តំណាងប្រជាពលរដ្ឋនៅភូមិថ្នល់បានចោទប្រកាន់ដោយត្រង់ៗថា ស្មៀនឃុំស្វាយជ្រះបាននាំកម្មករមួយក្រុមឲ្យទៅកាប់រានព្រៃដើម្បីយកដីអ្នកស្រុកដែលកំពុងដាំដុះនៅចំណុចត្រពាំងប៉ះលែងចម្ងាយប្រមាណមួយគីឡូម៉ែត្រពីខាងជើងផ្លូវជាតិលេខ៧។
អ្នកស្រី ឃុន សេង អាយុ៤៨ឆ្នាំ បានរៀបរាប់ពីការខ្លាចបាត់បង់ដីធ្លីដោយសារតែសកម្មភាពរបស់មន្រ្តីឃុំដែលបានធ្វើ។
អ្នកស្រី ឃុន សេង បានឲ្យដឹងថា ៖ «មានជនមួយក្ដាប់តូចជួលកាលីមកកាប់ឆ្ការលើដីនេះ ស្មៀនឃុំម្នាក់ដែលបានជូនអ្នកចម្ងាយចូលទៅ ថ្ងៃទី២ឃើញកម្មករចំនួនប្រហែលជា១០នាក់... គេទៅធ្វើជំរំ ថ្ងៃទី៣បានគេកាប់ឆ្ការ»។
ប្រជាពលរដ្ឋឲ្យដឹងថា កាលពីថ្ងៃទី២ មិថុនា ស្មៀនឃុំគឺលោក ឌុល សារា ត្រូវបានប្រជាពលរដ្ឋឃើញដឹកនាំកម្លាំងកម្មករប្រមាណ១០នាក់រួមទាំងសម្ភារៈរណារយន្ត កាំបិត ពូថៅ ទៅជាមួយផង នាំគ្នាទៅកាប់ព្រៃលើដីប្រជាពលរដ្ឋ ហើយបោះជំរំនៅទីនោះបន្ទាប់ពីប្រជាពលរដ្ឋទាំងនោះបានហាមឃាត់។
ប្រជាពលរដ្ឋបានអះអាងថា ពួកគាត់បានប្រកបរបរដាំដុះតាំងពីឆ្នាំ១៩៧៩មកម៉្លេះ ហើយពុំដែលមានអាជ្ញាធរណាធ្លាប់ហាមឃាត់ឬរារាំងម្តងណាឡើយ។
លោក មុត អាយុ៥៨ឆ្នាំ បានឲ្យដឹងថា លោកបានសួរទៅភូមិឃុំតែគ្មាននរណាម្នាក់ដឹងពីជននៅពីក្រោយការកាប់ទន្ទ្រាននោះឡើយ។
លោក មុត បានបញ្ជាក់ថា ៖ «រាល់ថ្ងៃនេះខ្ញុំព្រួយបារម្ភក្រែងវាអស់រលីងដីហ្នឹង គ្មានអីធ្វើ។ ខ្ញុំសំណូមពរឲ្យកម្មករហ្នឹងឲ្យដកចេញ ហើយថៅកែហ្នឹងត្រូវដកកម្លាំងចេញឲ្យអស់ ឈប់នៅកន្លែងដីហ្នឹង ឈប់កាប់»។
ស្មៀនឃុំស្វាតជ្រៈ គឺលោក ឌុល សារ៉ា ត្រូវបានភរិយាជម្រាបថាលោកមិននៅផ្ទះទេ ឯមេឃុំមិនអាចទំនាក់ទំនងបានជំទប់។ ទីមួយគឺលោក គិម សាន បានឲ្យដឹងថា គេហាក់ដូចជាមានការលាក់លៀមជាមួយលោក តែលោកបានណែនាំឲ្យប្រជាពលរដ្ឋធ្វើការតវ៉ានៅសាលាឃុំនៅថ្ងៃច័ន្ទ។
អភិបាលស្រុកស្នួលគឺលោក អ៊ីវ សាភុំ បានជម្រាបថា លោកមិនទាន់បានដឹងពីបញ្ហានេះនៅឡើយទេតែលោកនឹងធ្វើការស្រាវជ្រាវ។
លោក អ៊ីវ សាភុំ បានមានប្រសាសន៍ថា ៖ «សូមបងប្អូនយើង ប្រជាពលរដ្ឋ បើសិនជាគាត់មិនកក់ក្ដៅ ឬក៏មិនមានជំនឿលើឃុំលើអីឲ្យគាត់រាយការណ៍មកស្រុកមក ខ្ញុំនឹងដោះស្រាយ ហើយបើខ្ញុំក្ដាប់បានអ៊ីចឹង ចាំមើលល្ងាចនេះខ្ញុំនឹងចុះទៅ»។
ប្រជាពលរដ្ឋនៅឃុំស្វាយជ្រៈធ្លាប់ទទួលរងការប៉ុនប៉ងយកដីពីសំណាក់ក្រុមហ៊ុនអភិវឌ្ឍន៍មួយម្តងរួចមកហើយ ហេតុនេះបានជាមានការភ័យព្រួយខ្លាចបាត់បង់ដីធ្លីជាបន្តទៀត បន្ទាប់ពីឃើញមានក្រុមអនាមិកដែលបានប្រើកម្មករឲ្យធ្វើសកម្មភាពតាមរយៈមន្ត្រីមានអំណាចនៅសាលាឃុំ៕