ក្រុមប្រជាពលរដ្ឋជាច្រើនបានមានប្រសាសន៍កាលពីព្រឹកថ្ងៃសុក្រ ទី២៧ ខែមិថុនា នៅឯសាលាស្រុកប្រាសាទបាគង ចំពោះមុខមន្ត្រីពេលជួបប្រជុំដោយអះអាងថា ពួកគាត់ជាអតីតកម្លាំងផ្តាច់ខ្លួនចេញពីពួកខ្មែរក្រហមចុងក្រោយដែលបានធ្វើស្រែចម្ការលើផ្ទៃដីទីនោះតាំងពីយូរមកហើយ ក៏ប៉ុន្តែថ្មីៗនេះមានការបញ្ជូនកងទាហាននិងគ្រឿងចក្រមកបម្រុងឈូសឆាយយកដីរបស់គាត់ដែលអាចប្រឈមមុខនឹងការគ្មានដីធ្វើស្រែចម្ការទៀតទេ ៖ «សូមលោកអភិបាលខេត្តស្រាវជ្រាវឲ្យបានច្បាស់ ប្រជាពលរដ្ឋយើងនៅទីនេះគាត់គ្មានដីធ្វើស្រែធ្វើចម្ការទេ» ។
ស្ត្រីម្នាក់ទៀតបានចោទប្រកាន់ថា ការបញ្ជូនកងទាហាននិងគ្រឿងចក្របម្រុងឈូសឆាយលើដីប្រជាពលរដ្ឋនោះគឺជាការបំពានខុសច្បាប់ ហើយគាត់ស្នើសុំឲ្យអាជ្ញាធរខេត្តពិនិត្យឲ្យបានច្បាស់លាស់ចំពោះផលប៉ះពាល់កម្មសិទ្ធិប្រជាពលរដ្ឋនេះ ។
ស្ត្រីដដែលបានឲ្យដឹងថា ៖ «យើងមុននឹងសង់ផ្ទះ ក៏យើងត្រូវសុំច្បាប់សាងសង់ឬក៏ធ្វើអីដែរ ចុះហេតុអីមកឈូសហ៊ុមព័ទ្ធដីហើយអត់មានច្បាប់ទេ» ។
ប៉ុន្តែអាជ្ញាធរខេត្តសៀមរាបបានឆ្លើយតបថាផ្ទៃដីដែលអ្នកភូមិកំពុងតវ៉ានោះគឺមានចំនួនជាង២៤០០ហិកតាដែលជាទ្រនាប់ព្រៃឈើសម្រាប់សួនឧទ្យានជាតិភ្នំគូលែនដែលរដ្ឋបានដកហូតតាមដីកាលេខ០៨៥ជាងពីរឆ្នាំមកហើយ ។
អភិបាលខេត្តសៀមរាប លោក ស៊ូ ភិរិន្ទ បានមានប្រសាសន៍ថាការបញ្ជូនកងទាហានវិស្វកម្មនិងគ្រឿងចក្របម្រុងឈូសឆាយផ្ទៃដីចំនួនជាង៥០០ហិកតាក្នុងចំណោមដីដកហូតជាង២៤០០ហិកតានោះ ដើម្បីមជ្ឈមណ្ឌលអភិវឌ្ឍន៍ជាតិជនពិការដែលជាគម្រោងរបស់លោកនាយករដ្ឋមន្ត្រី ហ៊ុន សែន ពុំមែនជារបស់ក្រុមហ៊ុនទេ ។
ទោះយ៉ាងណា លោក ស៊ូ ភិរិន្ទ បានមានប្រសាសន៍ថាអាជ្ញាធរខេត្តសុខចិត្តផ្អាកគ្រឿងចក្រនិងកងទាហានមិនឲ្យធ្វើសកម្មភាពជាបណ្តោះអាសន្ន ហើយខេត្តនឹងបង្កើតគណៈកម្មការចម្រុះជាបន្ទាន់មួយដែលត្រូវការអង្គការក្រៅរដ្ឋាភិបាលចូលរួមផងដែរដើម្បីចុះពិនិត្យមើលឆាប់ៗ ។
លោក ស៊ូ ភិរិន្ទ បានមានប្រសាសន៍ថា ៖ «ខ្ញុំសប្បាយចិត្តណាស់នៅក្នុងដីកា០៧៥នេះ ខ្ញុំនឹងធ្វើសេចក្ដីរាយការណ៍ជូនទៅថ្នាក់លើដើម្បីមានប៉ុន្មានត្រូវប្រគល់ឲ្យអ៊ុំមានវិញ» ។
អ្នកស៊ើបអង្កេតរបស់សមាគមការពារសិទ្ធិមនុស្ស អាដហុក ខេត្តសៀមរាប លោក សួស ណារិន បានទទួលស្គាល់ថា ការចេញដីកាដកហូតដីតំបន់នោះទុកជាទ្រនាប់ឧទ្យានជាតិគឺជាការត្រឹមត្រូវ ប៉ុន្តែលោកបានរកឃើញថាដីមួយផ្នែកក្នុងនោះគឺជារបស់ប្រជាពលរដ្ឋកាន់កាប់មុនដីកាដកហូតទៅទៀត ដូច្នេះគួរតែអាជ្ញាធរកាត់ដីដែលជារបស់ប្រជាពលរដ្ឋចេញមុនពេលដកហូតទៅជារបស់រដ្ឋ ៖ «ប្រជាជនបានរស់នៅមុនដីកាដកហូតពិតប្រាកដមែន» ។
តាមមន្ត្រីខណ្ឌរដ្ឋបាលព្រៃឈើខេត្តសៀមរាប បានឲ្យដឹងថានៅក្នុងចំណោមដីដែលមានដីកាដកហូតជាង២៤០០ហិកតាតាមដីកាដកហូតរបស់សាលាខេត្តសៀមរាប ចុះថ្ងៃទី២៩ ខែឧសភា ឆ្នាំ២០០៦ គឺមានប៉ះពាល់លើដីស្រែចម្ការប្រមាណជិត១០០ហិកតាដែលជារបស់ប្រជាពលរដ្ឋជាង៨០គ្រួសារដែរ ៕