លោក ស៊ុត បញ្ញា មេភូមិតាមាំង បានថ្លែងនៅព្រឹកថ្ងៃច័ន្ទ ទី១៩ ខែតុលា ថា ទាហានការពារព្រំដែនខ្មែរឈរជើងនៅច្រកតាមាំង ក្នុងស្រុកថ្មពួក ខេត្តបន្ទាយមានជ័យ កាលពីថ្ងៃ១៤ និងថ្ងៃ១៥ ខែតុលា មានគ្នា៣ទៅ៤នាក់ បានចុះហាមក្រុមអ្នកភូមិមិនឲ្យបង្កបង្កើនផលលើដីស្រែពួកគេដែលធ្លាប់ធ្វើជាច្រើនឆ្នាំមកហើយ។
លោក ស៊ុត បញ្ញា បានឲ្យដឹងដូច្នេះ ៖ «ទាហានដែលទៅឃាត់ហ្នឹង ទៅម្ដងពីរបីនាក់ ហើយទៅសម្លុត មិនបាននិយាយហេតុផលអីច្បាស់ទេ ទៅដេញចេញតែម្ដង»។
លោកបន្តថា ប្រជាពលរដ្ឋ២៧គ្រួសារក្នុងចំណោមប្រជាពលរដ្ឋ១១៥គ្រួសារ ក្នុងភូមិតាមាំង អាចជួបបញ្ហាខ្វះជីវភាព ប្រសិនបើពួកគេបន្តការខកខានមិនបានបង្កបង្កើនផល។
លោក ស៊ឹម ប៊ុនធឿន ប្រធានសហគមន៍ភូមិតាមាំង បានថ្លែងថា ផ្ទៃដីអ្នកភូមិដែលត្រូវបានក្រុមទាហានចុះហាមឃាត់មានទំហំប្រហែល១០០ហិកតារ ស្ថិតនៅចំណុចចង្អើរប្រើស និងចំណុចខាងជើងស្រះបន្លែក្នុងភូមិតាមាំង។
លោក ស៊ឹម ប៊ុនធឿន បានថ្លែងដូច្នេះថា ៖ «ក្នុងដីចាស់ដែលគាត់គាស់កាយបានហ្នឹង គាត់អាចធ្វើបាន តែដីដែលគេមានរបប មានឈ្មោះ គេគ្រោងទុកហ្នឹង គេហាមឃាត់មិនឲ្យធ្វើ»។
ចំណែកឯអ្នកភូមិម្នាក់ទៀតឈ្មោះ ម៉ៅ ឈុននី បានថ្លែងថា ៖ «និយាយឲ្យចំទៅសុទ្ធតែយកអាយុជីវិតទៅប្ដូរ ដីខ្លះនៅក្នុងចម្ការមីន មានគ្រោះថ្នាក់រហូតដល់សព្វថ្ងៃមានពិការ»។
វិទ្យុអាស៊ីសេរីមិនទាន់អាចទាក់ទងសុំការបញ្ជាក់ពីក្រុមមន្ត្រីយោធា ដែលឈរការពារព្រំដែននៅច្រកតាមាំង ក្នុងស្រុកថ្មពួក ខេត្តបន្ទាយមានជ័យបានទេ។ ប៉ុន្តែលោក យង់ យឿន ប្រធានក្រុមប្រឹក្សាស្រុកថ្មពួក បានមានប្រសាសន៍ថា ការហាមឃាត់មិនឲ្យអ្នកភូមិបង្កបង្កើនផល គឺមានពីរចំណុច ទី១ គឺដីនៅតំបន់ស ទី២ គឺជាដីព្រះរាជក្រឹត្យប្រាសាទបន្ទាយឆ្មារ។
លោក យង់ យឿន មានប្រសាសន៍ដូច្នេះ ៖ «មិនអនុញ្ញាតឲ្យមានការរុករានកាប់ទន្រ្ទានព្រៃសាជាថ្មីម្ដងទៀតទេ»។
ទាក់ទងបញ្ហានេះ លោក ទួន ឌុល មេឃុំគោករមៀត បានថ្លែងថា ៖ «បន្តទាក់ទងទៅស្រុកដើម្បីឲ្យស្រុកគាត់ធ្វើការដោះស្រាយ»។
រីឯលោក ជី សំនៀង អភិបាលរងស្រុកថ្មពួក បានថ្លែងថា មិនទាន់ដឹងបញ្ហាខាងលើនេះទេ។ លោកបន្តថា នឹងចុះស្រាវជ្រាវ ៖ «ខ្ញុំនឹងចុះពិនិត្យមើល»។
អាជ្ញាធរមូលដ្ឋាននិងតំណាងសហគមន៍តាមាំង បានឲ្យដឹងថា ដីរបស់អ្នកភូមិនៅតំបន់ ក្នុង១គ្រួសារៗ ទំហំ៥ហិកតារ សរុបទាំងអស់១១៥គ្រួសារ ត្រូវបានលោក សូ ចាន់ហេង ដែលជាមេបញ្ជាការកងពលយោធា បែងចែកឲ្យក្រុមអ្នកភូមិបង្កបង្កើនផល តាំងពីឆ្នាំ១៩៩៩មកម្ល៉េះ ស្រាប់តែក្រុមទាហានការពារព្រំដែនខ្មែរ ដែលផ្លាស់ទៅកាលពីដើមខែតុលានេះ ហាមឃាត់មិនឲ្យបង្កបង្កើនផលទៅវិញ៕