អ្នកភូមិនៅបន្ទាយរងៀងប្រមាណ ៥០នាក់កាលពីថ្ងៃ៧ មីនា បាននាំគ្នាទៅសុំក្រុមប្រដាប់អាវុធនៃក្រុមហ៊ុន តាន់បៀន ដើម្បីសុំដីចាស់នៅបន្ទាយរងៀងធ្វើចម្ការជាបណ្តោះអាសន្ន ទម្រាំអាជ្ញាធរខែត្រផ្តល់ដីចម្ការជូនពួកគាត់ ប៉ុន្តែពេលទៅជិតដល់ស្នាក់ការ កងសន្តិសុខរបស់ក្រុមហ៊ុនតាន់បៀនបានមករាំង ហើយក៏បាញ់រះមកលើប្រជាពលរដ្ឋទាំងនោះ។
បុរសម្នាក់ដែលជាជនរងគ្រោះសម្រាកព្យាបាលរបួសនៅខែត្រកំពង់ចាមបានឲ្យដឹងថា មកដល់ពេលនេះក្រុមសន្តិសុខរបស់ក្រុមហ៊ុនបានរកចាប់កូនគាត់និងអ្នកភូមិផ្សេងទៀត ៖ «ជួយរកយុត្តិធម៌! អត់ដោះស្រាយទេ រួចដីធ្លីក៏អត់ អីក៏អត់។ រួចថាឲ្យប្រជាពលរដ្ឋ ដល់ចុងក្រោយបាញ់ប្រជាពលរដ្ឋត្រូវរបួសគ្រប់គ្នាអ៊ីចឹងហើយ ដល់ពេលនេះតាមចាប់អាពីរនាក់នោះធ្វើអីទៀត!»។
អ្នកភូមិមួយរូបទៀតបានបញ្ជាក់ថា ពួកគាត់មិនហ៊ានចូលទៅនៅលំនៅឋានថ្មីដែលគេទើបនឹងចែកឲ្យ នៅក្នុងភូមិថ្មសំលៀងទេ ហើយចូលលាក់ខ្លួនក្នុងព្រៃដោយខ្លាចសមត្ថកិច្ចចាប់ខ្លួន ៖ «ផ្ទះដែលប្រជាពលរដ្ឋស្នាក់នៅហ្នឹង ទៅព្រមានម្ចាស់ផ្ទះម្ចាស់អីឯណាឯណីថា លាក់ជនអនាធិបតេយ្យឯណាឯណីទៀតហើយ! ចេះតែព្រមានអ៊ីចឹងទៅ។ ដល់អ៊ីចឹងប្រជាពលរដ្ឋមានការភ័យខ្លាច ទៅនៅក្នុងព្រៃឯណោះ!»។
ស្នងការខែត្រកំពង់ធំ លោក ផាន់ សុផេង បានបដិសេធថា សមត្ថកិច្ចរបស់លោកពុំបានទៅតាមចាប់ខ្លួនអ្នកទាំងនោះទេ។ សមត្ថកិច្ចរបស់លោកបានចូលទៅតំបន់ថ្មីថ្មសំលៀងនោះ គឺដើម្បីជួយសម្រួលដល់ប្រជាពលរដ្ឋនិងក្រុមហ៊ុនក្នុងការចែកដីភូមិជូនប្រជាពលរដ្ឋប៉ុណ្ណោះ។
យ៉ាងនេះក្តីលោកស្នងការ ផាន់ សូផេង បានសំណូមពរដល់អាជ្ញាធរស្រុកនិងខែត្រធ្វើយ៉ាងណាចែកដីចម្ការឲ្យប្រជាពលរដ្ឋឲ្យបានឆាប់ៗដើម្បីបញ្ចប់ជម្លោះ ហើយបញ្ហាផ្ទុះអាវុធក៏ដោយសារតែបញ្ហាជម្លោះដីធ្លីនេះដែរ។
លោក ផាន់ សូផេង បានបញ្ជាក់ថា ៖ «ចង់សំណូមពរទៅអាជ្ញាធរស្រុក ឃុំ ខែត្រ ឲ្យចែកដីជូនគាត់ឲ្យបានលឿន ដីលំនៅឋាន ទី២ ដីបង្កបង្កើនផល។ គាត់ជិតដល់រដូវហើយ ដល់យឺតអ៊ីចឹង គាត់ចេះតែដាក់បញ្ហា។ តែគាត់មិនបានយល់ គាត់ឃើញកម្លាំងប៉ូលិសយើងនៅហ្នឹង។ ប៉ូលិសយើងធម្មតាគាត់ការពារផលប្រយោជន៍រដ្ឋ!»។
អភិបាលរងខែត្រកំពង់ធំ លោក អ៊ុត សំអន បានមានប្រសាសន៍ថា លោកនឹងចែកដីចម្ការជូនប្រជាពលរដ្ឋក្នុងមួយគ្រួសារ១ហិកតាក្នុងពេលឆាប់ៗនេះ។
លោក អ៊ុត សំអន បានថ្លែងថា ៖ «គឺខ្ញុំនឹងចុះទៅហើយមើលជាក់ស្ដែងបន្ថែម រួចហើយយើងនឹង អាចថា ដីត្រូវចាត់ចែងជាជំហានបឋមគ្រប់ឬមិនគ្រប់យ៉ាងណា យើងដឹងលទ្ធផល»។
ទោះជាយ៉ាងណា លោក អំ សំអាត មន្រ្តីស៊ើបអង្កេតជាន់ខ្ពស់នៃអង្គការសិទ្ធិមនុស្សលីកាដូ បានបញ្ជាក់ដូច្នេះ ៖ «ខ្ញុំគិតថា បើសិនជារឿងនេះកើតឡើង បានន័យថា ជាទិសដៅដើម្បីបង្វែរពីរឿងតាមរកជនដែលបានប្រព្រឹត្តបទល្មើស បង្ករបួសស្នាមទៅលើប្រជាពលរដ្ឋ ហើយយកលេសដើម្បីតាមចាប់ប្រជាពលរដ្ឋ»។
លោក អំ សំអាត បានបញ្ជាក់ថា សមត្ថកិច្ចបានបាញ់រះមកលើប្រជាពលរដ្ឋអស់រយៈពេលមួយសប្តាហ៍មកហើយ ប៉ុន្តែអាជ្ញាធរឬតុលាការនៅតែមិនទាន់ចាប់ជនដៃដល់យកមកផ្តន្ទាទោសតាមច្បាប់នៅឡើយ ហើយបែរជាមកតាមច្បាប់ប្រជាពលរដ្ឋទៅវិញ៕