ម សំណង់ និងសុរិយោដី ក្រុងប៉ៃលិន ដែលចុះហត្ថលេខាដោយលោក ម៉ម ប៊ុនលី និងលោក ហុក សុផល ប្រធានការិយាល័យសុរិយោដីនិងភូមិសាស្រ្ត កាលពីថ្ងៃទី៣១ ខែមករា ឆ្នាំ២០០២ បានកំណត់ថាជាដីសម្រាប់ធ្វើការដាំដុះកូនឈើ និងប្រារព្ធពិធីបុណ្ណរក្ខទិវា ។
លោក ផាន់ ពេជ្រ ប្រធានមន្ទីរកសិកម្មក្រុងប៉ៃលិន បានថ្លែងថាបញ្ហាខាងលើនេះកើតឡើងដោយសារតែលោកអភិបាលក្រុង អ៊ី ឈាន ៖ «ខាង កែវ សាមេទ្ធ ក៏មានច្បាប់ គឺច្បាប់គាត់ចេញពីអាជ្ញាធរក្រុង អាហ្នឹងទី១ ។ ហើយទី២ ខាងរដ្ឋបាលព្រៃឈើក៏មានច្បាប់ចេញពីអាជ្ញាធរក្រុងដូចគ្នា ។ អ៊ីចឹងគឺនិយាយដោយស្មោះ គឺអ្នកទទួលខុសត្រូវចំពោះបញ្ហាហ្នឹង គឺអភិបាលក្រុងទទួលជំនួសចំពោះមុខអ្នកទាំងពីរទើបប្រសើរ ព្រោះគាត់ស៊ីញ៉េទាំងពីរ ។ អ្វីដែលជាគម្រោងវាមានពីរ មួយគម្រោងរបស់រដ្ឋ ហើយមួយរបស់អង្គការ ។ អ៊ីចឹងគឺខ្ញុំយល់ថា រដ្ឋគេមានទំហំធំជាងព្រោះអង្គការសិ្ថតនៅក្រោមអាណាព្យាបាលរបស់រដ្ឋ ហើយបើថាអង្គការគាត់ថា គាត់មានអំណាចជាង អាហ្នឹងតាមដំណើររបស់គាត់ទៅ ហើយចាំមើលទៅតុលាការគាត់ធ្វើមុខម៉េចអាហ្នឹងដឹងហើយ» ។
លោក អ៊ី ឈាន បានអះអាងបញ្ជាក់ថាទោះក្រុមមន្ត្រីរដ្ឋបាលព្រៃឈើរៀបចំរបាយការណ៍ប្តឹងទៅតុលាការក៏ប្តឹងទៅ តុលាការក៏ដោយក៏លោកមិនមានការព្រួយបារម្ភអ្វីនោះទេ ៖ «អត់អីទេ រាយការណ៍រាយទៅអត់អីទេ» ។
ចំណែកឯលោក ពារ គឹមហេង នាយរងរដ្ឋបាលព្រៃឈើក្រុងប៉ៃលិន បានថ្លែងអះអាងបញ្ជាក់ថា លោកបានដាក់របាយការណ៍ជូនទៅតុលាការហើយ កាលពីថ្ងៃទី២២ សីហា ជុំវិញករណីចាប់ឃាត់អេស្កាវេទ័រមួយគ្រឿងដែលបានឈូសរំលោភចូលក្នុងដីរបស់រដ្ឋ កាលពីថ្ងៃទី២០ ខែសីហា ឆ្នាំ២០០៨ ៕