លោក សឿន វ៉ា ជាមន្រ្តីយោធាជាន់ខ្ពស់នៃអគ្គបញ្ជាការដ្ឋាននៃកងយោធពលខេមរភូមិន្ទទទួលបន្ទុកអភិវឌ្ឍន៍នៅតំបន់ក្បាលឆាយជាតំបន់មានវិវាទដីធ្លីនោះ បានមានប្រសាសន៍ប្រាប់វិទ្យុអាស៊ីសេរីថា លោកបានសម្រេចផ្អាកការឈូសឆាយនោះមួយរយៈពេលមួយសប្តាហ៍សិនដោយសារមានការតវ៉ាជាច្រើនពីសំណាក់ប្រជាពលរដ្ឋរងគ្រោះ។
លោកបានអះអាងថា ផ្អែកតាមគម្រោងរបស់លោកគ្រោងនឹងរុះរើផ្ទះសម្បែងប្រជាពលរដ្ឋចំនួន៧ខ្នងតែប៉ុណ្ណោះដែលលោកចោទប្រកាន់ថា ប្រជាពលរដ្ឋទំាងនោះបានមកតាំងទីលំនៅនៅលើដីធ្លីហាមឃាត់ដោយអនុក្រឹត្យ។
លោក សឿន វ៉ា បានមានប្រសាសន៍ថា ៖ «ប្រជាជនទៅតវ៉ា ទៅហាមឃាត់មិនឲ្យឈូស អ៊ីចឹងទៅយើងក៏ផ្អាកការឈូសឆាយដើម្បីកុំឲ្យប៉ះពាល់លើប្រជាជន ផ្អាក៤-៥ថ្ងៃ ហើយក្នុងដីតំបន់អនុក្រឹត្យ ដីហ្នឹងចំនួនប្រហែលជា២ហិកតារ។ គ្រួសារដែលទៅប៉ះពាល់ មានគ្រាន់តែថា បោះជារបងជាអីអ៊ីចឹង ហើយដល់ពេល៧គ្រួសារហ្នឹងបានទៅសាងសង់ បានចំនួន២ថ្ងៃ ហើយខ្ញុំហាមឃាត់និងរុះរើចេញ»។
លោកបានឲ្យដឹងថា លោកគ្មានគម្រោងការផ្តល់សំណងជំងឺចិត្តដល់គ្រួសារទាំងនោះទេ ហើយនឹងគ្មានគម្រោងការប៉ះពាល់ផ្ទះសម្បែងរបស់ប្រជាពលរដ្ឋដទៃទៀតទេដែលរស់នៅក្រៅតំបន់ហាមឃាត់នោះ។
តំណាងប្រជាពលរដ្ឋរងគ្រោះម្នាក់រស់នៅក្នុងភូមិ២ ក្រុម៩ សង្កាត់៤ ខណ្ឌមិត្តភាព ក្រុងព្រះសីហនុ បានមានប្រសាសន៍ថា ៖ «គេរំលោភបំពានហ្នឹងរាងស្ងប់ហើយ ប្រជាជនរៀបចំធ្វើឡើងវិញ ឥឡូវរាងស្ងប់។ ឥឡូវមានការធូរអារម្មណ៍បន្តិច»។
លោក មិន ថាវរិន្ទ តំណាងប្រជាពលរដ្ឋម្នាក់ទៀតបានមានប្រសាសន៍ថា ៖ «ប្រជាពលរដ្ឋដូចថាបានឈរមុខអាត្រាក់ទៅ កម្លាំងរបស់វាបានដកថយ វាអត់ហ៊ានឈូសបុកប្រជាពលរដ្ឋយើងទេ។ គម្រោងដែលគេឈូសគឺថា គេឈូសពីចុងភូមិរហូតដល់ដើមភូមិ ក្នុងភូមិហ្នឹង គេហៅភូមិអារ៉េវហ្នឹង វាជាង៣០០គ្រួសារ»។
លោក អ៊ំ សំអាត ប្រធានផែ្នកស៊ើបអង្កេតរបស់អង្គការសិទ្ធិមនុស្សលីកាដូដែលកំពុងតាមដានករណីនេះបានមានប្រសាសន៍ថា ៖ «ទី១ ឃើញថាប្រជាពលរដ្ឋ គឺលោកមិនបានដឹងថា តំបន់ហ្នឹងជាតំបន់គ្រោងអភិវឌ្ឍន៍របស់យោធាទេ ហើយលោកធ្វើនេះ បើតាមទទួលព័ត៌មាន គឺពីការទិញពីយោធា។ អ៊ីចឹងខ្ញុំគិតថា នៅពេលដែលបញ្ហាកើតឡើងភ្លាមដែលមានបាតុភាពប្រជាពលរដ្ឋ គាត់ទិញ ហើយសង់អ៊ីចឹងយោធាគួរតែជូនដំណឹង ឬក៏ហាមពួកគាត់ថា តំបន់ហ្នឹងជាតំបន់អត់ការពារ មិនអនុញ្ញាតឲ្យសង់ជម្រកទេ»។
លោកបានធ្វើការរិះគន់ថា ក្រុមយោធាជាអ្នកលក់ដីធ្លីនោះប្រជាពលរដ្ឋជាអ្នកទិញនៅពេលក្រុមយោធាត្រូវការដីនោះវិញ ប្រជាពលរដ្ឋជាអ្នករងគ្រោះខាត់បង់ថវិកានឹងបាត់បង់ដីធ្លីនោះ៕