ច្រកផ្លូវសំខាន់ៗសម្រាប់ធ្វើដំណើរចេញចូលទៅកាន់ចម្ការសណ្ដែកសៀង ដែលអ្នកភូមិចំនួនពីរភូមិកំពុងប្រមូលផលឆ្នាំនេះត្រូវបានហាមឃាត់ ៖ «កាំភ្លើងមានគ្រប់ដៃ ទាហានគេដាក់ពីរកន្លែង គេអត់ឲ្យចូល ខ្លះមានដំណាំមានអីចូលទៅយកលួចលាក់ ភ័យភ្នែកសភ្នែកខ្មៅ»។
កាលពីចុងសប្ដាហ៍មុននេះ អ្នកភូមិរាយការណ៍ថា មេការក្រុមហ៊ុនឌីអឹមគ្រូបដែលបានឈូសឆាយរំលោភយកដីប្រជាសហគមន៍ជាង២០០ហិកតារដើម្បីដាំកៅស៊ូនៅតំបន់នោះបានប្រើកម្មករអមដោយកងប្រដាប់អាវុធដុតបំផ្លាញខ្ទមអ្នកភូមិប្រមាណ៧រោង ហើយគំរាមបណ្ដេញអ្នកភូមិឲ្យចាកចេញពីដីចម្ការនោះ។ តាមឯកសារដែលវិទ្យុអាស៊ីសេរីទទួលបានពីសមាគមអាដហុកបញ្ជាក់ថា ក្រុមហ៊ុនឌីអឹមគ្រូប មានអាសយដ្ឋានផ្ទះលេខ២៣ ផ្លូវ២៦៤ សង្កាត់ចតុមុខ ខណ្ឌដូនពេញ រាជធានីភ្នំពេញ។
នាយិកាក្រុមហ៊ុនឈ្មោះ គឹម ចំរើន បានធ្វើសិទ្ធិមើលការខុសត្រូវលើដី២៦០ហិកតារនៅស្រុកលំផាត់ ទៅឲ្យលោក គង់ ងីម នៅខែឧសភា ឆ្នាំ២០០៨ ក៏ប៉ុន្តែកាលពីខែតុលាកន្លងទៅនេះ លោក គង់ ងីម អះអាងថា បានលាឈប់ពីការងារក្រុមហ៊ុនហើយ បន្ទាប់ពីផ្ទុះរឿងអាស្រូវរកឃើញទីតាំងកាប់ឈើខុសច្បាប់នៅក្នុងការដ្ឋានក្រុមហ៊ុននិងទីតាំងកាប់រានព្រៃឈើនៅពីក្រោយទីតាំងក្រុមហ៊ុន។ ហើយបច្ចុប្បន្នអ្នកភូមិអះអាងថា ឈ្មោះ មាស ម៉ុន គឺជាមេការថ្មី ប៉ុន្តែពុំមាននរណាស្គាល់លោកប្រាកដឬមានលេខទូរស័ព្ទអាចទាក់ទងបានឡើយ។
យ៉ាងនេះក្ដីស្នងការនគរបាលខេត្ត លោក រ៉ែ រ៉ៃ មានប្រសាសន៍ថា ៖ «ថ្ងៃមុនខ្ញុំឲ្យប៉ុស្តិ៍ហើយ ប៉ុន្តែគេអត់ឲ្យចូលដែរ»។
ចំណែកមេបញ្ជាការយោធាខេត្ត លោក ម៉ុង ថែន មានប្រសាសន៍ដែរថា ៖ «ផលវិបាកហ្នឹងមិនមែនគេប្រើប្រាស់អ៊ីចឹងទេ ការពិតយើងការពារប្រជារាស្រ្ដ ទាំងក្រុមហ៊ុនទាំងអីទេ មិនមែនយើងទៅធ្វើព្រមានប្រជារាស្ត្រម៉េច»។
អនុប្រធានផ្នែកស៊ើបអង្កេតសមាគមអាដហុក លោក ចាន់ សូវ៉េត ដែលបានទៅដល់ទីកើតហេតុមានប្រសាសន៍ថា ៖ «កម្លាំងប្រដាប់អាវុធឯកសណ្ឋានជាយោធាហ្នឹងប្រមាណជាជាង១០នាក់ដែរ បើតាមពិនិត្យមើលទៅ ហើយគេក៏បានឃាត់មិនឲ្យយើងចូល»។
ចំណែកមេធាវីការពារក្ដីជូនអ្នកភូមិ លោក ឡុង លន់ បញ្ជាក់បន្ថែម ៖ «ក្រុមហ៊ុនតាមគោលការណ៍ច្បាប់ គឺថាមិនអាចប្រើប្រាស់ទាហានជារបស់រដ្ឋយកទៅបំផ្លិចបំផ្លាញដល់ទ្រព្យសម្បត្តិប្រជាពលរដ្ឋទេ»។
កាលពីថ្ងៃទី២៦ វិច្ឆិកា ឆ្នាំ២០០៨ តុលាការខេត្តរតនគិរី បានកោះហៅតំណាងសហគមន៍ចំនួន២នាក់ដែលជាសកម្មជនសមាគមអាដហុកផងនោះ ហើយធ្វើការចាប់ខ្លួនពួកគេដោយចោទប្រកាន់ថាជាអ្នកបំផ្លាញដើមកៅស៊ូក្រុមហ៊ុន ក៏ប៉ុន្តែអ្នកភូមិប្រមាណជា៣០នាក់បានបះបោរសម្រុកចូលទៅរំដោះតំណាងម្នាក់បានវិញ ហើយកំពុងគេចខ្លួនជាមួយអ្នកភូមិ៦នាក់ទៀតដោយភ័យខ្លាចតុលាការចាប់ខ្លួន។
កាលពីថ្ងៃច័ន្ទសមាគមអាដហុកបានចេញសេចក្ដីប្រកាសព័ត៌មានថ្កោលទោសសកម្មភាពរំលោភបំពាននិងប្រើប្រាស់កងយោធាមកលើប្រជាសហគមន៍ជនជាតិ ហើយអំពាវនាវឲ្យគ្រប់មជ្ឈដ្ឋានចូលរួមតវ៉ាឲ្យមានការដោះលែងសកម្មជនការពារដីធ្លីនិងធនធានធម្មជាតិនោះមកវិញ៕