តំណាងប្រជាពលរដ្ឋម្នាក់ គឺអ្នកស្រី ស៊ីណាត មានប្រសាសន៍ថា មេភូមិសំរោង១ គឺលោក មាស មុត បានមកបង្ខំឲ្យពួកគាត់ផ្តិតមេដៃដោយគំរាមពួកគាត់ថា ដីនេះគឺគេយកទៅធ្វើជាអាងស្តុកទឹកបម្រើផលប្រយោជន៍សាធារណៈ ទោះបីជាមិនព្រមឲ្យក៏គេយកដែរ ហេតុនេះហើយគាត់មានការភ័យខ្លាចក៏ផ្តិតមេដៃទៅ។
អ្នកស្រី ស៊ីណាត បានឲ្យដឹងដូច្នេះ ៖ «អត់មានឲ្យដោយសុទ្ធចិត្តទេ ព្រោះលោកមេឃុំគាត់ជំរិតហើយ ដូចថាជំរិតខ្ញុំទៅចុះ ព្រោះគាត់មកនិយាយថា ទោះបីចែឯងឲ្យក៏ដោយមិនឲ្យក៏ដោយ ច្បាប់ត្រូវតែធ្វើហើយ គាត់ថាអ៊ីចឹង»។
បុរសឈ្មោះ ម៉ម ពិសិដ្ឋ បន្ថែម ៖ «ខ្ញុំសំណូមពរ ខ្ញុំចង់ឲ្យរាជរដ្ឋាភិបាលជួយសំណងដល់ប្រជាជនដែលប៉ះពាល់ដីនៅហ្នឹងគិតតាមតម្លៃទីផ្សារ»។
មិនអាចសុំការពន្យល់ពីប្រធានភូមិសំរោង១ គឺលោក មាស មុត បានទេ នៅល្ងាចថ្ងៃទី៤ ធ្នូនេះ។ប៉ុន្តែមេឃុំសំរោង គឺលោក ហ៊ុល នឿន ពន្យល់ចំពោះបញ្ហាខាងលើនេះថា ៖ «ដីហ្នឹងគឺទៅធ្វើលទ្ធកម្ម បងអ្នកធានាចំពោះធ្វើហ្នឹង។ ដីហ្នឹងវាអស់តិច អត់មានអស់ច្រើនទេ ការណែនាំគេថា បើបានលើសពី៥% អាហ្នឹងបានមានសំណង ដល់អាហ្នឹងវាតិច»។
អភិបាលស្រុកភ្នំក្រវាញ គឺលោក ទូច សំបូរ មានប្រសាសន៍ពន្យល់បញ្ហានេះថា អាជ្ញាធរស្រុកមានគម្រោងអភិវឌ្ឍវិស័យធារាសាស្ត្រនិងការពារបឹងធម្មជាតិឲ្យមាននិរន្តរភាព។ ជំហានដំបូងគឺអាជ្ញាធរធ្វើការសិក្សាពីផលប៉ះពាល់ដែលអាចកើតមានចំពោះដំណើរការនេះប៉ុណ្ណោះ។ លោកបន្តថា ប្រសិនបើផលប៉ះពាល់ធ្ងន់ធ្ងរ អាជ្ញាធរនឹងមានដំណោះស្រាយ។
លោក ទូច សំបូរ មានប្រសាសន៍ដូច្នេះ ៖ «មានអត្ថប្រយោជន៍ដល់ប្រជាពលរដ្ឋ ប្រជាកសិករយើងច្រើនណាស់ ធំធេងណាស់ ហើយបើយើងមិនគិតអ៊ីចឹង ត្រីនៅក្នុងហ្នឹងក៏ខូចខាត ទឹកក៏អត់បានផលសម្រាប់រួម។ គាត់(ប្រជាជន)ធ្លាប់ដណ្ដើមយកដីអីបន្តិចៗអ៊ីចឹង យូរៗទៅវាអស់ អ៊ីចឹងយើងត្រូវការពារ ប៉ុន្តែការពារនេះក៏មិនមែនធ្វើតក់ក្រហល់ទេ សិក្សាពន្យល់គាត់ទាល់តែយល់ ហើយនឹងព្យាយាមទាល់តែគាត់យល់»។
ទោះបីជាយ៉ាងនេះក្តី មន្ត្រីអង្កេតសមាគមការពារសិទ្ធិមនុស្សអាដហុក ប្រចាំខេត្តពោធិ៍សាត់ គឺលោក ភួង សុធា មានប្រសាសន៍ថា លោកពុំទាន់បានធ្វើការស្រាវជ្រាវលម្អិតចំពោះបញ្ហានេះនៅឡើយ។ ប៉ុន្តែបើតាមផ្លូវច្បាប់ ដីធ្លីទាំងឡាយណាដែលប្រជាពលរដ្ឋបានកាន់កាប់និងអាស្រ័យផល នៅពេលរដ្ឋមានតម្រូវការយកទៅធ្វើការអភិវឌ្ឍអ្វីមួយបម្រើផលប្រយោជន៍សាធារណៈក៏ដោយ ក៏ត្រូវតែធ្វើការពន្យល់ ព្រមទាំងផ្តល់ជាថ្នូរ ឬផ្តល់ជាសំណងសមស្របជូនប្រជាពលរដ្ឋផងដែរ៕