សេចក្តីអះអាងនេះធ្វើឡើងនៅថ្ងៃសៅរ៍ ទី២៨ ខែវិច្ឆិកា ឆ្នាំ២០០៩ បន្ទាប់ពីអ្នកភូមិបានឃើញឈ្មោះ អ៊ុំ ឡាំ មានទីលំនៅនៅភូមិបានប៉ុង ស្រុកវ៉ឺនសៃ ដឹកនាំកម្មករចូលទៅកាប់ឆ្ការព្រៃជាថ្មីនៅលើដីនោះ ដើម្បីដាំកៅស៊ូកាលពីដើមសប្តាហ៍នេះ ៖ «ដីហ្នឹងរដ្ឋដកហូតចេញទៅហើយ ឥឡូវហ្នឹងកម្មករចុះមកធ្វើទៀត នរណាឲ្យធ្វើហ្នុង?»។
លោក អ៊ុំ ឡាំ បដិសេធមិនធ្វើអត្ថាធិប្បាយទេ ដោយគ្រាន់តែបញ្ជាក់ថា លោកជាអ្នកម៉ៅការដឹកនាំកម្មករដាំកៅស៊ូឲ្យម្ចាស់ដីមានឈ្មោះ ចេន យ៉ុនអន និង ឆាយ ផុន។
អាជ្ញាធរមូលដ្នានឃុំកិចុង ឲ្យដឹងថា ដីជាង៣០០ហិកតារ ដែលអាជ្ញាធរខេត្តដកហូតស្ថិតនៅតំបន់អូរស្វង។ ដីមួយចំណែកជាអតីតដីព្រៃចម្ការវិលជុំសមូហភាពសហគមន៍ និងមួយចំណែកទៀតជាដីព្រៃឈើសហគមន៍ដែលត្រូវបានគេលក់ដូរនិងកាប់រានដោយខុសច្បាប់។
មេឃុំកិចុង លោក រចំ ឡៃ មានប្រសាសន៍ថា អ្នកភូមិបានផ្តល់របាយការណ៍ពីការចូលទៅកាន់កាប់ដីជាថ្មីនោះមែន តែលោកមិនបានទទួលសំណើ ឬឯកសារណាមួយពីអ្នកចូលទៅកាន់កាប់ដីជាថ្មីនោះទេ។
លោក រចំ ឡៃ បានឲ្យដឹងដូច្នេះ ៖ «មិនមែនសុំខ្ញុំទេ បើសុំខ្ញុំ ខ្ញុំមិនហ៊ានអនុញ្ញាឲ្យទេ ដីហ្នឹងរដ្ឋដកយកទៅហើយ»។
កាលពីដើមឆ្នាំ២០០៩ អ្នកភូមិផ្អរនិងអ្នកភូមិបរឡយ ភូមិជាប់គ្នា បាននាំគ្នាចូលវាស់ដីដែលដកហូតនោះម្តងរួចទៅហើយដើម្បីចែកគ្នា ដោយសំអាងថា ដីនោះជារបស់សហគមន៍ និងជាដីព្រៃឈើសហគមន៍អភិរក្ស ក៏ប៉ុន្តែមន្ត្រីជំនាញព្រៃឈើបានធ្វើការហាមឃាត់។
មន្ត្រីស៊ើបអង្កេតសមាគមអាដហុក លោក ប៉ែន ប៊ុណ្ណារ៍ មានប្រសាសន៍ថា អាជ្ញាធរខេត្តបានដកហូតដីដោយសំអាងថា ជាដីបានពីការកាប់រានព្រៃឈើខុសច្បាប់ ក៏ប៉ុន្តែអាជ្ញាធរខេត្តមិនបានរកអ្នកប្រព្រឹត្តខុសឲ្យទទួលខុសត្រូវឡើយ។
លោក ប៉ែន ប៊ុណ្ណារ៍ មានប្រសាសន៍ដូច្នេះ ៖ «អាជ្ញាធរសមត្ថកិច្ចបែរជាដោះស្រាយទៅជាដកហូតដោយមិនផ្ដន្ទាទោសអ្នកប្រព្រឹត្តបទល្មើសហ្នឹង អ៊ីចឹងហើយបានជាវាជាគំរូអាក្រក់»។
នាយខណ្ឌរដ្ឋបាលព្រៃឈើខេត្តរតនគិរី លោក យូកាន វិមាន មានប្រសាសន៍ថា នៅរដូវប្រាំងខាងមុខនេះ ក្រុមមន្ត្រីព្រៃឈើនឹងចុះបោះបង្គោលសម្គាល់ដីនោះ។ លោកថា ការចូលកាន់កាប់ដីដកហូតគឺជាប្រការខុសច្បាប់។
លោក យូកាន វិមាន មានប្រសាសន៍ថា ៖ «អ្នកណាធ្វើអ្នកហ្នុងប្រឈមហើយ តែដីដកហូត ហូតជាសម្បត្តិរដ្ឋហើយមិនអាចប្រគល់ឲ្យអ្នកណាវិញទេ។ សព្វថ្ងៃមេព្រៃយើង ដោយសារទើបតែស្ងួតរដូវប្រាំង គេចាប់ផ្ដើមយកស្លាកទាំងអស់ហើយ»។
មន្ត្រីសមាគមអាដហុក ដែលបានធ្វើការអង្កេតករណីជម្លោះដីធ្លីនៅតំបន់នោះឲ្យដឹងថា ដីជាង៣០០ហិកតារដែលខេត្តដកហូតមានជាប់ពាក់ព័ន្ធនិងអ្នកជំនួញដីម្នាក់ឈ្មោះ សេង ពិសិដ្ឋ បានកាន់កាប់ដីនោះដំបូងដោយសំអាងថា បានទិញពីសហគមន៍ហើយ បន្ទាប់មកបានលក់បន្តទៅឲ្យឈ្មោះ ចេន ឈុនអាន និងឈ្មោះ ឆាយ ផុន រស់នៅទីរួមខេត្តស្ទឹងត្រែង ក៏ប៉ុន្តែក្រោយពីខេត្តដកហូតក្រុមអាជ្ញាធរខេត្តមិនបានបង្ហាញថា តើអ្នកណាជាប់ពាក់ព័ន្ធក្នុងការកាប់រានព្រៃឈើយកដីទាំងនោះទេ៕