ស្ត្រីឈ្មោះ គីវ ឃាង អាយុ៤៨ឆ្នាំ ប្រជាពលរដ្ឋនៅភូមិស្លែងខ្ពស់ ឃុំសានគរ រៀបរាប់ប្រាប់អ្នកយកព័ត៌មានវិទ្យុអាស៊ីសេរី នៅល្ងាចថ្ងៃ១១ វិច្ឆិកាថា លោក ប៊ុន សេង ដែលជាក្រឡាបញ្ជីនៃតុលាការខេត្ត បានហៅគាត់ទៅគំរាមឲ្យគាត់រុះរើផ្ទះចេញពីដីធ្លីដែលគាត់បានរស់នៅតាំងពីឆ្នាំ១៩៨២ មកនោះ។ លោក ប៊ុន សេង ថែមទាំងបានបំភ័យគាត់ដោយធ្វើការបិទទ្វារការិយាល័យដោយទុកឲ្យគាត់អង្គុយក្នុងនោះតែម្នាក់ឯងយ៉ាងយូរទៀតផង។ គាត់បន្តថា លោក ប៊ុន សេង ថែមទាំងគំរាមប្រើអំពើហិង្សាចំពោះអាជ្ញាធរឃុំ ប្រសិនបើអាជ្ញាធរហ៊ានរារាំងចំពោះការចុះរុះរើនេះផង។
ស្រ្ដីឈ្មោះ គីវ ឃាង បានរៀបរាប់ដូច្នេះ ៖ «សម្លុតខ្ញុំ ឥឡូវខ្ញុំចូលដល់ខាងក្នុងនេះ គាត់ចេញមកវិញបាត់ មួយសន្ទុះរករឿងខ្ញុំទៀតថា ឲ្យរើៗ បើមិនរើពួកប៉ូលិសទៅរើហើយ មេភូមិ មេឃុំ គ្មានដឹងជាងតុលាការទេ ប្រយ័ត្នតែទំនាស់តុលាការទៀត មេឃុំបែកពោះហើយ»។
ស្ត្រីឈ្មោះ គីវ ឃាង បានមានទំនាស់ដីធ្លីជាមួយអ្នកភូមិដែលមានដីជាប់ជាមួយដីគាត់ឈ្មោះ គន់ អ៊ូច។ ទំនាស់នេះត្រូវបានអាជ្ញាធរភូមិឃុំធ្វើការសម្រុះសម្រួលម្តងរួចហើយ តែឈ្មោះ គន់ អ៊ូច មិនយល់ព្រម រួចក៏ដាក់ពាក្យប្តឹងទៅតុលាការ ហើយក៏កើតមានជាការកោះហៅឈ្មោះ គីវ ឃាង ទៅគំរាមយ៉ាងដូច្នេះ។
មេភូមិស្លែងខ្ពស់លោក នៅ លី មានប្រសាសន៍ថា ប្រវត្តិនៃការកាន់កាប់ដីធ្លីបញ្ជាក់ថា ឈ្មោះ គីវ ឃាង គឺជាម្ចាស់ដីដែលមានទំហំ៣០ម៉ែត្របួនជ្រុងនេះ ប៉ុន្តែពុំទាន់ធ្វើប្លង់កម្មសិទ្ធិរឹងនៅឡើយទេ។
ជំទប់ទីមួយឃុំសានគរ គឺលោក ងិន ឃត ប្រតិកម្មចំពោះការគំរាមរបស់ក្រឡាបញ្ជីខេត្តយ៉ាងដូច្នេះថា ៖ «តុលាការមិនទាន់ចេញសាលក្រមសម្រេចថា ដីនេះទៅខាងណាទេ ស្រាប់តែមានថា ស្ថាប័នណាមករុះរើហ្នឹង មិនទាន់ចេញសាលក្រមផង ហើយបើឃុំហ៊ានទៅយ៉ាងម៉េចទាត់ធ្លាយពោះ ឥឡូវខ្ញុំរង់ចាំតែថ្ងៃធ្លាយពោះ! គាត់មករុះរើហ្នឹងតើច្បាប់ពីណាមក?»។
ពុំអាចសុំការពន្យល់ពីលោក ប៊ុន សេង ក្រឡាបញ្ជីខេត្តកំពង់ធំ បានទេ នៅល្ងាចថ្ងៃ១២ វិច្ឆិកានេះ ដោយទូរស័ព្ទពុំមានអ្នកទទួល។
ចៅក្រមនិងជាប្រធានតុលាការខេត្តលោក ឃន កុសល មានប្រសាសន៍ថា ៖ «ខ្ញុំអត់បានដឹងផងរឿងនេះ ទាល់តែលោកសួរលោកព្រះរាជអាជ្ញាជាមេកើយរបស់គាត់»។
មន្ត្រីផ្នែកអង្កេតរបស់អង្គការលីកាដូ ប្រចាំខេត្តកំពង់ធំ លោក គួយ កក្កដា បានចាត់ទុកសកម្មភាពរបស់ក្រឡាបញ្ជីរូបនេះថា ជាការរំលោភច្បាប់។
លោក គួយ កក្កដា មានប្រសាសន៍ដូច្នេះ ៖ «វាជាទំនាស់ដីធ្លីមួយដែលមិនទាន់មានប្លង់មានអីត្រឹមត្រូវទេ មានតែបង្កាន់ដៃកាន់កាប់បណ្ដោះអាសន្នប៉ុណ្ណោះ។ ដីហ្នឹងវាស្ថិតនៅក្នុងការដោះស្រាយរបស់អាជ្ញាធរមូលដ្ឋាន ឬក៏ដូចខាងសុរិយោដីស្រុកអីអ៊ីចឹង ប៉ុន្តែភាគីម្ខាងយកបណ្ដឹងមកដាក់តុលាការ ហើយខាងតុលាការហៅពលរដ្ឋមកគំរាមកំហែងអីអ៊ីចឹង គឺបើគិតទៅវាខុសនឹងច្បាប់ហើយ»។
មន្ត្រីផ្នែកអង្កេតលីកាដូរូបនេះបានមន្ទិលចំពោះសកម្មភាពបែបនេះថា ជាទង្វើក្នុងបំណងគាបសង្កត់ ដើម្បីលាភសក្ការៈនិងផលប្រយោជន៍បុគ្គល៕